壹週刊 第1108期

娛頭

電話要脅分居　瞞夫炒樓　面臨撻訂　栢芝借財務半億

2011年06月02日
五月中，驚爆張栢芝不顧老公面子，熱情主動向淫照男主角陳冠希「機艙破冰」，令本已危在旦夕的婚姻即時破裂，怒不可遏的謝霆鋒，叫停律師轉移物業手續，且拒為栢芝慶祝三十一歲生日。

被霆鋒收回財政大權，冇得再擸錢落袋的栢芝愁爆開工，面臨家變外，原來之前她瞞住老公，摸頂以1.28億購入的世紀大廈頂層豪宅，亦因唔夠彈藥俾首期，撻訂在即，栢芝把心一橫，向財務撲水五千萬，要諗計箍煲又要借錢填氹，兩頭煩。

睇好樓市，栢芝四月以億二買入的世紀大廈頂層連天台單位作短炒，不過霆鋒閂水喉，她亦要撲水搵首期。

焗住開工

週一（五月三十日）有報導指霆鋒向栢芝發律師信提出離婚，翌日，霆鋒即透過經理人公司英皇發聲明否認。據了解，早前帶埋Lucas到台灣過生日的栢芝，曾發短訊及致電箍煲，但心淡霆鋒對她不聞不問。軟功失敗，栢芝改用硬功，致電留言向霆鋒提出正式分居作要脅，以為他會如以往般軟化，豈料此舉令霆鋒更為心死。

見霆鋒冇反應，日前臨時甩底電影《愛人影子》發布會避記者的栢芝，週日下午一時左右，現身深圳華僑城的茵特拉根房車酒店開工，戴着黑超的她，先到劇組所包下的三樓化妝換戲服，由於在戲中分飾兩角，張栢芝前後換了兩個造型，跟權相佑在走廊拍開心感情戲時，亦投入露出甜笑，不過鏡頭以外，總見她眉頭深鎖，就連在酒店等了一日的粉絲，亦被她黑面嚇走。

拍到晚上七時，權相佑先行離開，張栢芝繼續未完成的戲份，一個鐘後，她在工作人員陪同下，木無表情登上保母車，轉去另一地點再開工。

跟權相佑演情侶，栢芝在鏡頭前表現開心，跟鏡頭後完全兩個樣。

鏡頭外，愁爆的她木無表情，全程唔講嘢，其間只叫工作人員買麥當勞醫肚。

染指公司

據了解，張栢芝瞞住老公，主動與陳冠希在機艙修好被踢爆，令本來已經答應讓她掌管財政大權的謝霆鋒即時叫停，拒絕簽名將所有物業資產轉移，再度失去老公信任，識搵更識使的栢芝由於冇乜私己錢，以致今年四月中她以億二摸頂購入，用作短炒的世紀大廈頂層首期，亦唔夠錢支付。 「栢芝買咗層樓先知道銀行近排收緊按揭，層樓按唔到五成，仲差五千萬先完成單交易，佢本來諗住氹番掂霆鋒，就可以好似以前咁，由佢控制財權，到時就可以有錢俾首期。不過同陳冠希件事踢爆之後，霆鋒嬲得好緊要，唔肯喺文件上簽名，栢芝而家係發窮惡，近排仲問財務公司借錢，佢借五千萬，半年期，所以佢呢幾個月乜戲都接，都係唔想撻訂。」知情者說。 有指近年來終日為小事家嘈屋閉的張栢芝，一直為分身家逐步鋪排，每次鬧完交，都提出要將所有物業轉入以她是唯一受益人的基金，就連老爺名下的千萬豪宅，亦唔放過。即若果二人一旦離婚，張栢芝連老爺間屋都可以照收番。除咗物業，有指她連謝霆鋒跟朋友開嘅製作公司PO，亦提出分股份。

