壹週刊 第1117期
探熱針
舊愛郭政鴻再做老豆 滕麗名封口
2011年08月04日
奀星郭政鴻 09年被揭一腳踏兩船，同貌似前妻李欣穎的北方佳麗珠胎暗結，同時又與姐仔滕麗名撻着，加入賤男行列。
事隔年多，已經坐正的北方佳麗甚少公開露面，有指郭政鴻一直不願公開其身份，雖然唔見得光，但無損二人關係，上月中，四十七歲的郭政鴻又做老豆，生多個女。
由魏駿傑到郭政鴻，一而再被騙感情的滕麗名，終於有着落，同從事貿易生意的圈外男友蜜運半年，但為保戀情，阿滕仍死口不認：「你哋影到啲乜隨你，我係唔會認 o架！」
郭政鴻親口承認，老婆於上月為他再生多一個女。
鬼祟現身醫院
為方便「覓食」，郭政鴻隱瞞已婚真相，○七年同合作《野蠻奶奶大戰戈師奶》的滕麗名戲假情真。兩年後，他為秘密誕下的女兒申請回鄉證斷正，風流賬被踢爆，形象冇晒，二線小生即時打回原形做二打六。不過，同前妻李欣穎有八成似樣的現任郭太忍功了得，去年底，第二度為老公佗 B。
跟當年長女出世一樣，郭政鴻將再做老豆的喜事完全冚密。上月中，有人目睹他攞住行李，陪佗住巨肚的老婆現身九龍法國醫院（聖德肋撒醫院）。「嗰日見到個男人慌失失咁拖住個大肚婆行入嚟（醫院），個口罩戴到上眼袋咁滯，自然望多兩眼，原來係佢（郭政鴻），佢同個姑娘講咗兩句，就有人安排輪椅送個大肚婆上房，好似就嚟生得咁。」一名當日在醫院候診的病人爆料說。
據了解，郭太入院當日便誕下女兒，打後數日，亦有病人目睹郭政鴻一袋二袋現身病房，探望妻女。上月中，郭政鴻帶同長女與家人食飯，正在坐月的郭太生完細女，未有同行。
1/8
本週一下午六時，郭政鴻揸車返家接坐完月的太太及大女外出。
慌死被街坊認出的郭政鴻，卅幾度高溫下戴住口罩，開定車門等妻女上車。
坐在司機座位旁的郭太抱住大女，擰轉面避鏡頭。
粉麵醫肚唔夠喉，敦政鴻在門外買雜誌「加料」。
細女七磅六
本週一（八月一日），郭政鴻中午時分離開鑽石山住所，黃昏六時折返，並將 Benz停在住所大廈外，未幾，便見到頭戴黑帽，仍未收身的敦太，拖住長女出現；慌死被街坊認出的郭政鴻，在三十幾度高溫下，戴住口罩落車開門迎接妻女，之後一車人向九龍塘又一村方向駛去。警覺性極高的郭政鴻，發現被跟蹤後，將車停低在又一村，落車主動走向記者車。
郭：你哋邊間，做咩跟住我？
壹：恭喜晒，你太太又幫你生咗 BB喎？
郭：（愕然），笑一笑
壹：個 B女幾大？
郭：都出咗世成個月，重七磅六。
其間，記者上前影坐在司機位旁的郭太，唔想老婆見報的郭政鴻，立即阻止，郭太亦反應奇快，避開鏡頭，相當配合。
24/7
郭政鴻連日做湊仔公，抱住女兒外出醫肚，只見囡囡連鞋都冇著。
午飯過後郭政鴻女兒（箭嘴示）於家人的照顧下上車離開。
23/7
上月尾，郭政鴻（箭嘴示）帶同女兒與家人到九龍灣飲茶家庭樂，當然在坐月中的太太未有同行。
影到都唔認
舊愛郭政鴻兩度做老豆，當年唔知對方早有家室的滕麗名，中伏，以為郭政鴻能彌補與魏駿傑的九年情傷，搞到「無啦啦」做第三者，傷上加傷。事隔年多，滕麗名經朋友介紹認識做貿易生意的新男友，今年五月，兩人同遊泰國返港，更公然在機場電梯內卿卿我我；上星期，西裝男又做「跟得男友」，陪滕麗名 shopping。
發現記者影相，兩人有默契地彈開，各自搵路走，沿途兩人攞住電話密斟，兜路走接近五分鐘，見未能擺脫記者，二人決定放棄，再會合到 Cova飲 tea，歎茶一個鐘，才依依不捨同男友分道揚鑣。
經歷過魏駿傑及郭政鴻的教訓，滕麗名對新戀情高度戒備：「你哋影到啲乜隨你，我係唔會認 o架！」
從事貿易生意的西裝男，陪滕麗名到尖沙咀 shopping。
發現記者，兩人即彈開。
未能撇甩記者，滕麗名索性再會男友，按原定計劃，到 Cova high tea。
今年五月，滕麗名同男友外遊返港，在大庭廣眾下攬到實。
攞行李的粗重工作，男友一手包辦，有愛情滋潤的滕麗名，冧爆。
纏擾三年
與拍拖九年的魏駿傑分手後，滕麗名因拍劇與郭政鴻撻着，拍拖年多後，男方卻被踢爆與另一內地女子同居兼產女；阿滕要男方二擇一，奈何郭政鴻拖得就拖，令她變成第三者，拖拉多時，去年女方才決絕斬纜。
拍劇撻着
○七年二人拍《野蠻奶奶大戰戈師奶》撻着，二人死口唔認，但拍拖已是公開秘密。○八年以情侶檔再合作《桌球天王》，在戲中奉旨連環嘴嘴，出席宣傳活動更公開打情罵俏。
入屋
○八年被拍到男方到女方清水灣新居短聚，之後二人齊齊出席高層梁家樹大女婚宴，在阿姐汪明荃上載的大合照中，二人態度親暱面貼面，打風打唔甩。
踢爆
○九年九月，郭政鴻被爆背住阿滕跟一內地女子育有一名九個月大女兒，一家三口申請回鄉卡斷正。阿滕為保男方形象劃清界線：「我一直都係單身！」
三人行
去年二月，二人孖住出席婚宴，影大合照時，郭政鴻低頭避鏡，被指以假分手避傳媒耳目，實情是阿滕自男方妻兒曝光後，唔捨得斬纜。同年四月，有妻有女的郭政鴻被拍得深宵戴口罩竄入阿滕香閨，二人在車廂又喊又嘴，欲斷難斷。
斬纜
去年八月，郭政鴻接妻兒來港與他生活，並公然一家行街晒幸福，阿滕無奈在去年尾與郭一刀兩斷。
滕麗名發火鬧爆郭政鴻
噚日有消息話郭政鴻上個月又做老竇，貌似佢前妻嘅李欣穎幫佢生多個女，同時又話同郭傳緋聞嘅滕麗名同個做貿易生意嘅新男友拍拖半年，但滕滕死口唔認，佢噚日喺微博鬧人：「某人~~別再長年累月地借我做宣傳了，容忍有限度。」矛頭直指郭政鴻，滕滕喺電話度話：「唔想講唔想俾人有機會亂寫，圈內定圈外人我都唔會講，其實我又唔係嬲，只係次次都係咁，始終容忍都有個限度。」