反轉豬肚 明挖林峯 無綫冰封英皇人

壹週刊 第1215期

自去年失落視帝,有指林峯因為心灰意冷,決定年底約滿無綫後向外闖,除堅持接拍 NOW有份投資的電視劇,近日更跟英皇密密斟。雖然未正式落筆,但無綫對英皇明撬頭號親生仔,就算過往關係幾好都無情講,高層下旨將英皇藝人踢出所有大騷外,約滿後過英皇的藝人亦要提早冰封,以示懲戒。

招兵買馬

無綫一手捧紅的小生花旦近兩年紛紛跳船離巢,就連飲無綫奶大的林峯,自去年失落視帝後,便高調放風嗌走人,對娘家毫無留戀。據了解,今年初成立新經理人部門,積極招兵買馬的英皇娛樂,除成功撬走惠英紅,本來跟無綫合作無間的劉松仁及米雪也相繼過檔,除了一眾資深藝人,英皇亦睇中林峯,以投資億元製作電影作招徠,硬撬無綫頭號親生仔。

「有幾間公司都有斟林峯,好似太陽娛樂同黃百鳴,對佢都好有興趣,但英皇開嘅條件就比較全面,除講明主打幫佢開拓內地市場、出國語碟外,最吸引係會投資大電影俾佢做男主角,英皇仲話可以俾佢有自主權,如果林峯想開一個新 label俾自己都冇問題。其實佢哋已經傾緊細節內容,如無意外,林峯走硬。」知情者說。



黃百鳴近年開拍的電影都預埋林峯,亦有意簽他做親生仔,跟吳千語情侶檔發展。

為要氹林峯留娘家,無綫放他今年到內地拍劇搵真銀。

林峯早已被英皇視為一家人,今年初出席完港台《中文金曲》頒獎禮後,他跟大隊出席慶功宴。

打入冷宮

林峯要走,無綫先以《最受歡迎男歌星》獎項安撫,並順其意願,停接無綫劇,全年留在內地搵真銀,樂易玲甚至出絕招,拍心口安排林峯明年跟影帝梁家輝合作拍劇。一次過滿足林峯三大願望,但留人行動,據知現階段英皇依然佔盡上風。

英皇硬搶,無綫近日開始還以顏色:「除咗林峯,無綫仲收到風搵過陳法拉,老中青都撬,上個月無綫開始做嘢,五月公益金大騷,安排關係和好嘅四大歌手上去表演,偏偏一個英皇藝人都冇,大哥(英皇高層吳雨)有嘈過,但最後不了了之。」知情者說。

無綫冰封英皇人,據了解,就連出身「巨聲幫」,由無綫一手拉攏跟英皇簽歌星約的新人馮允謙( Jay),亦被打入冷宮。

「阿 Jay唱得,英皇一早睇中佢, Jay打算約滿無綫後過檔做英皇人,無綫收到風,所以公司而家停晒佢所有工作,自己人都無情講。」知情者說。
惠英紅前兩年連掃多個影后獎,據知不滿有 TVB高層為要她續約,傾廣告時從中作梗,以致她損失數百萬。

無綫一直有斟劉松仁簽經理人合約,不過他最後選擇做英皇人。

無綫新劇《貓屎媽媽》搵過檔英皇的米雪孭飛做女主角,據知因米雪跟該劇監製關係友好,早已答應幫手。
馮允謙(左一)跟許廷鏗、林欣彤及胡鴻鈞都是巨聲幫出身,前年獲獎即被英皇??中簽歌星約。
馮允謙(左一)跟許廷鏗、林欣彤及胡鴻鈞都是巨聲幫出身,前年獲獎即被英皇??中簽歌星約。

又愛又恨

無綫未與四大破冰前,英皇在《勁歌》總選攞到唔少獎。

09年無綫發生「四大事件」,英皇幾乎包起所有無綫大小騷,派歌手撐場,雪中送炭,令無綫、英皇關係親上加親。

直至曾志偉愛將余詠珊入主無綫,安排其夫打骰的星煥唱片歌手亮相,大大攤薄英皇歌手的出鏡率,像去年譚詠麟與杜麗莎在無綫搞音樂特輯,演出嘉賓大多數是星煥歌手,令英皇大感不滿,加上最近跟四大破冰,無綫有本錢打完齋唔要和尚。英皇與無綫關係從此甜蜜不再。