胡定欣有野心起飛 《衝II》角色被激讚

熱播的《衝上雲霄II》將於周日大結局,網民鬧爆「CoCo」胡定欣選擇講義氣代友產子,放棄深愛的男友於理不合!可幸在胡定欣的拿揑下,角色未被曲折無比的劇情拉倒,連前輩吳鎮宇、「哥哥」馬德鐘同網民激讚她演得夠自然,角色好生活化!執身彩的胡定欣大談做「CoCo」的難度:「我好用心去思考角色,就算唔認同CoCo嘅做法,都要帶動觀眾去明白CoCo。讚賞背後,得來不易,做得好辛苦,我有信心唔係花瓶囉!」

攝影:李權威 髮型:Matt Chiu@Xenter 化妝:Jessica Chan 場地:Pokka cafe@名店坊

胡定欣於《衝II》中的支線故事成為爭議性話題,最初接過劇本,睇完都嚇到滴汗,她自爆:「做演員冇辦法,唯有去救自己,尤其係喺有限時間內,由事發,到面對同解決,要交到戲畀觀眾睇,等佢哋入戲真係唔容易,最重要係說服到觀眾明白CoCo諗法,絕對唔可以齋跟劇本對白去演,要下苦功,做功課度吓應該點去演繹,盡量用內心戲配合!如果拿揑得唔好就會俾觀眾插CoCo愚蠢,好彩今次都過到關,最驚喜連Sam哥(吳鎮宇)同馬德鐘都讚我演技好,我對自己表現都幾滿意。其實得到觀眾認同,同到自己交代就得啦,年尾拎唔拎獎呢方面反而係其次啫。」

結婚遲啲先

邁向32歲的中女胡定欣好女唔憂嫁,闊少男友沈柏淳(Patt)睇嚟都有排等:「成日傳婚訊,但呢兩、三年都冇諗住嫁,啱啱入行10年,希望呢幾年畀心機做吓嘢先,我唔係冇野心,最好再有代表作啦。不過,呢排朋友問得我最多嘅一條問題,就係幾時生仔呀?我都有認真咁問過自己,就算老來唔後悔,我怕o依家生仔會後悔,最怕錯失機會,有啲嘢,係要一氣呵成好啲!」至於有冇同老友胡杏兒分享戀愛心得,對佢食唔食黃宗澤(Bosco)「回頭草」畀吓意見呢?她就帶點迴避:「自己感情,自己搞掂,我同Bosco係同事,工作還工作,大家合作得好愉快。」

胡定欣
胡定欣不算絕色美女,但順眼有演技兼有觀眾緣,上位之路應該不難行。
胡定欣
為了演好CoCo一角,胡定欣做了大量功課。