壹週刊 第1220期

無綫靠《衝上雲霄 II》一洗收視連仆頹風，劇中男主角張智霖（ Chilam）亦憑「 Cool魔」率先爆出，成為全城焦點！八月就步入四十二歲的 Chilam，面上搵唔到一條皺紋，如同食了防腐劑；著上機師制服，簡直靚仔到無朋友，完全將五十一歲，皺晒的 Sam哥吳鎮宇比下去。

上星期 Chilam同老婆袁詠儀（靚靚）帶埋兒子張慕童（魔童）到新加坡度假，被影到剝衫游泳 look，解除機師制服後，中坑腩暴現，比起拍《衝II》時肥近二十磅，制服誘惑，迅即幻滅。

絕對可以 fit得起的 Chilam之有此一日，全靠靚靚「箍魔」上身，向老公施展四大辣招，箍緊老公，慎防他有機作反。

18/7
Chilam一家三口由新加坡返港，沒有化妝的靚靚十足師奶，但原來靚靚比 Chilam細七日。

港女瘋狂

人氣劇不負所望，《衝上雲霄 II》播映首週，已經引起極大回響，收視更暫時是本年度最高，平均三十一點（約二百萬人）收看，最高更衝到上三十五點（約二百二十萬人），當中以新加入角色，飾演風流機師「 Cool魔」 Captain Cool最矚目！一出場，已經引起港女瘋狂，連續一星期，在 Facebook狂貼 Chilam機師相洗版，對即將四十二歲，仍保持一副童顏的 Chilam，讚到天上有地下無。
劇中 Chilam賣有型外，更不時賣肉吸睛，又出浴又床上戲，大騷結實身形。上星期，看似弗爆的 Chilam舉家到新加坡旅行，其間曾到全球最大 S.E.A海洋館參觀， Chilam與囝囝更落水同魔鬼魚一齊游水，不過，眼前半裸上身的 Chilam，與《衝上 II》劇中所見的鋼條身形完全兩回事，就算企直，腰腹位明顯有兩截腩肉，忽然變中佬。

最新腩圖
Chilam與囝囝同魔鬼魚游水，冇著衫的 Chilam，竟然有腩肉纏身，令到一眾女人完美幻想破滅。

在新加坡 Chilam兩父子一齊玩水上活動， Chilam教識魔童玩 wakeboard。

「 Cool魔」魅力沒法擋，一落機就有 fans要求影相，但靚靚就喺背面睥到行。

中年漏氣

41歲的張智霖，個樣如食咗防腐劑多年不老，入行廿多年，保持住童顏，但 keep唔住當年的鋼條身形。

98年
27歲，身上雖然零肌肉，但總算冇肚腩，身材見得人。

01年
30歲拍攝劇集《談判專家》，穿上泳褲的他在沙灘晒排骨，身上幾乎零脂肪。

06年
替名攝影師 Leslie Kee影慈善攝影集，赤裸上身兼露毛，身形健碩。

11年
入行 20年首次在紅館舉行個唱，當時日操夜操的他，苦練出六嚿腹肌， fit到漏。

谷肥廿磅

由靚仔機師激變中坑腩，其實並非 Chilam個人意願，老婆靚靚絕對有份「悉心」安排。即使靚靚比老公後生七日，但自從生完魔童後，無論體形同樣貌，都成為師奶格，靚絕電視城的港姐冠軍風光不再，為免同老公外形相距太遠，向 Chilam做手腳，是方法之一。
「個老公靚仔，阿靚一向都知好多女人會主動送埋身，雖然 Chilam乖咗好多，但在寧可殺錯冇放過大前提下，當 Chilam拍完《衝 II》之後，阿靚就唔俾老公再做 gym，佢話咁得閒去做 gym，不如陪個仔玩，有時佢帶埋魔童一齊去做運動，就睇仔多過自己做，運動量大減，加上阿靚配合美食引誘，所以拍完《衝 II》到而家只係隔咗七個月， Chilam就肥咗接近二十磅。」 Chilam身邊人說。

19/7
Chilam表示因為在新加坡期間，被魔童整爛部 iPad，要攞去銅鑼灣 Apple整機。

魔童見到西片《 High爆雲霄》海報，同爸爸一樣都係機師，即表現興奮，可惜套戲是三級片，魔童唔睇得。

20/7
睇完戲靚靚抱住囝囝同老公頒頭離開，唔想阿仔上鏡。

Chilam帶囝囝去睇《怪獸大學》，問到他有否 keep fit，他直認沒有。

買樓加名

除了在外形上有管制，靚靚更定出多條辣招，全面箍緊老公。
以前靚靚搵錢能力比 Chilam強，但近年專注湊仔，大幅減產，反而歌影視三線齊發的 Chilam就深得廣告客歡心，有多個大型廣告在手，今年與郭富城一齊做埋馬主，極筍價購入的「愛將」已經勝出三次頭馬，正財偏財兩旺；最近更有消息指，九月 Chilam將過檔蕭定一旗下經理人公司，簽約三年收五千萬。
男人有錢就身痕是定律，靚靚當然深明此理，據了解，現時 Chilam所有收入都會經老婆手，以往兩公婆投資買樓，多是各自各用自己名買，但去年九月二人成立「二豬有限公司」（兩人生肖都屬豬），以一千一百多萬買入銅鑼灣曦巒一個低層單位，但據知負責俾錢的是 Chilam。

