無綫當家花旦佘詩曼離巢，一眾姐仔正好趁年底台慶頒獎禮爭視后出線。雖然過去四年視后獎都被非無綫「親生女」如鄧萃雯和米雪等擸晒，但據悉今年形勢逆轉，親生女盡佔先機，當中尤以演《怒火街頭》巴渣律師的胡杏兒、《真相》的金牙大狀楊怡、《點解阿Sir係阿Sir》的淚眼教練鍾嘉欣和《潛行狙擊》的Madam陳法拉被睇高一線，四旦將埋身火併爭視后。
佘詩曼、廖碧兒和蒙嘉慧今年先後脫離無綫賣身契，各自離巢外闖，藝員部需力谷一姐接棒，今年12月初舉行的《萬千星輝頒獎典禮》，就正好造就上位人選。
早年簽約無綫為經理人的阿佘，06年憑《鳳凰四重奏》成為TVB首位雙料視后，風頭一時無兩，此後四年的視后大獎卻不約而同落在非「親生女」手上，包括米雪、李司棋及去年冧莊的鄧萃雯，無綫贏了民意，但親生女就失意。不過，據知今年情況會大逆轉，視后大熱一律為「親生女」，換言之新一屆視后也必屬自己人。
無綫一姐佘詩曼離巢後，胡杏兒、陳法拉、楊怡和鍾嘉欣將競逐視后獎，爭做港劇一姐。設計圖片
《怒火街頭》贏盡口碑
至目前為止，《怒火街頭》是今年贏盡口碑的電視劇，而且收視高企，劇中飾演巴渣大狀王思苦的胡杏兒收起囧樣，跟流氓Law霸鄭嘉穎鬥氣擦出愛火花；另外，她在《魚躍在花見》扮公主病港女，再加上她和宣萱主演的宮廷戲《萬凰之王》被無綫暫定為台慶劇，挾三劇角逐視后，未贏獎都贏氣勢。
除了杏兒外，鍾嘉欣在《點解阿Sir係阿Sir》中扮演保齡球教練Miss Koo，攬住陳豪哭崩的一幕震撼全港網民，靠眼淚擢升視后大熱之一；《真相》中的正氣大狀楊怡，夥拍上位小生陳展鵬，齊齊人氣勁升。
阿姐《福祿壽》成黑馬
陳法拉在播映中的《潛行狙擊》演警隊刑事情報科madam，其角色破格硬淨，和chok神Laughing謝天華做對手，既抵死又惹笑。雖然嘉欣、楊怡和法拉都是杏兒的強敵，但另一齣台慶劇《荃加福祿壽探案》，孭飛的阿姐汪明荃也剛好標尾會，成為視后黑馬。
今年視后走勢平均，挾三劇來勢洶洶的杏兒昨日被問到有否信心爭獎時，她在電話中說：「真係平常心，要睇民意。」問她覺得哪位花旦是勁敵？她說：「個個花旦都有自己嘅優點，楊怡都好好，我見佢瘦咗好多，都一直係咁拍戲，都辛苦o架，子珊、法拉、嘉欣都好，睇造化啦。」
汪明荃在《荃加福祿壽探案》中扮鬼扮馬，成為視后黑馬。資料圖片
楊怡（右）前年勇奪台慶我最喜愛的電視女角色時，獲阿佘在台上抱抱贈興。資料圖片
胡杏兒：自己似新人
杏兒06年增肥40磅拍《肥田囍事》，當年她曾是視后大熱，可惜最後被阿佘擊敗，杏兒昨日說：「攞獎係天時地利人和，講角色啱唔啱做，觀眾鍾唔鍾意睇都係重要因素。今年嘅《怒火》、《魚躍》都好好，但我都想大家留意《萬凰之王》，我拍呢套劇時覺得自己好似新人，因為好少做呢啲咁實淨嘅宮廷戲，如果觀眾鍾意，我已經好開心啦。」
大比拼：四大熱門從未封后
每年無綫視帝視后寶座都競爭激烈，今年視后四大熱門候選人都沒拿過最佳女主角，且看誰能登上寶座。
胡杏兒（ 31歲）
•入行經過： 99年參選港姐，入行 12年
• TVB獎項： 02年飛躍進步女藝員獎
•入圍劇集：《怒火街頭》
•賣點：飾演大律師王思苦，為求目的不擇手段。與鄭嘉穎有激烈床戲。
鍾嘉欣（ 27歲）
•入行經過： 04年參加國際華裔小姐，入行 7年
• TVB獎項： 06年飛躍進步女藝員獎
•入圍劇集：《點解阿 Sir係阿 Sir》
•賣點：飾演 Miss Koo一角被陳豪欺騙感情勁喊，被觀眾力讚演技出色。
陳法拉（ 29歲）
•入行經過： 05年參加國際華裔小姐，入行 6年
• TVB獎項：去年最佳女配角《巾幗梟雄之義海豪情》
•入圍劇集：《潛行狙擊》
•賣點：演出訓練卧底的高級督察，宅男們繼續追捧女神。
楊怡（ 31歲）
•入行經過： 99年加入藝員訓練班，入行 12年
• TVB獎項： 03年飛躍進步女藝員獎、 08年最佳女配角《溏心風暴之家好月圓》、 09年我最喜愛的電視女角色《宮心計》
•入圍劇集：《真相》
•賣點：飾演敢言大律師，劇集內的爭議個案受網民注目。
林峯續約博封視帝
今屆無綫視后爭崩頭，視帝同樣爭持激烈。鄭嘉穎在《怒火街頭》中飾演深水埗流氓律師 Law霸，演得夠放又好笑；《潛行狙擊》的 Laughing Sir謝天華就擺明 chok爆，衰衰格格但入型入格，下月他更會和黃宗澤再度合作拍電影版，增強爭獎氣勢。
本來視帝是 Law霸惡鬥 Laughing，豈料突然殺出程咬金林峯和黎耀祥，令鬥爭更白熱化。林峯主演的《不速之約》下月播出，劇中他扮演紅眼魔鬼。據知近日林峯已再續約無綫五年，但他不認為續約有助攞獎，日前他接受訪問說：「我係續咗約，條件滿意，合作係講個心講公平，大家互相信任。」講到攞獎信心，他說：「我信心入五強啦！」
祥仔盼三連霸
黎耀祥擔演的《法證先鋒 III》是台慶劇，劇中他飾演法證部總督察，不知會否繼去年冧莊視帝後，再上演三連霸，祥仔昨於電話中說：「我對獎隨緣，我又唔係特別恨，但冇人嫌多獎，再畀我攞多十次都制。」對於視帝對手，祥仔說：「 Laughing呢排大家會談論， Law霸就一改形象，林峯千祈唔好睇小，佢個個角色幾特別，今年頒獎禮好睇過舊年同前年，夠百花齊放。不過大家睇漏咗隻黑馬 Bosco（黃宗澤），佢喺《潛行》表現好好，出位程度不下於 Laughing。」