最近好多無綫嘅舊員工都話，TVB待遇好差又刻薄，但係經理人唔係屬於無綫嘅藝人李霖恩又唔係咁睇。今日李霖恩喺九龍灣出席活動嘅時候話：「其實家家有求，呢排睇新聞，有啲走咗嘅人話公司刻薄，但之前佢哋又喺度做，其實可以選擇唔做，做人應該飲水思源。走咗又鬧公司，其實間間公司都有好有唔好。」

李霖恩講到咁，如果係佢遇到同樣待遇又會點呢？佢就話：「我會捱落去，肯努力實會有人見到，應用喺我身上，雖然0依家唔係好紅，開始有人識，會搵我做嘢，慢慢嚟。除非好有才華，入行都有自知之明，如果條件冇人咁好就慢慢捱，實有回報。」張松枝都喺無綫捱足18年，其中12年冇加人工，試問點樣捱落去呢？

日前梁乃鵬博士話會改短拍攝時間，李霖恩就話：「我都冇理呢啲，慣咗工作模式，可能仲後生。」

之後問到李霖恩支唔支持發免費電視牌照，佢就話支持發牌，仲話有良性競爭係好事。而最近無綫嘅招攬熱線被質疑係抽水，佢就話：「我本身支持公司做法，喺我心中都有想啲同事返嚟，亦唔覺得公司抽水。」

李霖恩認為舊同事應該飲水思源，唔應該一走人就鬧爆舊公司刻薄:「其實可以選擇唔做，做人應該飲水思源。走咗又鬧公司，其實間間公司都有好有唔好。」

李霖恩話，就算遇到刻薄待遇，佢都會捱落去:「我會捱落去，肯努力實會有人見到。」