華僑城茵特拉根房車酒店

Qintus一歲生日，栢芝只將她跟兩個兒子慶祝的生日照放上網，事實霆鋒亦有請假回港慶祝，只不過在當日上午已飛走開工。

娘家撥火

栢芝處事無分寸，控制慾強，是夫妻關係逐步惡化的關鍵。但為免兩個仔在家嘈屋閉的環境下成長，霆鋒每每作出讓步啞忍，任由栢芝「陰乾」身家。不過栢芝卻變本加厲，令夫妻磨擦有增無減。 據知，與栢芝同住的家姐戴碧芝，唔勸交不特止，還煽動栢芝離婚，分老公幾億身家。

週一，拉姑跟老公被記者撞正在中環食雲吞麵，對於霆鋒栢芝婚變，一律冇回應，更叫記者唔好當佢犯人般跟到實。

今年四月，二人在金鐘行街碰上記者時已經貌合神離，昔日甜蜜拖到實的情況不復見。

跟老公冷戰的栢芝，早前只帶大仔Lucas到台灣過生日，且對追訪的傳媒透露沒收到霆鋒的禮物。

陳冠希早前在記者會上形容同栢芝「機艙破冰」感覺良好，但栢芝就因他言論，搞到家變，事後陳冠希即刻封口。

因遷就栢芝鍾意家庭生活，故婚後的霆鋒亦與一班朋友，如Big 4四子疏遠。

身家有距離

婚前婚後的謝霆鋒都係密密做，加上不時買樓買鋪，後期製作公司PO生意越做越大，至今每年有億萬營業額，還未計他長做長有的商演騷，單睇賬面，其身家估計高達五億。反之張栢芝早年雖有買樓保值，但統統在數年前放售套現千萬，花得七七八八。故年初復出的她博命接戲，復出吸金近六千萬。

「栢芝娘家支出唔少，成家人都洗腳唔抹腳，霆鋒唔想啲血汗錢再俾人亂fing，除咗繼續俾栢芝動用巨額家用供養父母，其餘細佬家姐都閂晒水喉。碧芝同栢文就成日趁栢芝一發作，就加把嘴煽風點火。好似上年栢芝有次帶住Lucas去台灣玩，點知去到Lucas發高燒，栢芝只係叫細佬栢文飛去台灣，幫佢接走Lucas返香港睇醫生，自己就繼續留喺台灣玩，霆鋒知道梗嬲啦，同栢芝嘈，佢啲家姐細佬就喺度撥火幫栢芝，嗰次搞到好僵。 「栢芝要面，成日俾屋企人撥兩撥，就主動嗌離婚，又成日威脅話帶埋兩個仔出走，霆鋒唔想兩個仔步佢後塵，喺破碎家庭長大，所以明知栢芝『趁火打劫』，佢都就範，栢芝要擸乜就俾乜，財政大權俾佢管，經理人事務都俾埋佢插手，總之保住頭家為大前提。」知情者說。

有指霆鋒送俾爸爸謝賢自住的千萬豪宅，都轉埋名栢芝。不過，呢位老爺錫新抱錫到出面，相信就算離婚收場，都應該唔會收屋趕老爺走。

 

栢文食價

明知栢芝顧家，娘家吸水手段個個耍家。據知，數月前栢芝託栢文買車，栢文連家姐都照食價。 「栢文幫栢芝買咗架二百萬，落地大約七年嘅二手Bentley，買咗一星期栢文就借咗去，仲一無回頭，佢同栢芝講話架車撞到散晒喎。後來發現栢文講大話，仲俾家姐喺網上查到架車原來只係百二萬，從中食咗八十萬，因為咁，栢芝都將佢打咗入冷宮。其實細佬夠膽咁做都係佢縱容慣，明知屋企人成日亂fing錢都繼續供水，成家都係睇錢重過親情。」知情者說。

