壹週刊 第1215期
在法國圓婚返港後，新郎陳豪默認老婆陳茵媺有喜，被幸福由頭冚到落腳的他，肉麻到公開承諾將所有嘢俾晒老婆，甚至當眾高呼：「 She is my queen！」一時間，筍盤進階成為全港最幸福男人！
至於分屬陳豪舊愛的廖碧兒，當年因為拜金劈腿，變相親手造就了陳豪、陳茵媺這對佳偶，如今人財形象三失，更被指腳頭唔好，跟她分手的男人，個個有更好下場。被放逐到大陸搵食的廖碧兒，港男唔敢埋身，淪落到溝國產同胞。
同男伴離開餐廳時，廖碧兒十分小心，四圍張望。
換錯「豪宅」
廖碧兒持有陳豪這個筍盤長達六年，直至一○年遇上富二代林忠豪，以為釣到金龜，竟然一腳踏兩船，背住陳豪偷食。事件張揚後，一心嫁入豪門的廖碧兒，索性飛甩陳豪，點知有眼無珠，落錯注將縮水樓當豪宅，發現林忠豪是空心老倌，屋企無錢過手的失匙夾萬後，廖碧兒即時斬纜。
廖碧兒一個極錯決定，造就了陳豪陳茵媺這對天作之合，雙囍臨門獲全港祝福，誤「作媒」的拜金女，一時間，人又無錢又無，連形象都輸埋，過去兩年多，一跌不起，只好返大陸搵食，即使淪為大配角，亦逆來順受。
根據往績，同廖碧兒分手後的男人，個個幸福有好下場，令她被認定為腳頭差，自從跟林忠豪分手後，香港男人唔敢「高攀」之餘，拜金廖碧兒無人吼，只好將溝仔陣地同事業一齊轉移到內地。
陳茵媺在微博宣布婚訊當日，廖碧兒都有留言恭喜。
落簾開餐廖碧兒同大隻男在餐廳食飯，都好神秘要落簾進行。
鬼祟開餐
最近廖碧兒在橫店拍攝電視劇《吉祥天寶》，同劇演員有元華及王喜，二人均不是拜金女杯茶，廖碧兒冇嘢好揀，向一名幕後肌肉男埋手。
陳豪巴黎圓婚外揚前一個星期（六月五日），人在橫店的廖碧兒傍晚收工，換過便服後，由劇組車送到當地的「胖子火鍋」，同行還有她貼身女助手，二人選擇坐在餐廳最隱蔽角落卡位，其間廖碧兒未停過發短訊，約十分鐘後，大隻男便出現，一入到餐廳，完全唔使周圍搵，對方已知道廖碧兒坐在什麼位置。
大隻男一坐低，廖碧兒即時吩咐餐廳職員將布簾拉低，將原本隱蔽卡位變成包廂，記者從半透明布簾望到內裡情況，大隻男負責點菜，又不時問廖碧兒有什麼想食。兩人用普通話對話，由於廖碧兒普通話非常半桶水，聽唔明或唔識講的，便由助手做翻譯。雖然有點雞同鴨講，但兩人傾得十分投契，廖碧兒更不時做出冧笑嘟嘴表情，狂向大隻男放電。
分頭返房
撐枱腳兩小時，埋單二百幾蚊，大隻男負責請客。離開火鍋店時，廖碧兒再度提高警覺，一出門口便四圍望，更與原本一齊行的大隻男保持距離，她與助手上劇組車，大隻男則步行十分鐘，分頭返回國貿酒店。兩人同住酒店十二樓，卻刻意唔一齊同車，玩前後腳。
陪食的大隻男年約三十多歲，雖然高大，但打扮相當國產，運動服加背囊，甚至將外套綁在腰間，身上所穿的白色 V領 T恤，遠睇以為是 CK（ Calvin Klein），近睇原來係 GK（ Galvin Kelin）扮 CK，混水摸魚，完全無法想像，釣金龜為人生目標的廖碧兒，會如此淪落。
