甄子丹葉偉信唔玩 葉問3D換角換導演

壹週刊 第1209期

08年黃百鳴打頭陣開拍葉問題材電影,中港票房大旺,更掀起《葉問》熱潮,令負責操刀的葉偉信變成搶手導演,主角宇宙最強甄子丹更加變成影壇吸金王,單計去年,收入高達 1.44億港元,登上福布斯中國名人收入榜首。

過去一手打造的《家有囍事》系列可以跨逾世紀,黃百鳴有意將《葉問》變成另一作品系列,並繼續以甄子丹加導演葉偉信的黃金組合出擊,七月開拍《葉問 3D》。但近日盛傳葉偉信跟黃百鳴講唔掂數,兄弟班的甄子丹要跟葉偉信共同進退,這個夢幻組合的尾水《葉問 3D》告吹。

老闆黃百鳴、葉偉信加甄子丹組合的《葉問》 1、 2集,在中港票房成績斐然。
老闆黃百鳴、葉偉信加甄子丹組合的《葉問》 1、 2集,在中港票房成績斐然。


《葉問 2》
香港票房: 4300萬
內地票房: 2.3億

《葉問》
香港票房: 2500萬
內地票房: 1億

一代詠春宗師葉問的生平事迹,令影壇掀起熱潮多年。

投者打退堂鼓

食過翻尋味!黃百鳴無懼過去五年來,這個宗師題材已拍得七七八八,今年初向外宣布,以旗下的天馬影視,斥資 1.5億,甄子丹膽拖葉偉信組合上陣,計劃今年七月,開拍第三集 3D版,拍攝場地亦定好在杭州下城區「杭州新天地」,並會將該處打造出一條香港五六十年代風情的老街,取名葉問街,同時,籌備音樂劇版,延續葉問潮。
七月將至,但新片大計卻變得無厘聲氣。有傳因黃秋生擔正的《葉問終極篇》在內地票房滑鐵廬,打爛《葉問》票房神話,連累《葉問 3D》開拍有阻滯;《葉問》潮退,嚇退《葉問 3D》部分的內地投資者,開始打退堂鼓。
資金大縮,有指要為《葉問》資金墊底的黃百鳴,要求導演葉偉信睇餸食飯;但珠玉在前,就算加埋李小龍情節, 3D特效不能少,葉偉信唔想打爛《葉問》神話招牌,左計右計,預算同黃百鳴心目中的數仍有距離,雙方拉鋸半年,至今仍在膠着狀態,葉偉信堅持,唔夠錢,唔拍!


葉偉信:未決定
求證葉偉信,佢話接唔接拍,仍未決定。「仲傾緊,因為都要睇有冇新元素同配唔配合到先決定。」

因推拍《葉問 3》,故甄子丹下半年時間接拍另一套電影外,亦同老婆汪詩詩着手搞與林建岳合辦的電影新公司「 Super Hero」。

黃百鳴的女兒 Alvina說:「如果甄子丹真係唔拍,我哋會考慮換人!」

《葉問》奪得 09年金像獎最佳電影,甄子丹同葉偉信亦同獲提名影帝及最佳導演。

冇葉偉信唔拍

講唔掂葉偉信,要睇餸食飯的黃百鳴決定轉陣,由《葉問》第一集做編劇的兒子黃子桓頂上導演位,並由 3D變 2D遷就不足資金。但黃金組合二缺一,本來肯再拍續集的甄子丹,頓失信心。
葉偉信唔玩,宇宙最強亦決定跟兄弟共同進退。正在拍《 3D冰封俠》的甄子丹,早前被問到何時開拍《葉問 3D》時,一句:「我等緊葉偉信 readly!」為《葉問 3D》合作告吹漏了口風。
「葉偉信唔肯拍,仲接咗內地一套大製作電影《鍾馗》,檔期由依家前期做到出年。冇咗葉偉信,堅持開拍嘅黃百鳴換導演,亦希望甄子丹肯留低拍。但佢哋兄弟班唔可以二缺一,所以甄子丹下半年接咗陳德森部戲,唔拍《葉問 3》。」知情者說。
有關 3D版告吹,甄子丹發言人張小姐說:「子丹同百鳴哥合作咁多年,關係好好。但《葉問》去到第 3集,要保持水準唔係易事,壓力亦愈來愈大,所以子丹要有足夠嘅信心先會拍。而佢嘅信心亦係來自葉偉信,所以子丹拍《葉問 3》大前提一定要係葉偉信做導演。」
萬一陣容變,黃百鳴的女兒 Alvina說:「我哋係上市公司,簽晒約,無論陣容係點都一定開拍。」

葉問票房

數年來《葉問》熱潮,令該題材電影如雨後春筍,不過掛住「葉問」招牌唔一定係票房保證,有上有落。

一代宗師

今年上映

主角:梁朝偉
導演:王家衞
票房港: 2千萬
中: 2.8億

葉問前傳

10年上映

主角:杜宇航
導演:邱禮濤
票房港: 680萬
中: 1600萬

葉問終極一戰

今年上映

主角:黃秋生
導演:邱禮濤
票房港: 850萬
中: 1080萬