無綫3招救《金枝慾孽貳》鄧萃雯拒做媒罷宣傳

壹週刊 第1209期

恃住有慣性收視,在電視業界打橫行的 TVB,「收視神話」終於幻滅,在毫無對手情況下,兩套由視帝視后擔正的重頭劇《神探高倫布》及《金枝慾孽貳》,齊齊仆直,收視跌到徘徊二十點邊緣,《金枝貳》更試過低見十九點。

收視跌得如此慘烈, TVB諗盡辦法救亡,翻炒舊橋利用不和是非造新聞、密集式曝光谷宣傳、無限劇透引觀眾,希望刺激收視可以起死回生。不過身為女主角,靈魂人物如妃鄧萃雯就一於少理,拒絕再為《金枝貳》宣傳,話之佢死。

無綫3招救《金枝慾孽貳》鄧萃雯拒做媒罷宣傳
本宮都無能為力!(設計對白)

創收視新低


如妃由奸變成大好人,鄧萃雯冇得發揮,是收視仆直的致命傷。

近年 TVB的收視差極都保持到廿五點(每點收視觀眾人數為六萬四千二)死線,但動用了金牌監製及視帝、視后主演的兩套重頭劇《神探高倫布》及《金枝慾孽貳》,竟然收視瘋狂插水,跌到平均只有廿二點(《神》劇)及廿一點(《金》劇),《金枝貳》更試過穿二十點關口,在上週三(五月一日)九時四十五分至十時的一節,陳豪獨腳戲唱崑曲及如妃鄧萃雯欣賞兩位不知名演員唱崑曲一幕,收視更跌至十九點。

《金枝貳》收視死因,除了節奏慢、角色太多太複雜,對白長而難明,加上除了陳豪、鄧萃雯、伍詠薇及蔡少芬有演技外,其餘做宮女、嬤嬤的配角如苟芸慧、葉翠翠等,講對白似背書,又欠缺面部表情,令整套劇扣晒分。

雪上加霜,欠缺第一集的佘詩曼、張可頤及黎姿三位經典人物,觀眾最入心入肺的爾虞我詐橋段、心狠手辣及後宮爭寵劇情,今集通通欠奉,變成謠言散播橋段,全部都係得把口齋噏,無任何令人睇得肉緊的場面,沉悶非常。

谷底一幕

上星期三( 1/5)有一個時段只有十九點收視,就係陳豪獨腳戲唱崑曲,同如妃睇崑曲,似乎觀眾唔多欣賞崑曲。


三招救亡


戲中有大量宮女同嬤嬤配角,但多數都交唔到戲,好似葉翠翠零演技,同蔡少芬交流唔到。

為了向觀眾及廣告商有所交代, TVB曾諗計救亡,企圖谷得一點得一點。

第一招:狂谷!採用密集式宣傳計劃,每星期起碼有一個大型公開活動,安排不同演員做報紙雜誌、電台訪問,增加曝光。第二招:視透!監製戚其義原意是保持劇集神秘,嚴禁演員透露劇情,但觀眾一致意見睇極唔明,唯有臨時臨急搵演員在播出前講解每集重點,並讓傳媒刊登未來一星期劇情及畫面,希望劇透可引起觀眾興趣。

第三招:是非!○三年出街的《金枝》,戲內一班妃嬪爭寵大爆,除了戲外四位女主角不和是非,同樣引人入勝,所以 TVB照辦煮碗,將伍詠薇及鄧萃雯擺上枱,刻意製造公司偏重伍詠薇,無叫鄧萃雯出席宣傳活動,營造不和傳聞。

可惜鄧萃雯一於少理,拋下一句:「吓!關我乜事?」跟住更拒絕出席往後《金枝貳》所有宣傳,省得與伍詠薇同場造新聞炒作,連原本應承好做的專訪,也臨時全部取消,拒為《金枝貳》急救。

俾面出兩次


17/4原本好樂意做宣傳的鄧萃雯,有出席頭兩次宣傳活動。

21/4TVB表示因為鄧萃雯不在港所以缺席宣傳,但鄧萃雯就話由頭到尾都冇人叫她出席宣傳活動,都唔知邊個真定夾埋造新聞。

連甩三次底


22/4

30/4

4/5首播後劣評如潮,鄧萃雯即時劃清界線,沒有現身任何《金枝》活動,連戚其義安排食飯睇首播( 22/4)都唔到。

上星期出席慈善活動,鄧萃雯大唱反調,公然踩套劇連佢都睇唔明,「零劇本梗係唔明,睇唔明就預咗!」