拋開遺憾勇往直前 黎耀祥祝願 2011開開心心

踏入2011年,送走2000年第一個10年, 回顧過去, 展望將來。到底2010年有甚麼憾事令眾藝人記憶猶新的, 未來他們又有何大計和心願呢?

黎耀祥

祝大家新的一年開開心心,2010年我最滿意的是拍了《義海豪情》這部精采絕倫的好戲。最遺憾嘅係佢卻失落咗「最佳劇集」嘅榮譽,因在公在私我都覺得佢係最佳嘅。2011年我就希望添哥、華標再度合作,當然唔少得我嗰份啦!」

祥仔期望拍更多好戲答謝Fans。

薛家燕

「最遺憾係我喺2010年去咗昆明六日旅行,諗住畀自己好好休息,點知當地有播我嘅節目,所以部分少數民族都認得我,佢哋成日圍住我,搞到我好似仲工作緊,希望2011年我真係可以唔受騷擾咁旅行,或者約埋幾個朋友去歐洲呢啲遠啲嘅地方。至於我開設嘅『家燕媽媽藝術中心』,依家仲係人手不足,一個人打理真係好辛苦,好彩有我個大女幫手,希望今年可以請多啲人手,製造就業機會。2011年,『家燕媽媽藝術中心』最快會喺深圳、東莞開分店,而上海、北京、中山亦都會陸續開。」

家燕姐喜帶着弟子勇闖內地。

張敬軒

「去年最滿意係創作了兩首歌《P.S I Love You》及《Deadline》,其實我都一段時間無親自創作,出來嘅效果大家都好喜歡。遺憾嘅係本來喺舊年10月尾推出自己有分創作的唱片,但因為我隻狗仔有事,再加上我身體不適,要將唱片延後推出。今年我好想去紐約進修音樂,還有就係箍牙成功,要練唱歌不漏風,哈哈!」

軒仔願身體健康,努力工作回報大家關心。

徐子珊

喺我嘅事業上,最遺憾係同我所屬嘅唱片公司完咗合約,因為呢段時間,唱片公司嘅同事幫咗我好多,幫我建立咗跳舞嘅形象,又吸納咗好多歌迷,除咗令我喺樂壇得到獎項之外,亦都令我真真正正鍾意咗唱歌,所以依家有時間,我都會繼續學唱歌同跳舞,增加舞台經驗,希望今年我可以再簽到唱片公司做歌手,將呢年學到嘅學以致用,但如果可以選擇的話,我都好希望可以再同呢班同事合作。

徐子珊夠可愛,坦承想做媽媽。

關楚耀

「舊年最滿意喺推出新專輯,喺碟入面自己第一次有分參與製作,當中有啲音樂部分係我自己彈,再加上出來的反應又不錯,真係好開心。最遺憾就喺養咗個多月的龜離開咗,唔知係唔係我買嘅燈唔啱佢,令佢好唔開心,我都將龜埋藏了,更寫了些東西去紀念牠。2011年希望有機會開一個大型的音樂會,當然也想有機會拍電影。」

關楚耀大家繼續支持我。

周柏豪

「我最遺憾是少時間陪家人,去年工作真的密麻麻,經常沒有時間留在家中或陪家人,其實爸爸只是住在隔籬那幢樓,偏偏一個月僅見面兩次,有時媽咪會煮了些我喜歡的食物送來我家,通常那些時間才會見到一會,所以希望新一年抽更多時間陪家人了。」2011年希望可以去到更多更遠的地方工作,擴闊市場,近年簽下的廣告合約都有不少在海外有市場,希望透過代言人身份,去到更多地方,讓更多觀眾認識自己了。」

周柏豪祝大家前程錦繡。

梁漢文

「剛過去的一年最遺憾的事是未能推出新的專輯,全年裏面不多自己的歌,踏入2011年希望可以出到新碟了。舅父(尹志強)的過身也算是一件遺憾事,始終他的病都經歷了一段時間,捱了這麼耐,其實自己都已經睇化,人總會面對這些事,本身都不想再提這件事,他的離開無疑令球迷失望,但相信他在球壇上的貢獻,大家是會銘記於心的。」踏入新一年,希望大家多啲用說話交流啦!可能近年資訊科技發達,每日都沉迷在網絡世界,其實好恐怖,因為連自己都是這樣,我見到許多朋友圍在一起,他們沒有對話沒有交流,每人手上只是拿着一部智能手機在把玩,可以一兩小時沒出聲,希望自己在新一年多與人溝通啦!」

梁漢文笑言望大家找到至愛。

薛凱琪

「過去一年我最遺憾係錯過收養兩頭BB流浪貓,因為BB貓最好玩就是頭兩至三個月。最滿意係透過歌曲《字花》可以面對之前不夠膽面對嘅恐懼回憶。今年我希望全心全意留在香港做音樂,呢個真係一個無咩可能嘅想法!仲有我希望開一個農莊收養所有流浪的小動物。」

薛凱琪以音樂分享愛心。

莊思敏

「舊年我最滿意係簽咗電影公司,初嘗踏上大銀幕的滋味,有份參演的《婚前試愛》成績都不俗,我希望可以下一步做影后,其實日日有工開,已經好開心!獎項就隨緣啦! 2010年最遺憾的事係因為工作排得太密,錯過咗欣賞偶像王菲喺內地開演唱會,好彩佢遲啲喺香港開演唱會,我已經託朋友訂飛啦!」

莊思敏望讀者新一年開心到飛起。

吳卓羲(Ron)

「2010年最滿意喺可以拍到新劇《抉宅男女》,喺角色同演繹上都有挑戰,同我之前演嘅角色好唔同,在戲中有很多感情位,我要喊到崩潰,最開心係導演睇完都滿意,而且還有驚喜,令我好開心,終於鬆了口氣。遺憾嘅係舊年家人同親戚都身體不舒服,媽咪仲要住院,加上因我工作忙陪不到佢,希望媽咪身體健康,我自己就嘗試不同嘅角色,想拍電影,當然還有再出唱片。」

吳卓羲新一年願大家克服挑戰創高峯。