極品剩女 周麗淇

「剩女」一詞,總予人一點貶意,但「黃金剩女」卻是另一回事。 她們不但有一定的經濟能力,更外表光鮮、性格獨立爽朗,最重要的是不怕流言蜚語,勇於堅持自己的信念。現年33歲、仍然單身的周麗淇(Niki ),是「黃金剩女」的表表者。她重視愛情,卻從不強求。寧缺莫濫,大概是「黃金剩女」的基本戀愛法則。

撰文:Emily

《女警》度身訂造

在《女警愛作戰》中,Niki飾演的呂霏俠是個30歲的衝鋒隊女警長,個性衝動爽朗兼搏命,但在感情路上卻頭頭碰着黑,更被標籤為「嫁唔出的剩女」,這角色可謂是Niki 的個人寫照。她直言呂霏俠的愛情觀跟自己相似,但就表示選角跟她是否「剩女」無關。「套劇係講中女,但我無理咁多,我係畀其他因素吸引而答應接拍。香港電視史上未拍過女警衝鋒隊,呢套劇好寫實,係全軍裝包裝,同埋講到明係由女警的心態出發,我聽落覺得幾型!」

據知這個角色由甚麼演員去飾演,需要警隊同政府批准核實,始終是代表香港,難怪Niki得戚地表示:「如果形象唔好都唔會考慮,怕會影響警隊聲譽嘛!」這是Niki首次飾演女警,她坦言壓力很大,因此事前做足功課,向幾位女警朋友取經,務求成為稱職的Madam。「我希望天下的男士知道,外表威風凜凜的女警,其實卸下制服後亦有溫柔一面。」

轉攻內地

相比起演藝事業,Niki 在歌唱事業方面的成績稱不上突出,令人留下印象的歌曲寥寥可數。不過,原來她一直沒有想過要放下歌手這身份,稍後更會主力出唱片,正式攻打內地市場,盼能憑國語碟在內地樂壇分一杯羹。「今次會出一張國語碟,碟內全部係情歌,希望可以成功打入內地市場。」她又透露有意找姊夫Julien 拍MV:「我已經一早預留了個位畀佢,不過仲要睇返歌曲中的意思,始終佢係我姊夫,沒理由叫佢同我演情侶咁亂倫啩?」

話雖如此,但Niki又不忙大讚姊夫:「我覺得 Julien 真係好有表演慾,拍MV應完全無問題,我有叫佢睇我套新劇,但佢睇唔明,所以我要另外再搵英文版畀佢睇。」問到Niki會否找在內地紅爆的舊愛鄭嘉穎任MV男主角時,Niki 即耍手兼擰頭:「唔啦! 其實我公司好多人在內地都有市場,好似任賢齊咁。又唔係同鄭嘉穎合唱,無啦啦搵佢拍MV好怪啫!」

不乏裙下之臣

Niki每次露面都總會被人追問拍拖問題,情況更已嚴重至連姊姊周汶錡也被牽連。她說:「家姊都成日畀人追問我幾時拍拖,問到佢好煩,搞到佢都問我究竟咩事。我同佢講叫佢唔好擔心,我有人追,只係姻緣運比較遲。」在過去數年,Niki身邊一直不乏追求者,過着正常女生的生活,不過因為種種因素未能成事。「我係有人追,但唔鍾意就無謂浪費大家時間啦!一直有同男仔約會,我係抱開放態度的,其實我要求好簡單,鍾意就得㗎喇!」

Niki續說:「不過要拍拖都要時間磨合相處,我好忙,好需要對方明白我工作模式,過時過節唔可以一齊過,時間唔穩定,試問有幾多人可以明白?」她又笑指身邊的朋友十分關心她的婚姻大事,經常為她穿針引線,比自己還要着急。「有時食飯會突然多了個陌生人,我心諗『唉…又咁老土啊! 』 我好明白大家為我擔心,但咁樣會令到我好唔自在。」

黃金剩女宣言

被列入「黃金剩女」大軍, Niki 直言有股無形壓力,但她明白感情是由上天安排。「視乎你點睇,我係盛放的『盛』,而好多人就覺得係剩下來的『剩』,可能我仲揀緊呢!我本人唔急結婚,劇入面都講到明 『唔嫁好過嫁錯』,。以前我會淨係掛住工作,但而家貴精不貴多,唔會去到咁盡。」

自從去年跟拍拖兩年的紗廠太子爺分手後,Niki一直單身至今,不過她絕不介意單身 :「單身有咩問題? 我唔怕畀人標籤我為剩女,仲已經開始習慣。愛情的確係重要,但無得強求。其他人成日話『你咁靚女點會無拖拍? 』其實愛情同外表係無關係的! 」現階段的Niki深深明白單身有單身的寂寞,但拍拖亦有拍拖的煩惱,所以不會再因為感情而影響自己的判斷力。

極品剩女 周麗淇

極品剩女 周麗淇