突擊檢查

Chilam的經濟被老婆全面掌控，行蹤方面，醒目靚靚當然亦不會走漏眼。對於老公同郭富城及沈嘉偉等經常夜間活動打邊爐打牌篤波直落，靚靚都好放心，不會次次都做跟得夫人，反而 Chilam返大陸拍戲，她的戒備意識便會十級提高，經常打電話 check住外，亦愛利用新科技和出動寶貝仔魔童，借同離岸的爸爸視像聯絡，乘機??實老公。
「有時阿靚會失驚無神帶埋個仔上去探班，話就話係俾老公驚喜，其實係突擊檢查。」 Chilam身邊人說。

Chilam同靚靚在 92年拍拖， 01年美國註冊結婚， 06年誕下兒子「魔童」。（《蘋果日報》圖片）

Chilam之前試過拍劇同佘詩曼傳出緋聞，令靚靚極為不滿。

試過在泰國拍戲期間， Chilam被影到與曾志偉等人入「金魚缸」骨場「觀摩」。（《忽然 1周》圖片）

本週一（ 22日）， Chilam獨擔大旗出席《衝 II》祝捷活動。

嚴防女主角

不過，突擊檢查無法頻密進行，為將防線提高，每逢 Chilam接戲接劇，邊個做女主角，靚靚都會參與意見，絕對有影響力換人。
「以前都有過前科啦， Chilam同佘詩曼拍劇拍到着晒，搞到阿靚要落場睇住，而家每逢 Chilam接戲，佢都會俾意見，唔係睇劇本，而係邊個同 Chilam有感情戲，見到係啲姣精或者乳牛，佢都唔俾老公接；但好似劉心悠、胡杏兒同陳法拉（當時與薛世恒仍未離婚）呢啲唔多緋聞，阿靚就會放心啲。」靚靚身邊人說。

靚仔又有錢的 Chilam，最近仲同郭富城一齊做馬主，隻馬「愛將」仲要出賽四次，就拉了三次頭碼，攞埋「香港大學校友會挑戰盃」。

甚少緋聞的劉心悠通過靚靚檢定，放心俾她同 Chilam拍親熱戲。

有消息指 Chilam九月會收五千萬簽約蕭定一旗下公司。

12年 6月 Chilam在上海拍《大叔我愛你》時，與 23歲女主角付夢妮有親熱戲，靚靚突擊帶埋個仔飛到去上海探班??實。

五大必睇場口

《衝上雲霄 II》出街後，雖然劇中有不少穿崩位被網民插爆，但收視有升冇跌，劇集發展男女主角關係錯綜複雜，當中有五大必睇場口。

法拉 Chilam打野戰
劇中法拉分別與 Chilam及吳鎮宇有感情線，其中有一幕 Chilam跟法拉情到濃時，在草叢「打野戰」，在倫敦取景，夠新鮮。

馬明江美儀激嘴
嗒女無數的馬國明，越級挑戰失婚婦江美儀，成為有性冇愛的性伴侶，二人在劇中有多場親熱戲，其中一場更由露台嘴到上床。

鎮宇阮小儀相睇
情慾之外，劇中亦不乏搞笑場面，其中一幕講述法拉見鎮宇一直未能忘記 Zoe，於是為對方介紹女伴，並安排小儀與鎮宇相睇。

香香泳衣上陣
劇中的一班空姐亦搏到盡，香香、藍莓和孫慧雪等到海南島拍泳池派對戲份，全部三點式上陣鬥事業線，又用水槍互射，絕對是高登仔必睇場口。

鎮宇感情戲
鎮宇落力推介的一場戲，講述他未能忘記死去妻子 Zoe，於是向夏晨（胡杏兒分飾）借用 3分鐘，把對方當成 Zoe，讓他講述對亡妻如何掛念，是鎮宇演技晒冷。

攬炒絕招

女人比男人容易老，除了花盡金錢時間抗老自救，唔少圈中人妻更同步規限另一半飲食，最殺食一招，唔俾減肥！就算我老你都要肥，攬炒！圈中唔少男人為了箍住另一半，即使對方無理要求，都寧願啞忍，甘心俾女人食住。

何超儀、陳子聰
做過模特兒的大隻陳子聰，身高 6呎加上 41吋胸肌，被稱「港版木村拓哉」，但自 03年與何超儀結婚後，有指為免老公遇飛來蜢偷食，何超儀頒令禁夫減肥，最高峰重達 220磅，搞到三高才收手。

何超雲、陳山聰
11年，陳山聰與賭王三房千金何超雲撻着，為鋪路做「何家女婿」，不惜放低男性尊嚴，超雲嚴禁陳山聰與其他異性來往外，平日出街，更要由她親自襯衫，做「人肉 Ken」。