前度鬧爆

前「風火海」成員朱永棠是張栢芝出道前的男友，早前重提這位前度，朱永棠形容如一場劫數。「當年同佢拍緊拖，係我叫阿哥（朱永龍）帶佢入行，做佢經理人。但未正式出道佢已經當我成家係提款機，成日問我攞錢幫補佢屋企。點知佢紅咗搵到錢就即刻起飛腳，搞到我哋成家要用晒副身家同佢打官司，最後贏咗但賠得好少，得不償失，識佢嗰日簡直係我惡夢嘅開始！」 至於另一舊愛鄭中基，據知早前跟栢芝在新片《無價之寶》重逢後，因頂唔順栢芝遲到早退，又嫌地方污糟要工作人員在地下鋪上紅白藍膠袋，才肯落場埋位的耍大牌行徑，鄭中基曾向友人提過，從此不想再跟栢芝合作。

霆鋒暫住四季

永遠對老婆退讓的霆鋒，去年底想買千萬豪宅送俾大仔Lucas，卻遭操控財權貼外家的栢芝拒絕，霆鋒發現勢色唔對，於是決定兩公婆財政獨立，栢芝為此經常借故發爛渣。今年三月底，栢芝發生交通意外前，霆鋒已經頂唔順老婆，一度搬到四季酒店暫住，讓緊張關係「過冷河」。之後栢芝亦帶個大仔入住陽明山莊，霆鋒更花過百萬，交晒一年租。至於成為兩公婆開火戰場的舂坎角億萬愛巢，據知霆鋒決定放售。 「霆鋒搬咗去四季住，係想大家冷靜，栢芝都知道玩大咗，試過走去搵霆鋒又跪又求情，易心軟嘅霆鋒，根本唔夠佢玩。好似三月頭兩公婆俾人影到喺跑馬地嘴，其實係栢芝發完爛渣又要擸嘢，見霆鋒肯應承佢就呵番老公，不過近年兩個關係差多過好。」 眼見霆鋒反被指逼老婆分居，拉姑的好友查小欣即時出手，在電台節目公開爆婚變內幕，「兩個出席金像獎前關係已經好差，兩個挽住手好恩愛咁現身只為顧全大局……當霆鋒手裡物業轉名轉得差不多時，栢芝就要求霆鋒將佢間賺大錢的後期製作公司股份都轉埋佢名下，栢芝好似想一鋪清霆鋒袋。佢哋復合當初，栢芝打俾我喊晒咁話佢好愛霆鋒，如果霆鋒唔要佢，唔知點算。估唔到事隔五年，今日栢芝對我嚟講好陌生。」

十年情路

鋒芝十年情路，經歷多番考驗。二人婚後一直表現恩愛，即使08年栢芝捲入慾照風波，霆鋒仍不離不棄，攜手共渡難關，以為一對金童玉女終能修成正果，近日竟傳出兩人婚變。

04年 鋒芝合作電影《無極》翻撻，霆鋒與王菲的戀情告一段落，栢芝與老外男友亦告分手。 06年 鋒芝雙雙出席上海蠟像館活動，在杭州高調拖手，正式復合。

06年9月 霆鋒刻意帶栢芝到菲律賓小島Pamalican旅行求婚，玩浪漫驚喜，並即時在當地秘密註冊，閃婚消息令拉姑激到喊，揚言「不認新抱」。 08年1月 栢芝捲入慾照風暴，一度傳出鋒芝鬧婚變，但謝家上下齊心撐栢芝。霆鋒堅定表示夫妻感情未受影響，因婚前已清楚栢芝為人。 00年8月 霆鋒30歲生日，發表愛的宣言，相士指他和栢芝命格刑剋，輕則惹官非，重則危及生命；和栢芝拍拖，試過撞車坐監，但他表示願意為愛去賭，且一生無悔！

11年4月 鋒芝出席金像獎，霆鋒拖實栢芝行紅地氈，恩愛甜蜜，霆鋒首奪影帝，栢芝更在台下感動得哭成淚人，但有指其實當時鋒芝關係已大不如前。