壹週刊 第1220期

08年引爆的淫照風波已超過五年，男主角 Edison陳冠希至今雖仍未於內地全面解封，搵他拍戲拍劇，投資方一定要放棄內地市場，但賺人仔的財路並未完全切斷，拍廣告甚至穿州過省做夜場騷，亦足以讓 Edison繼續富泰。

低調密密搵，但當年淫照事件後，由東亞娛樂老闆林建岳代墊支的千五萬廣告賠償金， Edison至今仍是得個拖字，而由岳少科水與他合資的 CMD多媒體公司，同樣長期未有上報收入，唔交數又拖數，舊債加收入分賬，愈滾愈大，保守計超過二千萬。

Edison有錢唔還，據知林建岳已經向他發最後通牒，並透過中間人，要求他盡快還錢。

陳冠希到廣西南寧莉莉瑪蓮酒吧演唱，雖然只唱三首歌，但他亦帶來 Raper和唱。

財路未斷

衰鹹濕的陳冠希，○八年因為淫照事件爆發，一度要龜縮到美國避風頭，事隔五年多， Edison的演藝事業依然一沉不起，還好潮服生意上晒軌道，並成功開拓海外門市，連最新女友 Ann，也是台灣 Juice售貨員。
苦等多年，內地有關方面，依然不通過 Edison榜上有名的電影、劇集審批，但廣告代言或登台則不受影響。國內唱酒吧騷，隨時唱到盆滿鉢滿， Edison亦不再扮上菜，甚至唔介意到偏遠地方唱酒吧騷，他更加唔怕辛苦撲來撲去，一個月起碼接七、八場夜場演出，收入穩定又和味！
「未發生『淫照』事件嗰陣， Edison以潮人包裝喺內地知名度唔差，好多商演活動同廣告，當時佢根本唔會吼唱夜場。但件事過咗咁多年，雖然官方無明文規定將 Edison列入黑名單，但亦無任何單位敢做白老鼠，莫講話電影、電視劇，連大型節目都唔敢搵佢，所以佢上唔到電視台做騷。
「不過 Edison喺大陸都死唔晒，好多酒吧夜場搵佢做騷，個價都唔低，唱三首歌就有三十萬入袋，咁易執，所以只要到價，佢就接！佢唱得好密，但好多時都盡可能即日來回，亦唔會好高調。」知情者說。

林建岳對 Edison不離不棄，「淫照」事件後， 09年更出席新加坡舉行的《神槍手》首映，攬實 Edison力撐他復出。

凌晨十二點半才出場，唱三首歌即閃，司儀還在台上問觀眾，想唔想 Edison再出場，觀眾嗌晒話「想」，可惜 Edison已經走咗。

酒吧內逼爆男女觀眾，個個表現 high爆，大銀幕更以潮牌主理，潮流教父形容 Edison。

酒吧外掛上有兩層樓高的 Edison海報，證明他在國內有一定吸引力。

在國內夜場賺到錢，但 Edison一直有個心願，想在香港收復失地，近日便收一百萬與嘉士伯合作搞騷，嚟緊還會出唱片。

Edison現以十萬租住南灣雅景閣豪宅。

一個崩未還

去年開始， Edison搬離長期租住的四季酒店服務住宅，搬往月租十萬的南灣雅景閣，與鄭伊健為鄰；而由林建岳揼水合資的 CMD多媒體公司，亦由原先銅鑼灣寫字樓，搬到黃竹坑一個五千呎單位，地方比以前大三倍有多，每月租金約三十萬。
生活繼續富貴，但 Edison自「淫照」事件發生後，欠下林建岳代墊支給廣告商的千五萬賠款，至今一毫子無還過。
「件事令 Edison形象破晒產，當時有成五、六個廣告商要佢賠錢，加埋租住四季，所有錢都係公司幫佢墊支，條數成千五萬，但到而家佢無還過錢俾岳少！」

追女無數的陳冠希，近日與比他年輕十年的 Juice台灣女售貨員 Ann打得火熱，幾乎去到邊都帶住女友。

雖然只得三十三歲，但 Edison外貌愈來愈殘，眼圈眼肚又黑又大。

揸正嚟做

除了這筆舊債，○七年由林建岳揼水與 Edison合資開設的 CMD多媒體公司，於○八年淫照事件爆發後，有關公司收入，也從未上報。
「最初嗰一年幾， Edison完全無嘢做冇收入，當時唔報數上去總公司，大家都明白，但近呢兩年多咗好多 job，每個月收入都唔少，但佢仲係側側膊。老闆本來都好睇佢，但公司仲有其他股東，加上班高層亦有意見，建議老闆唔好再姑息佢，所以過去一年，老闆都冇乜理過佢，好多嘢亦揸正嚟做。」
據了解，林建岳已經透過中間人，向 Edison發出通牒，向他追收超過二千萬欠款。

在港期間， Edison幾乎每日都返黃竹坑寫字樓，離開公司時，更加四圍望怕被跟踪，又裝咗摩打腳極速上車。

林建岳投資開設的東亞娛樂，旗下有不少分支公司，藝人眾多。

引退一年

有自稱奇拿的人於 08年 1月上載了一張陳冠希與鍾欣桐的交歡照上網，令「淫照風波」一觸即發，往後被牽涉其中的女星愈來愈多，包括張栢芝、顏穎思、陳文媛、楊永晴、陳思慧等，短短兩星期內，奇拿一共上載了 433張淫照。
一個月後，離港避風頭的 Edison返港召開記者會，公開道歉並宣布無限期退出娛樂圈。之後一直潛水美國，至 09年 2月，「淫照風波」在加拿大開庭， Edison以證人身份現身作證。同年 3月， Edison有份主演的電影《神槍手》上畫， Edison現身新加坡出席首映禮，正式復出。