胡定欣樂做綠葉 黎耀祥爭視帝五五波

胡定欣做慣女配 擔正慢慢嚟

藝員胡定欣在今年萬千星輝頒獎典禮成為奪得「最佳女配角」的熱門人馬,近期播出的台慶劇正好為她拉票造勢。做事按部就班的定欣享受現時的女配角位置,不過定欣坦言問心一句,也恨攞獎。

近年藝員胡定欣與黎耀祥在不同時空下三度合作,包括劇集《巾幗梟雄》、《法證先鋒III》和《大太監》,定欣在《大》中戲份頗重,由頭帶到尾,與祥仔更發展一段宮女和太監的曖昧情。合作多次,默契愈來愈好,定欣在《大》的紮實、成熟的演技也受到好評,她說:「祥仔係好戲之人,同佢合作咁多次學到好多嘢,初期都好大壓力,依家好好多,但對自己要求亦高咗。今次拍得好舒服,因為古仔係講我哋曖昧情,所以唔需要攬攬錫錫,係含蓄嘅愛,內心戲好多,我哋都好鍾意呢個古仔。」

胡定欣
胡定欣享受現時女配角的位置,認為做事需要按部就班。

新劇過歌癮

定欣在劇中飾演倩蓉,祥仔則是連英,故被稱為「連蓉配」,兩人又合唱片尾歌《日月》。其實定欣曾經參加新秀歌唱比賽,唱功有一定水準,今次「半首歌」也為定欣過足歌癮,她說:「今次好好好難得機會,識我嘅朋友同粉絲都知道我好鍾意唱歌,等咗呢日好耐,今次喺台慶劇唱半首歌都已經好開心。」

定欣憑今年另一劇集《拳王》提名角逐「最佳女配角」,現正熱播的《大》可以為她造勢拉票,問定欣恨攞獎嗎?她坦言:「其實恨o架,自己一直處於配角位置,其實自己幾享受做配角,當然想成為主角,但一步一步嚟,自己有信心、公司先對你有信心。」不過今年的「女配角」也是棋逢敵手,她說:「今年競爭好大,好似黃智雯、陳茵媺、江美儀都好突出。」

胡定欣
定欣享受女配角的位置,認為做事需要按部就班。

胡定欣
定欣在馬國舉行的ASTRO頒獎禮勇奪「女配」獎。

胡定欣
曾參加新秀的定欣(後排右二),愛唱歌的熱誠絲毫沒減退。

文:影視組

攝:攝影組

場地:EL CID 西班牙餐廳(銅鑼灣)

服裝:b+ab

黎耀祥爭視帝五五波

視帝爭奪戰如箭在弦,不少當紮小生、視帝候選人皆覬覦帝位,今年無綫更創新以公投方式選出視帝,黎耀祥卻貫徹其謙虛作風,揚言以平常心面對,自言贏面只是五五波。

黎耀祥
黎耀祥讚《大太監》出色,但再爭視帝仍有難度。

曾奪兩屆視帝兼連續第三年於台慶劇擔正的黎耀祥(祥仔),今年有機會再次問鼎視帝寶座,不過祥仔貫徹其謙虛內斂的性格表示:「信心一半一半啦!《大太監》以戲論戲係幾好,角色亦幾特別,但因為始終已經攞過視帝,再攞嘅機會基本上細啲,因為已經畀人認同過,觀眾嘅要求會高咗,所以都係五五波啦!」

近年不少花旦小生都愛北上拍劇搵人仔,不過身為廿四孝爸爸的祥仔,卻為了正值青春期的乖仔放棄賺錢機會,他坦言:「我真係無乜興趣返大陸拍劇,囝囝依家15歲,係最需要我陪在身邊嘅時間,咁我着重屋企多,我覺得就算工作幾成功,家庭失敗都唔會開心!」

幾日唔返屋企

今年祥仔有份擔正的三套無綫劇集無獨有偶均是古裝劇,但祥仔竟自爆最愛拍時裝劇:「其實我鍾意拍時裝,因為拍古裝好辛苦,次次至少着三件長袖,但啲衫好厚又唔通風,真係好焗好辛苦!記得拍《造王者》時開完廠景就開外景,連沖涼嘅時間都無,高峰期仲試過幾日無返屋企,要喺車瞓,連妝都唔落!」

因為深明拍劇的辛酸,對於囝囝將來會否加入娛樂圈,祥仔斷言:「唔會啦!佢唔鍾意。(同佢傾過?)係呀,我唔覺得佢會鍾意做演員。

黎耀祥
祥仔憶述拍古裝劇的辛酸,坦言恨拍時裝劇。

黎耀祥老婆及兒子
顧家的祥仔希望多陪伴老婆及兒子。

髮型:IVAN LEE @ HEADQUARTERS

造型:K @ geniuskingdom.com

文:李佩珊

攝:吳文聰