壹週刊 第1109期

娛頭

婆媳電話互片　栢芝粗口兇拉姑

2011年06月09日
張栢芝被踢爆在機艙向陳冠希示好後，隨即引發與老公謝霆鋒鬧婚變。二人一度透過律師聯絡，辦理離婚事宜，但最近卻傳出主動嗌離婚的栢芝忽然縮沙，更停止用短訊跟老公開火。 據知，栢芝之所以暫且「放下」霆鋒，是因要集中火力對付奶奶狄波拉。查小欣公開披露霆鋒被老婆逐步「陰乾」後，有傳栢芝認定奶奶是幕後黑手，並致電拉姑爆粗還拖；兩婆媳互片一輪，未下到火的栢芝還以兩個仔做籌碼，兇拉姑若再放料，就見孫無期。 橫紋刀遇上扭紋柴，兩婆媳鬥辣，其實有得揮。

先對付奶奶

有傳栢芝將會趁父親節，攜子到大馬向霆鋒箍煲，搏老公心軟。但據了解，由上月底鬧出婚變消息至今，雙方企硬零交流，夫妻關係並非如內地音樂人林錦亮日前在微博所說：回復對話有彎轉。 表面看似回復平靜，但其實栢芝並未就此罷休。暗裡起錨的栢芝，已將槍頭轉向奶奶拉姑。 自拉姑好友查小欣出手，在她主持的電台節目大爆栢芝部署搾乾霆鋒幾億身家後，據知栢芝曾私下跟朋友一口咬定，是拉姑背後發功。據了解，栢芝被爆惡行後㷫到爆，並致電拉姑，一輪瘋狂式發炮，當中更夾雜粗口，相當狠勁。 「拉姑一接電話，栢芝就一輪嘴係咁鬧，用粗口問佢係咪玩嘢，又話知係佢搞事（查小欣爆料），仲兇佢係咪想以後唔再見對孫！拉姑都唔係善男信女，栢芝鬧佢，拉姑亦喺電話還拖，不過鬧咗一句，就俾栢芝收佢線。霆鋒知道佢哋嘈過，但都無打去鬧番栢芝，費時挑起佢條筋，又唔知會搞啲乜。其實霆鋒好多朋友之前都見過栢芝發惡，係會講粗口鬧霆鋒，搞到自己老公喺朋友面前都好無面。」知情者說。

鋒芝變事件簿

霆鋒栢芝婚變，全城熱話，兩位主角至今未發一言，但有關婚變的進程及原因，卻像連續劇般日日有唔同版本。 18/5　栢芝被爆出和陳冠希（Edison）在母親節當日，坐同一班飛機由台灣返港，栢芝主動要求換位兼同對方合照自拍。栢芝的經理人代為否認，但Edison卻在公開活動上直認與栢芝破冰。 24/5　栢芝三十一歲生日，霆鋒留在大馬拍《逆戰》，罕有唔陪老婆慶祝，因為機艙事件激嬲老公的栢芝惟有帶着Lucas獨自飛台灣與好友慶生，因而傳出二人冷戰。 27/5　栢芝缺席《影子愛人》在深圳舉行的大型記者會，監製關錦鵬代為解畫，表示栢芝發生了不愉快事，並因電影角色為她帶來壓力，但會盡快說服她歸隊。 30/5　狄波拉好友查小欣在電台節目《巴巴閉邊個夠我查篤撐》中踢爆鋒芝婚變內幕，指二人於兩年前感情已出現問題，每次吵架，栢芝都會用兒子作籌碼，霆鋒為了一對兒子次次讓步，並陸續將名下物業轉名給她，為鋒芝婚變掀起高潮。 1/6　謝賢炮轟查小欣多事，沒有資格發言。

唔俾見孫仔

拉姑跟新抱電話互片後雖然好激氣，但擔心有兩個仔揸手的栢芝有異動，亦不敢輕舉妄動，未幾，便有報導指拉姑不滿查小欣擅自爆料，嬲了這位多年好友。 鬧完奶奶，栢芝仍未夠喉，勒令傭人不准拉姑接觸Lucas及Quintas，以示懲戒。「上個月頭，栢芝帶埋兩個仔搬去陽明山莊住，嗰陣佢同霆鋒關係已經好僵，但都仲俾拉姑見吓兩個孫，俾佢湊Qunitas返自己屋企。到查小欣爆料，拉姑就無得再見個孫。總之無論拉姑定係公開勸過栢芝要俾Lucas返學嘅婷婷，打俾照顧Lucas同Qunitas嘅工人，對方一係唔聽電話，就算聽都唔肯講佢哋喺邊，更加唔俾拉姑同Lucas傾電話。」 栢芝為避傳媒，刻意將兩個仔搬離陽明山莊，就連霆鋒司機，栢芝都無用。「所以依家拉姑根本唔知個孫住喺邊，栢芝咁做，擺明就係玩嘢！只有霆鋒同撐過佢嘅四哥（謝賢），仲可以打俾工人搵Lucas傾偈，不過佢哋都唔知三仔乸住喺邊。」知情者說。

