TVB機會多願留效 陳豪為新戀情求傳媒放生

採訪：植毅儀
攝影：彭子文
髮型：IvanLee@
Headquarters
場地：Headquarters

陳豪這期好火，說的不止是他的新劇《點解阿Sir係阿Sir》出街後收視不俗，更惹火的是他和新緋聞女友陳茵媺的戀情，兩人常相隔送秋波，令旁觀者妒忌，也令前度女友廖碧兒出口術暗示有人做「小三」，矛頭直指陳茵媺，令事件峰迴路轉，分分鐘好睇過TVB劇。其實新緋聞中，神女同襄王都有心，欠的只是獨處的機會，陳豪更公開呼籲記者朋友不要再緊迫盯人，讓他有機會約陳茵媺去食飯。

陳豪是出名的「順得人」，在電視台明爭暗鬥的競技場中，記者從未聽過有人講他的壞話。07年他憑《溏心風暴》飾演的唐至安(得得地)表現突出及深入民心，成功一箭雙鵰奪得「最佳男主角」及「我最喜愛的電視男角色」兩個大獎，成為雙料視帝。以陳豪的叫座力，其實他大可離開TVB，回內地拍劇搵真銀。聽到記者的讚美陳豪笑笑口說：「有內地經理人向我招手，但我沒這打算，其實我反而好享受在香港拍劇。講真咁多年來，電視台拍劇的模式都沒變，都是流水作業。梁朝偉、周潤發都捱過，拍劇有邊個唔辛苦，但辛苦都係兩、三個月的事。但就真的可以為演員帶來好多不同的機會，咁我寧願捉緊這些機會，好日子唔係成日有，電視圈為我build up了很多不同的機會。當日入得TVB就預咗捱，公司畀機會我練演技，熟能生巧才有進步。」

做主角才肯拍電影

未入TVB前，在澳洲讀書的他本為模特兒，被前經理人許願發掘。94年參演第一套電影《晚九朝五》進入娛樂圈，輾轉拍了幾套電影，卻未能一炮而紅，2000年加入TVB，效力將近11年，參演拍攝的劇集接二連三，最終獲得「師奶殺手」的稱號。近年電影圈似有復甦跡象，倒不如返出去拍電影還吃香，誰不知陳豪聽到記者這提議耍手兼擰頭。「我年紀唔細啦，剛40歲，唔想浪費時間，都一把年紀。坦白講，自己是電影人出身，呢幾年唔係冇人搵我拍電影，我等緊一個好劇本，如果我返出去拍電影，我希望做主角，因為我知道自己有咁嘅空間，我唔想返到去電影圈，又好似一個新人咁，蜻蜓點水式咩都拍下。電影與電視唔同，電影是投資者做主導，一分一毫都在計錢。」

避看星爺電影免抄襲

新劇《點解阿Sir係阿Sir》出街後收視不俗，陳豪的喜劇細胞再次被發掘。雖然坊間不少人話似電視版《逃學威龍》，但他不怕被指抄襲，更坦言沒看過周星馳的戲作參考。「星爺是我偶像，一早接到劇本時，已經預了觀眾會比較，但不擔心。我接到劇本後反而唔再睇佢D片，因為一睇唔多唔少都會跟，我好介意抄人嘢。相信你們現在看了就知道根本不存在星爺的影子，好多動作及說話都是我自己創作，配合到劇，笑位好到位。今次拍校園劇，同楊怡、鍾嘉欣，仲有K4四位學生等合作，自己都覺得後生咗十年。拍喜劇好難，因為唔單止要引自己笑，最重要是引人笑。我好喜歡拍喜劇，因為要求的層次多，咩都要想像化，比平時付出多1.5倍精力。Energy Level提升，怕浪費了努力。因為喜劇出來別人唔受，就會變成鬧劇。」有理由相信陳豪真的自行創作「火羅Sir」一角，因為單看他劇中那冬菇頭已令人發笑，再配合他劇中的古板性格，真的只有他本人創造出來才懂得演。

陳豪望有時間及空間譜新戀情。

不願再談廖碧兒

陳豪在訪問中，多次告訴記者，自己已經40歲，很多事要經過深思熟慮才去做，提升個人競爭能力。而他口中的競爭能力，相信是指他正在籌備中的馬來西亞咖啡店。問到為何選在大馬開第一間咖啡店，陳豪坦言考慮到自己在當地有更大的叫座力，而且當地的營商環境也比香港好，租金平、人工較低。貴為城中「筍盤」又是一線吸金王，既然講到自己已40歲，倒不如考慮成家立室，反正又有新對象，聽畢，陳豪即說：「以前打算30歲結婚生仔，不過呢行做得咁上下，就會知好多事自己控制唔到，現在暫時冇去諗。」聽陳豪講，難道被上一段六年情所傷？他即收起笑容說：「上一次已經過去咗，兩個人相處講技巧，唔係黑同白之分。唔答啦，唔想再回應。」作為一個有風度的人，還要是男人，沒理由說前度的壞話，再者兩人始終都相愛過。既然不講前度，不如講下現任啊，坊間傳聞陳豪用獨門咖啡品味撻著新劇《心戰》拍檔陳茵媺。此時陳豪臉紅耳赤，拍一拍記者手背求情說：「救命，你又問啦！(咁大家關心你？)茵媺是個好女仔，我好欣賞佢。個人又sweet，學嘢又快，一個唔錯嘅女仔，我會好好珍惜。(茵媺話你未開始追佢？)都係你地(指記者)啦，成日跟住晒，我想約都難！」各位記者朋友聽到啦！