要衝上雲霄，得經歷無數墮地傷痛。面前飛躍進步女藝員獎座，猶如唐詩詠的駕駛執照，她一飛冲天了，進步的是演技，還有看人。入行七年，她苦心經營過一段愛情，結果跌至遍體鱗傷。此刻唐詩詠覺悟了，立誓三年不拍拖為事業衝刺，但她從沒恨過負心漢，也多得他使自己演技更爐火純青。　撰文：楊潔雯

唐詩詠入行七年，終於在無綫萬千星輝頒獎禮上，獲得演藝事業上第一個獎——飛躍進步女藝員，會不會來得太遲？唐詩詠一臉滿足地說：「每個人都有佢哋時間表，冇人話越早攞越好，就算遲攞我都唔會唔開心，只要付出嘅努力有人認同就已經足夠！加上攞獎係天時地利人和，演員係被動嘅，遇到一個好劇本、好角色，所有嘢都要夾！」

沒有拖拍的唐詩詠聖誕忙於拍劇，新年則接了許多工作真銀，一於寄情工作，活得更充實。

崔建邦每次失意時，總有唐詩詠在身邊默默支持，可惜她只得到傷心作回報。資料圖片

唐詩詠奪飛躍進步女藝員時百感交集，原來在她心中的謝辭中崔建邦也佔一席位。資料圖片

立誓三年唔拍拖

唐詩詠自言單身的她，現在多了異性約食飯，不愁寂寞。

唐詩詠之所以遲遲未上位，只因用情太多，她自己也承認以前太偏重感情，她說：「我覺得以前年紀細唔識諗，比重偏埋一邊，家自己成熟咗，呢一刻我要全心全意做嘢，在工作上尋求更大的滿足感。」拍拖多年，癡心錯付，唐詩詠終醒覺，明白拍拖不是最重要，她說：「我好多嘢想做，已經唔想去拍拖，以前太少時間，家我要為自己去衝刺。」如今要捨愛情，爭取事業高峯，唐詩詠立心要追回虛度的時間，她說：「如果要 set一個目標，幾時攞一個乜嘢獎，咁樣太辛苦喇！我知道嚟緊呢兩年會係一個考驗，我要做好每一個劇，呢三年我會全力以赴，唔好有雜念，所以想三年唔拍拖。家單身係多咗人約食飯，就算係啱都要經過觀察期，大家可以做住朋友先，觀察下睇下先。」
每次在崔建邦最衰最慘最孤獨的時候，唐詩詠總對他不離不棄，可惜，花心難改，人大了，成熟了，從一段腐朽的感情抽身而退，仍是明智之舉，唐詩詠昨日在上水任剪綵嘉賓被問到可有與崔建邦聯絡時，她淡然說：「我睇報紙知佢停牌，佢應該自己 handle到，呢排好忙，所以都冇聯絡，因為要花好多時間同工夫準備劇集。」幾句話已表明立場跟他劃清界線。

擇偶條件要專一

不過，愛之深未必是恨之切，唐詩詠至今還表示感謝崔建邦，她說：「感激佢，發生過嘅經歷，令我學到好多嘢，以前的經歷係一個好好嘅經驗，可以幫助我演戲嘅路，當我要演一個唔開心的角色，我可以想起我嘅經歷，人係要有經歷嘅，有唔好嘅經歷唔緊要，最緊要係識得諗，之後要知道自己點做，然後爬番起身。」
一次又一次的背叛，傷過痛過，唐詩詠對愛情仍然有期望，宣佈她今後會帶眼識人，並事先講明擇偶的條件，她認真地說：「專一，我好堅持一定要專一，呢樣係好基本嘅嘢！我知道自己未必識睇人，不過最緊要係識得睇啱我嘅人，我知道我一定會搵到個好錫我嘅人！」
攝影：陳志嵐
服裝： Guess
場地提供：圓方

成長路
四葉女星途燦爛

03年《當四葉草碰上劍尖時》
初出道時唐詩詠名副其實是片四葉草，柴娃娃拍劇。

唐詩詠出道七年，由四葉女做到飛躍女，箇中艱辛心路歷程，未必人人可體會得到，但唐詩詠在演技上的進步，卻是有目共睹，能夠在無綫台慶頒獎禮獲獎，是演技備受認同事業起飛的一步。