第一屆《超級巨聲》出道的林師傑，在處境劇《愛·回家》飾演乖乖仔「木偶哥」，深入民心。不過，現實生活中林師傑是「食家」一名，入行以來狂溝女，3年內緋聞女友有6個之多。去年5月他與正印鄧穎芝分手，有指是男方被鄧捉到正他與o靚模山邊車震，其實當時他已暗溝是非港姐歐陽巧瑩。
事隔大半年，據知林師傑不但已溝掂歐陽巧瑩，兩人更已發展至半同居階段。周日（8日），記者斷正林師傑與歐陽巧瑩揸車返家過夜。其間，趁轉紅綠燈時，血氣方剛的林更猴擒啜爆女友，濕吻足足六、七秒。
本月 8號，木偶哥做完 gym後，與一早在停車場等候的歐陽巧瑩會合。人少的地方兩人就貼到實拖手，十分癡纏。
今年一月，記者發現林師傑和歐陽巧瑩鬼祟現身銅鑼灣利園拍拖。當日林師傑戴上黑超，而女友則素顏兼以粗框眼鏡加cap帽，跟在林師傑幾個身位後。兩人行街時十分避忌，行到離行離列，林師傑不時回頭望女友。
當發現記者，兩人立即分道揚鑣，前後腳在停車場會合。歐陽巧瑩以為成功撇甩記者，施施然登上男友的百萬波子座駕。但當車輛駛出停車場時，記者上前拍照，兩人一臉尷尬地苦笑，歐陽巧瑩向記者揮手，林師傑則火速驅車離開。
3月 8日 車廂啜爆
等轉燈嗰十幾秒，林師傑跟歐陽巧瑩都唔放過。三度濕吻，火辣程度爆燈。
左望右望
有人經過，木偶哥即時看實，以防有人偷拍，警覺性甚高。
木偶哥跟巧瑩咀完後，便帶她返回蠔涌住所過夜。
林師傑位於蠔涌的寓所，是樓高三層的獨立屋，落地玻璃，十分舒適，市價約二千多萬。
咀功箍花弗男
據知兩人已撻着大半年，但有能力收服花弗林師傑，歐陽巧瑩確有過人之處。唔講唔知，原來女方咀功了得，林師傑連揸緊車都要濕吻啜爆。
周日（3月8日）中午，林師傑在沙田做完商場騷，去銅鑼灣做gym後，便在圓方停車場會合歐陽巧瑩。上車前，兩人還周圍望，警覺性甚高。視察四周後，放下戒心的歐陽巧瑩，立即向男友送秋波，林師傑則載女友回家過夜。不過血氣方剛的他，揸車等候轉燈期間，猴擒地三度啜爆女友。看林師傑回味無窮，就知女方的咀功好掂。之後兩人便齊齊返回林師傑位於西貢蠔涌的寓所，繼續享受二人世界，直至凌晨仍未見女方離開。
1月 28日 鬼祟拍拖
林師傑和歐陽巧瑩被記者撞破同車時，女方難掩黑面，不情願地跟記者揮手打招呼，男方即開車離去。
兩人 1月 28日現身銅鑼灣利園，為免被人發現，前後腳行得十分避忌。
擘大眼唔認拍拖
與女友過完火辣一晚，林師傑翌日中午一臉倦容，駕駛着座駕外出。記者截停他訪問。向他求證是否與歐陽巧瑩拍拖，他一概否認，還不斷以工作為由話趕住走，咀完唔認數。
記︰我哋影到你同港姐歐陽巧瑩拍拖。
林︰咩話？我拍拖？我幾時拍拖呀？
記︰你哋咀嘴喎！咁都唔叫拍拖？
林︰邊有咀嘴過呀？冇！冇！冇咀嘴過！
記︰係咪感情穩定？影到你哋同車返屋企過夜。講多兩句啦。
林︰唔好啦！你哋成日都話講多兩句。我求吓你吖！我求吓你吖！公司唔俾拍拖，我依家事業為重，做嘢先。
記︰係咪驚公司鬧？
林︰梗係驚！我成日都俾公司鬧，依家趕住開工呀。
記︰真係影到你哋咀。
林︰我哋邊有咀嘴啫！我冇咀嘴過呀！
記︰歐陽巧瑩之前好多是非，俾人話夜蒲溝仔，又話私影，你點睇女友？
林︰我夠多新聞啦。真係唔講嘞。
記︰你帶個女仔返屋企，係咪已經見過家長？
林︰真係冇呀！乖啦乖啦，放過我啦。
說罷即跳上座駕離開。
兩人出席朋友生日派對，已經攬晒腰，非常親密。
早前兩人在網上晒情侶裝，話就話低調，但女方都忍唔住晒甜蜜。
其實木偶哥林師傑不嬲講大話當食生菜。去年 6月，訪問鄧穎芝為何與林師傑分手，是否因為斷正林師傑車震，鄧當時火氣十足默認。訪問鄧穎芝的同日，記者發現林師傑心情靚爆，約埋歐陽巧瑩、楊潮凱等人到赤柱漫步沙灘兼飲酒吹水。
當日記者問林師傑是否追求歐陽巧瑩時，他驚青猛擰頭，強烈否認。而歐陽巧瑩當時亦幫口，話唔覺林師傑花弗︰「如果係，佢已經追咗我啦！」不過紙包唔住火，事隔大半年，兩人的戀情浮面，在友儕的聚會中，不避忌糖黐豆。
