壹週刊 第1221期

正在美國進修的陳法拉，人不在香港，但見報率依然高企，擔正女主角的《衝上雲霄II》日日有新聞，另外同首次全裸上陣的林家棟合作電影《奇幻夜》，二人連場肉搏，亦成為外界焦點，對於戲中多場床戲，法拉興奮到忍唔住踢橋：「同我拍床戲嘅家棟，喺戲入面都係鬼魂，我自己就好投入，百分百滿足。」
同家棟第一次合作就有多場情慾戲，不過法拉話一埋位，佢哋已經有戀人嘅感覺。

導演即興要全裸

相對要分飾人同鬼，又要剝清上陣的林家棟，無綫拍電視劇試過三點式上陣，又曾經除衫露bra的陳法拉，明顯錫身得多！
在《奇幻夜》一片的《枕妖》故事中，法拉的角色有一場著胸圍內褲背面鏡頭，但她卻選擇用替身。
「我同家棟都有裸露場面，劇組幫我搵咗個身形好近似嘅內地女仔，其中一場入浴室沖涼戲係替身做，但我一直有喺現場睇住拍攝過程，對某啲小動作同行路姿勢，我都俾啲意見。」陳法拉說。
講露肉程度，贏晒法拉的林家棟，對自己處男剝光豬演出回應：「我又估唔到部戲會列咗做三級，三級暴力我以前都拍過，但奉獻小弟嘅全相就係第一次！我真係全裸，嗰場戲話法拉錯手殺咗我，之後清理屍體，要除咗我啲衫再放入密實袋真空處理，所以我咪要光脫脫囉。」
原來要剝家棟光豬，是導演陳嘉上即興決定。
「我都只係考慮咗五秒，覺得現場氣氛應該係咁做，所以二話不說就除，呢啲鏡頭喺外國電影好小事啫！只要劇情合理就 OK，法拉都冇乜尷尬，大家都係成年人。」林家棟說。
法拉表示拍戲最緊要冇包袱，所以同家棟攬埋一嚿親熱絕對全情投入。
第一次全裸演出嘅家棟，話睇番呢場真空處理佢嘅畫面時都覺得好震撼。

導演陳嘉上喺現場同家棟及法拉講解拍攝嘅細節。

三級唔關色情事

法拉喺《枕妖》入面飾演一名護士，為咗應付處理家棟屍體嗰場戲，上網睇咗好多相關片段增加說服力。

電影被列作三級片，法拉亦有意見：「我同家棟個故事其實冇乜色情嘢，另外嗰兩個故事應該比較血腥，所以要列做三級，細膽嘅人就唔好去睇嘞。」正身處美國進修的陳法拉，連新劇《衝上雲霄II》出街都未能配合，未有即時回港宣傳。
無綫拍劇時法拉剝衫露bra都得，估唔到拍戲咁錫身，呢個戴bra行入浴室嘅女仔，原來只係法拉替身。

 

家棟同法拉喺戲入面，係做一對佔有慾好強嘅戀人。

黎漢持遺作

今年六月十三日因急性肺炎病逝的黎漢持，二十五歲開始加入娛樂圈，拍過不少電影及劇集，轉職玄學家多年的他，年初應邀參與《奇幻夜》其中一個單元《迷藏》演出，飾演一名校工，料不到成了他的遺作。

六十二歲老戲骨黎漢持年初被邀參演《迷藏》，估不到戲還未上就因急性肺炎離世。

黎漢持在遺作《迷藏》中飾演一名校工，引發學校怪事連連。