壹周刊 1059期

楊怡、吳卓羲等人揸住香四面拜，咁啱沈卓盈同鍾嘉欣、林淑敏三個唔拜得神嘅教徒企埋一齊傾偈，受晒！

同你吟一吟

鍾嘉欣沈卓盈受拜

2010年06月24日

無綫新劇《點解阿 Sir係阿 Sir》，星期一（廿一日）喺將軍澳電視城舉行開鏡儀式，主角陳豪、楊怡、鍾嘉欣等大班演員，喺監製劉家豪率軍下，一齊切豬做儀式。

拜神裝香化寶，祈求開工大吉，係娛樂圈指定動作，教徒例外，好似當日鍾嘉欣同沈卓盈咁，就企埋一邊，齋睇唔郁。
人各有志，但當楊怡同吳卓羲揸住香向四面拜，就搞到本來已經避開嘅鍾嘉欣同沈卓盈好尷尬！大家睇吓相，都知點解喇！真搞嘢！

監製劉家豪（箭嘴）同劇中一班演員一齊切豬，求拍攝順利。

趕劇冇得瞓，仲要分身幫 J2台做宣傳，吳卓羲全程按章工作，多啲都冇。

同你吟一吟

黃宗澤扮施丹搶分

2010年06月24日

上星期六（六月十九日），無綫數碼頻道 J2台播出嘅日韓劇《東方神球》喺九龍灣 Mega Box搞宣傳，負責唱劇集主題曲嘅黃宗澤、吳卓羲現身幫手造勢。

當日除咗有 JJ賈曉晨同陳蕊蕊幫拖，現場仲有唔少澤迷羲迷，攞住二人嘅名牌助威。兩邊 fans人數叮噹馬頭冇分輸贏，黃宗澤於是臨場加料，話自己最拿手係學有球王之稱嘅施丹帶波轉身。
講完示範，結果佢有佢轉，個波有個波碌，得啖笑，意料中事。拍檔交晒功課，但吳卓羲就好似紙板人咁，任黃宗澤做晒主角。唉， hea成咁，唔怪之得你密密有劇拍，都照舊谷極唔起啦！

黃宗澤唔理好醜，即場施丹上身，示範帶波轉身，咁賣力，抵高層錫！

澤迷羲迷兩邊人數差唔多，不分上下。