廖碧兒掉低大隻男，自己坐車返酒店，而大隻男就要步行十分鐘。
返到酒店，兩人同住在十二樓。
帶旺前度
近日被網民揶揄專「帶旺前度」的廖碧兒，個個跟她分手後，都搵到更好的另一半，當中包括劉愷威、林忠豪、陳豪，全部活得比她好！
劉愷威（旺旺）
01年，與劉愷威拍《皆大歡喜》撻着，當時廖碧兒正值當紅期，是無綫力捧花旦，相反，劉愷威的事業全無起色，在劇集中做閒角，之後過檔亞視亦無起色，二人距離愈來愈遠， 04年終分手。近年，劉愷威轉戰內地，前年搭上中國四大花旦之一的楊冪，人氣身價齊升，更成為內地一線小生，年賺過千萬。
陳豪（旺旺旺）
04年，廖碧兒狠撇劉愷威後，與陳豪合作《妙手仁心 3》擦出愛火，二人低調拍拖多年，直至 10年廖碧兒被篤爆背陳豪搭上林忠豪，六年情玩完。分手後，「好男人」陳豪，成為廣告客搶手貨，一年接五個廣告，進賬千萬，加上與陳茵媺戀情獲全城祝福，「情侶檔」 35萬孖咇吸金，一樣長搵長有，事業愛情得意，近日奉子成婚，雙喜臨門。
林忠豪（旺旺）
10年，廖碧兒黐上李嘉誠胞妹兒子林忠豪，拍拖唔夠一年即分手。有傳林忠豪現已搭上內地著名建築家女兒 Carol，更出動三卡鑽戒追求，又承認對方是結婚對象。此外，有指林忠豪的公司，最近成功包下大型超市的燈飾工程，豬籠入水。
扮失憶
曾經風光的廖碧兒，經歷拜金失敗教訓，三十四歲賣剩蔗，檔次直插，霉到溝大陸仔，星期二（十八日），廖碧兒現身有線活動時，有關大隻男新歡，死口唔認。
壹：記者
廖：廖碧兒
壹：有網民笑你，啲男人一同你分手，就有好結果！
廖：我唔知，冇為意，亦都唔會唔開心。
壹：會唔會覺得錯過咗陳豪呢個筍盤？
廖：唔覺得，大家都唔同步，最緊要搵到啱嘅人。
壹：依家擇偶條件係點？
廖：最好高過我少少，鍾意小朋友同狗仔啦！
壹：使唔使有錢？
廖：唔使喎，真係唔使！
壹：最近有冇拍拖？
廖：不斷都有正常咁識男仔，我要留番最好嘅自己俾真正嘅另一半。
壹：我哋影到你喺橫店同個大隻男撐枱腳，佢係你新男友？
廖：（原本笑容滿面，突然變到口窒窒）我哋劇組每日食飯都有四圍枱，你哋影到我咁啱同個男人食飯咋！
壹：嗰日得你哋同個助手，仲拉埋簾喎！
廖：冇呀！係咪套劇個老闆，你哋有冇相俾我睇先，有相我再答你啦！
手繩催姻緣
情路唔順的廖碧兒，最近被發現右手戴了三色繩，用來催旺姻緣。
當陳豪公布婚訊後，廖碧兒愁爆，更去了搵盲人按摩，舒緩一下。
開工時，廖碧兒多數與同樣來自香港的元華及王喜食飯。
11年初廖碧兒用母親名買了譽港灣一個六百幾呎單位，但因為收入大減，被迫在 12年 2月賣樓，賬面只微賺 61萬。（《蘋果日報》圖片）
當年被廖碧兒嫌棄唔紅又冇錢的劉愷威，近年成為內地當紅小生，更與靚花旦楊冪拍拖，並送她一層三千萬香港半山豪宅。（《蘋果日報》圖片）