胡杏兒羅仲謙11月齊拍《醋娘子》 歡迎楊怡監場

呢排無綫劇《衝上雲霄II》熱爆,除咗「Cool魔」張智霖同「Sam哥」吳鎮宇鬥型之外,胡杏兒着住小背心運動top喺街跑步嗰場戲都幾養眼「吸睛」。啱啱拍完《巾幗梟雄之諜血長天》嘅杏兒接住又飛咗去北京拍內地劇《如果不曾愛你》,遲啲仲要去內蒙拍外景,想返嚟幫手宣傳都唔得。

有新鮮感

雖然劇接劇,但杏兒又已經預咗11月個檔期再返無綫,到時會同羅仲謙齊齊拍潘嘉德嘅新劇《醋娘子》(暫名),其實之前有傳呢個劇嘅男主角係搵杏兒舊愛黃宗澤(Bosco),唔通真係咁大整蠱?喺北京嘅杏兒就話冇聽過:「冇聽過搵佢做喎,一直都聽係搵謙仔。」對於謙仔呢個新拍檔,杏兒都話有新鮮感,又大讚謙仔:「同佢一齊出席過活動,覺得佢幾cute,又好nice,希望合作愉快啦!」

做得男女主角,難免有親熱戲份,謙仔係杏兒好姊妹楊怡嘅男人,咁拍起上嚟咪好尷尬囉?杏兒笑言:「應該都冇乜嘢嘅,就算有,大家都係專業演員,冇嘢嘅!」不過到時楊怡得閒應該會頻頻探班,唔係監場,係嚟探男友同好姊妹,一次過探晒兩個,雙倍開心!

胡杏兒同羅仲謙11月會合演無綫新劇,唔知楊怡到時會唔會嚟探班?設計圖片及對白
■胡杏兒同羅仲謙11月會合演無綫新劇,唔知楊怡到時會唔會嚟探班?設計圖片及對白