3月 9日 驚青否認
木偶哥帶歐陽巧瑩回家過夜，玩咗成晚翌日殘爆離家。記者截停他訪問，被問戀情的他勁驚青，不斷「冇、冇、冇」。
去年 6月，林師傑與鄧穎芝分手，女方情傷殘爆。但同一時間，花心男已與當時的新獵物歐陽巧瑩沙灘漫步。
未分手已暗撻
林師傑因為飾演純情木偶哥一角，得到不少師奶支持。不過，現實的林師傑卻是猴擒花弗男。
知情者透露：「上年中師傑同 Vangie（鄧穎芝）仲一齊嗰陣，師傑已經同成班港姐玩到好癲嘞。佢成日漁翁撒網式約成班女仔出來玩，不過蔡思貝同劉佩玥成日要開工冇騷佢。反而 Tammy（歐陽巧瑩）因為啱啱同有米男朋友分手冇耐，可能悶啦，就逢叫必到。咁師傑同 Vangie因感情變淡，成日嗌交，加上 Tammy好識姣男仔，佢兩個一早已經眉來眼去玩到好埋啦！」
不過，據知上年爆出車震事件後，林師傑曾遭無綫照肺，所以他今次拍拖惟有轉玩地下情。猴擒累事，親熱都是等愛回家吧。
鄧穎芝:扮睇唔到
記者致電林師傑舊愛鄧穎芝，她得悉前度與歐陽巧瑩行埋，酸爆話：「佢（林師傑）係一個咩人佢自己都知嘅，咁我都祝佢哋幸福快樂。（咁你覺得林師傑可唔可靠?）咁你要問番佢依家個女朋友先知佢可唔可靠！我撞到佢會扮見唔到囉！」
是非港姐
歐陽巧瑩今年 22歲，以前曾經做過私影妹， 2013年參選港姐時奪友誼小姐名銜。她參選時網上流出牀照，又不停傳出緋聞，之後更被踢爆獲富商包起，被人稱為「是非港姐」。
3年溝6女
現年 25歲的林師傑由澳洲讀書返港，加入「巨聲幫」後被大台力捧。因家境好又識冧女，連舊愛鄧穎芝都寸他溝女多過食飯，除了現任歐陽巧瑩外，其情史十分精彩。
何雁詩
10年自稱剛回復單身的林師傑，被爆秒速搭上同是巨聲幫何雁詩，二人被拍得於圓方拍拖行街。有網民狂插林師傑在節目中自爆剛與女友分手，轉頭又追何雁詩。
鄧穎芝
二人於 13年撻着，可惜去年男方偷食車震被鄧穎芝捉到正，最終分手收場。
Gwen
去年有傳林師傑與嫩模 Gwen過從甚密，而 Gwen是鄧穎芝口中的疑似車震嫩模。之後 Gwen以勝利者姿態在社交網站向鄧穎芝挑機。
湯洛雯
去年被拍得於九龍灣撐枱腳後齊齊開工拍劇，不用埋位時二人更經常匿埋車廂談心。
吳嘉熙
去年林師傑和 Supergirls成員吳嘉熙於工作認識一撻即着。林師傑到土瓜灣上戲劇課時，吳嘉熙不避嫌現身探班，合照被友人放上社交網令戀情外洩。
視頻：木偶哥車廂啜爆港姐
林師傑今日在微博回應了一大段長文：「有部分人鍾意斷章取義中傷我，對外煽風點火評論我，屈我有錢，屈我家人係d有影響力嘅人，務求塑造一個令陌生人，甚至家人，朋友都會擔心，抗拒嘅林師傑⋯ 我仲有好多嘢需要改進，但我相信觀眾眼睛係雪亮嘅，my work speaks for itself, 自當兵以後我每日都好努力做好自己，增值自己，以尊業嘅態度面對所有工作，對得住自己，對得住屋企人。
其實我呢幾年寫嘅歌比數出嚟嘅’緋聞女友’多，投資落自己工作嘅錢比吃喝玩樂嘅多，最近愛回家入面同一眾演員嘅演出收視25點，應該比我同邊個喺車上面做緊乜嘢精彩。都係果句，懂我的，在心中，唔了解我嘅，我真心appreciate你地花時間，心機寫我，講我，但預期留意我d負面嘢，不如嘗試從我嘅歌認識我，focus on the positives，give me a chance, I’m not as bad as you think.
另外我好想多謝所有有關心我，問候我，支持我，愛我嘅人。我其實好被動，唔可以話做d咩出嚟報答大家，我只可以繼續揼石仔，用時間證明俾你地睇，你地冇睇錯人。I love you guys.」
歐陽巧瑩今早亦在微博留言:「謠言止於智者。多謝所有關心我嘅人。 開工」