壹週刊 第1209期

陳山聰跟何超雲拍拖兩年多，上月開始上演分手連續劇，先有陳山聰發窮惡爆粗鬧女友招致四失，其後趁超雲抱恙飛英箍煲，被指箍煲失敗的他，上週六隻身飛返香港，打回原形住舊居，「四失」零收入要搵朋友打救。

據了解，原來小聰子飛英服侍超雲女王後，已死纏復合成功，不過火速被氹掂的超雲落唔到台，於是重新自編自導自演一幕假分手，何陳山聰接柯打，轉玩地下情扮折墮。

分手返港扮謙卑

緊戴 Cartier情侶錶

自編自導自演

上週六（五月四日），飛倫敦箍煲三星期的陳山聰回歸。到港當日，超雲校啱時間，開始鋪排假分手大龍鳳，先在 fb及微博公布單身劃清界線，將男友降級為好朋友，又公開叫大家「俾私人空間陳生」，攞彩兼攞分。為配合女友自編自導自演的分手煙幕，陳山聰一反常態唔再龜縮，跟超雲同遊葡萄牙後曬得一身古銅色的他，罕有企定定在機場接受訪問，澄清沒有欠大筆卡數，又再三強調「沒有講過結婚」。
一切照足超雲編排的劇情發展，喪失何家準女婿特權後，不再有車有司機接送出入，陳山聰借用朋友七人車，返回昔日未升呢時的九龍灣麗晶花園舊居，全程扮折墮。

做足大龍鳳黐朋友車坐

返平民舊居陳山聰分手後扮慘，除坐朋友車由機場返屋企，貶為平民的他，更特登帶記者返九龍灣舊居，俾人知道他已打回原形。

去埋西班牙

據了解，陳山聰四月中飛倫敦箍煲成功，但食回頭草事件曝光後，一直在微博表現情傷的超雲即時冇晒面。
「佢介意外面嘅人點睇，之前有網民笑佢著衫唔掂扮潮人，佢都接受唔到，今次咁快就被人踢爆同番山聰一齊，佢驚俾人笑，所以先編咗呢個箍煲失敗嘅古仔出嚟。山聰冇所謂喎，咪當做戲咁做囉！身邊朋友都知佢哋復合之後去咗好多地方玩，除咗葡萄牙又去埋西班牙，全部係陽光海灘，兩個人仲係好好。」二人身邊朋友說。
翻撻後，二人本計劃五月二日一齊由倫敦返港，但為免再被影到相淪為笑柄，陳山聰改在五月三日離開，而超雲則延遲至五月七日起程，前後腳走人；據知陳山聰離開倫敦前，依然住在超雲豪宅，二人經常玩煮飯仔，女方又用專車送男友到機場，足證關係未變。

對超雲跟陳山聰分手一事，三太近來全程封嘴未有回應。

4月中，陳山聰飛倫敦箍煲成功，被踢爆火速食回頭草的超雲，為要好落台，再度計扮假分手。

兩年前宣布拍拖，超雲就特登拖住陳山聰出席 Gucci時裝騷，在活動中大搶風頭。

另一版本：蘋果日報

超雲返港笑對山聰拍脫戲

超雲平復失戀心情後，昨午由倫敦回港，有兩男一女來接機，超雲淡定面對傳媒，叮囑爭位追訪的記者小心，傳媒追問她感情狀況，她說：「我冇回應，o依家趕返屋企見爹哋媽咪。我係趕返嚟陪媽咪過母親節。」記者追問是否假分手？是否為山聰還清債務及以後會否帶眼識人？超雲詐聽不見，偏偏問到有指山聰獲邀以一百萬酬勞拍脫戲，超雲聽後即面露笑容。臨上平治房車，超雲不忘風騷360度轉身讓記者影個夠，然後直返屋企。

一直有傳雲山戀為錢分手，據知山聰當日到英國箍煲差點成功，兩人才結伴到葡萄牙重遊熱戀舊地，超雲每月約有數十萬家族基金及無限額信用卡做零用錢，不過三太陳婉珍不贊成雲山復合，有見催她回港無效便閂水喉，零用縮水及信用卡變為有限額，超雲曾要求山聰支付部份開支，但他以沒錢拒絕，結果吵大鑊，復合撻Q。超雲速撇山聰，昨日收拾心情回港跟父母團聚。