新聞小花兩敗俱傷 文采爆喊 紫盈速逃
無綫互動新聞台女主播黃紫盈疑遭張文采欺壓，上周在鏡頭前悽然灑淚，據悉昨日眾主播為此被高層召返公司開大會，張文采被照完肺後爆喊，黃紫盈則強顏歡笑速逃，兩敗俱傷。因事件激起全城憐憫之心，被插爆大蝦細的高級記者張文采，則獲男友羅鈞滿及幕後同事出面反擊，力撐她沒耍手段博上位，並影射黃紫盈博上位不果施淚功。
張文采被高層「照肺」後 ，鏡頭前仍表現鎮定，未有如黃紫盈咁垂淚人前。至於黃紫盈，開完會後匆匆低頭離開。
張文采被照完肺後爆喊，並致電給友人爆喊哭訴，不過在鏡頭前，張文采仍照常報新聞及天氣。
聽講兩女噚日返工嗰陣，若無其事各自做嘢，但未有交談。成事件前日爆出嘅版本係張文采一早應承咗黃紫盈頂咗個五點半新聞簡報，但正式開始前十分鐘張文采先至反口、更以senior身份同黃紫盈講:「0依家唔係你話得唔得，係我叫你去做！」
點解兩女都唔肯頂咗個五點半新聞？據知係因為，互動新聞台主播沒有額外出鏡費，故兩女互相推搪不肯頂替因髮型問題未能出鏡的葉昇瓚，引發軒然大波。
幕後爆料： 張文采冇機心 黃紫盈態度囂
前日爆出張文采以senior身份欺壓黃紫盈後，噚日即有另一版本流出，為張文采鳴冤。先係有張文采男友羅鈞滿喺微博幫女友澄清，力證女友只係一個儍大姐，絕對唔會出賣同事爆大獲博上位，更加唔會施淚功以圖成名毀同事前途，臨尾更曲線寸黃紫盈謂:「淚，該向肚裡流。」
除咗羅鈞滿為張文采做人格證人外，有自稱喺無綫新聞部任職幕後工作嘅讀者亦向本報爆料，講出事件羅生門版本，該幕後人員說：「成班同事戥Wendy（張文采）唔抵，根本上件事係葉昇瓚個頭唔得，高層話睇吓邊個on duty，當時得黃紫盈喺位，高層叫佢幫手讀新聞，佢話唔得要錄段嘢，之後佢錄完出嚟都趕得切，嗰時Wendy返埋位，黃紫盈就叫Wendy讀，Wendy覺得一早叫咗你讀，點解叫番我讀，所以兩個有啲爭拗，但由始至終Wendy冇應承佢讀。」
該幕後人員又指，成件事可能兩女都有錯，但不存在欺壓：「幾年嚟新聞部同事都睇到邊個有野心，但嗰個完全唔係Wendy，佢冇機心唔係博上位，佢個人儍吓儍吓，相反黃紫盈平時態度有啲囂，唔係好有人緣，喺新聞部得人心一定係張文采，佢哋一直唔啱，但冇今次咁出面。」
之前黃紫盈曾報道關於陳振聰嘅新聞，相信佢本人亦萬料不到依家同陳振聰一齊成為新聞人物。
張文采都係天氣女郎，同黃紫盈一樣，深受宅男歡迎。
羅鈞滿微博