4/6鬍鬚勇豪使 栢芝外家向來被指洗腳唔抹腳，胞弟豪龍同栢文經常換車，而久未露面的張父鬍鬚勇，上週六（四日）在發生栢芝婚變後，仍有心情到油麻地一間麻雀館打牌，且豪賭本色不改，據知當晚一場牌上落廿萬。

四哥拉姑嘈交

鋒芝鬧婚變，亦牽連到四哥跟拉姑吵大鑊。「四哥鬧拉姑唔應該將啲家事同外人講，搞到揚晒。不過自從佢知道栢芝想擸埋佢層樓，都無再喺人前撐栢芝。」 有指栢芝偏愛大仔Lucas，經常把他帶在身邊，對幼子Qunitas則愛理不理；據了解，去年誕下幼子後，栢芝與霆鋒的婚姻開始出現問題，部署「搵錢」大計的她更一口氣接下六部電影銀，照顧Qunitas的責任便落在嫲嫲身上。據知Qunitas出世以來，拉姑湊足九個月，她痛錫Qunitas比Lucas更甚，栢芝不准嫲孫見面，完全插中拉姑要害。

東亞傾公事

被陰招揭惡行後兩日，上週三（六月一日），在深圳拍攝關錦鵬電影《影子愛人》的栢芝忽然返港一轉，在經理人Emily陪同下，出現中環友邦金融中心，有指她是到林建岳旗的東亞娛樂傾公事。逗留個多小時後離開，戴着黑超的栢芝跟Emily在樓下傾了一會，全程顯得心事重重，笑容欠奉，之後，便坐上一架中港車，趕返深圳。 婚變搞到婆媳開片，被新抱兇爆的拉姑，上週四（二日）晚，由老公鬍鬚Kong陪住，在銅鑼灣利園逛街，記者上前追訪「鋒芝變」時，一聽到栢芝兩字，原本強顏歡笑的拉姑臉色一沉，「唔好問啦！」之後雙手合十，要求記者不要追問，便跟老公急急腳離開。 反之，身在大馬的霆鋒，無論面對婚變，老婆禁止拉姑見孫，依然保持喜怒不形於色，仍以一副chok樣，面對傳媒。

罐頭當飯食

栢芝有兩子在手，變成打橫行的籌碼，不過，經常帶住三歲Lucas出埠開工拍戲的栢芝，其實不太懂得照顧小朋友，有在片場的演員多次見她用罐頭粟米俾Lucas當飯食，大家看不過眼，亦開口勸她不要再帶埋兒子開工。 「Lucas經常跟栢芝入片場，雖然有工人喺現場幫佢睇仔，但小朋友一嗌肚餓就扭計，栢芝會叫工人攞罐頭粟米開俾Lucas食，成日都係咁，有人見過Lucas一日食幾罐當飯食，導演同演員見到，都忍唔住出聲，但栢芝竟然話：『佢鍾意食粟米，細路仔唔使咁多營養，夠飽就得啦！』做阿媽嘅都咁，我哋外人仲有乜好講。」知情者說。 唔識湊，但識得點用。王牌在手的栢芝，一度成功令霆鋒將物業逐步轉到她名下。近日更再爆出她從台灣返港後，將擸嘢行動升級，從四月份霆鋒開始在加埋她名的聯名戶口中，提走大部分現金，上月初趁住霆鋒人在大馬拍戲，更授權胞弟豪龍，以1.5億將舂坎角愛巢放盤。婚變令栢芝的私密越爆越多。

無理要求

由張栢芝、劉曉慶、周海媚及任賢齊主演，陳勳奇執導的《楊門女將之軍令如山》，將於本月在上海電影節內行紅地氈搞大型宣傳，為九月上畫造勢。據知，霸道見稱的栢芝一早向電影公司表明，如果要她出席的話，就要肯定只有她一個女主角出現，因為她才是「女一」，若果有其他女演員同場，她便不到場。栢芝不願與劉曉慶及其他演員同場而提出無理要求，最終被電影公司否決，她於是度定橋，向外宣稱因近日新聞纏身，為免喧賓奪主，已決定不出席電影宣傳。