老婆陳茵媺剛剛生咗B，剛做老竇嘅陳豪，今晚就話咁快出活動搵奶粉錢，喺太古廣場進行聖誕亮燈儀式，晚上7點左右佢著上紅色西裝款皮褸亮相，一身喜氣，果然人逢喜事精神爽。

主持楊洛婷問陳豪最想要咩聖誕禮物，陳豪就甜笑話：「大家都知啦，我個Baby噚日arrive咗，已經係我最大嘅禮物。」在場嘅聖誕老人就向佢送上機械人模型。

傳媒問到囝囝幾時出世，陳豪話：「噚日下晝。」係咪突然作動？佢話:「唔係唔係，啱o架，係咁上下時候o架，係順產，好好呀，好健康…之前係有小小先兆，醫生都叫佢入院o架啦，overall成個過程都係6個鐘。」

問囝囝幾點出世？陳豪就話：「唔透露得，其實小朋友到咗之後，仲有好多嘢要善後，又要顧住Aimee身體，又要逐一朋友去通知囉，變咗傳媒係最後尾先可以handle到。」咁囝囝幾多磅呢?陳豪就話「6磅11安士」。

咁問佢有冇入產房?陳豪話：「Of course!(yes) (有冇拍video?)冇呀，一直喺佢旁邊啦。(有冇剪臍帶?)有，個感覺好感動又好玄妙，不過冇喊，因為太緊張。」

咁問到Aimee有冇喊？陳豪話：「佢好辛苦，生BB唔容易，佢好堅強及強壯，令過程好順利，我好緊張，幫唔到佢，都係靠佢自己努力」點樣獎勵太太？佢話:「點都得啦，做媽咪咁辛苦。」係咪餵人奶？佢話:「餵人奶，全天然。」

咁BB似邊個？陳豪答：「個個都似，好靚仔，但唔係似我，生出嚟好靚，唔係講笑。」

咁Aimee同BB返到屋企未？佢就話仲未返屋企，又透露同老婆已經幫囝囝改咗英文名叫﹕Aiden，佢猛咁話好有意思，不過有咩意思，佢就擰頭唔講。

會唔會追多個？ 陳豪：等BB一歲後先算

陳豪繼續分享剛做爸爸嘅心情，問佢係咪好興奮，佢笑得好開心話：「有啲唔相信變成事實，喺Aimee肚咁耐，依家睇住佢出世，見佢咁靚咁可愛，真係上天畀我一份好好禮物。」佢話暫時仍未為囝囝沖涼，但已嘗試過幫佢換尿片。

問有冇蝦碌事發生？陳豪話：「都ok。」至於有冇試過比BB「斟茶」？佢笑言：「仲避到，總之依家湊BB手忙腳亂。」之後會返屋企定到醫院陪老婆？佢好錫老婆話要陪住太太，咁會唔會停工幾日陪住呢？佢話：「盡量，今日活動一早接落，希望之後抽多啲時間陪太太和bb。」

陳豪表示母親已見過孫仔，嫲嫲仲讚BB好可愛，而Aimee父母仍未回港。噚日陳豪本身有通告，應該陪Aimee待產所以臨時甩底，佢話呢件事想低調啲，想太太喺安靜環境下，靜待BB來臨。佢話:「呢件事(BB出世)都係靜靜咁進行，無透露過，直至我哋喺微博公佈同大家分享開心。」唔知會唔會追多個呢？佢話：「都想，但要等媽咪休息吓先。等BB一歲之後先算。」

問到Aimee會唔會再拍劇呢？陳豪話遲啲先算，但太太有乜決定佢都支持。另外，有傳陳豪明年1月約滿，將唔續約無綫去內地拍戚其義新劇，陳豪就唔多回應話：「遲少少先講。」有傳佢收廿萬一集？佢就貫徹低調作風避談。

之後陳豪就直奔舊山頂醫院嘅嘉諾撒醫院探Aimee同BB，真係名符其實「愛妻號」。同行仲有陳豪媽媽同哥哥，陳媽媽話﹕「見過(BB)，我唔靚唔好影我相。」

Aiden名字源自愛爾蘭語 意指激烈

雖然新任爸爸陳豪拉鏈嘴拒絕透露囝囝英文名字Aiden真正含意，不過根據網上資料，Aiden源自愛爾蘭語，意指「激烈的」。而著名美劇《色慾都市》中，Aiden的角色是既性感又忠誠的男朋友，似乎對表著陳豪對陳茵媺的愛。另Aiden在美國更是最受歡迎的男孩名字之一。

而過往不少名人亦叫Aiden，當中以曾獲兩個榮譽博士學位的美國基督教牧師、作家及精神導師Aiden Wilson Tozer最為著名。未知Mo仔長大後，會否一樣名流千古呢？