壹週刊 第1221期
無綫憑《衝上雲霄2》成功力挽一蹶不振收視，最高見過35點，帶挈Cool魔張智霖成萬人迷，Sam哥吳鎮宇的超班好戲更獲一致好評。唯獨女主角陳法拉最唔爭氣，被網民圍插喊極無眼淚，更有指吳鎮宇對陳法拉低班演技不滿，拍攝期間忍唔住又教又話。
對此，Sam哥否認，更自爆多年前拍處境劇《公私三文治》鬧梅小惠，令對方喊到收唔到聲後，從此唔敢再鬧女人，但對住經常唔記得對白的吳卓羲，Sam哥則絕不口軟。
吳鎮宇坦言鬧爆的是吳卓羲，不過二人合作多年，冇隔夜仇。
一九八九年，他跟曾華倩、梅小惠（右）合作《公私三文治》，搞到劇中做細妹的梅小惠喊爆。
幫Sam哥買衫
日前，由內地拍戲返港小休的吳鎮宇，單拖行灣仔捷船街，其間路經一間服裝店， Sam哥在櫥窗望兩眼，二話不說入去慢慢揀。試完衫再試眼鏡，老闆更貼身服侍 Sam哥，在店內玩足一粒鐘， Sam哥滿載而歸。
專登返港入貨，吳鎮宇表示為宣傳而買衫：「都係 Sam哥鍾意嘅衫，唔係自己嘅 style。」
無論做戲抑或買衫，吳鎮宇都有要求，故有指十年前拍第一輯《衝上雲霄》，與當時演技幼嫩的胡杏兒拍攝一場感情戲，最終 NG了數十次，吳鎮宇才滿意，今時今日同陳法拉合作， Sam哥同樣有碗話碗，但否認有當眾喝罵。
Sam哥日前在灣仔睇衫，鬼馬地將長褲圍頸，咁嘅試褲方法夠特別。
Sam哥同店鋪職員有傾有講，更氹到對方笑唔停。
Sam哥買完衫走人，老闆親自在門口護送。
一鬧就喊
「基本上我唔鬧女仔，女仔一鬧就喊，收唔到科都唔知點算。法拉演技已經得到佢本身一班觀眾認同，當然有人等緊佢進步，加上呢個角色（何年希）幾難搞，不斷做錯事俾人鬧，法拉又唔知唔認真應該係點。（咁你鬧嗰個係咪第一集時嘅胡杏兒？）唔係，其實我曾經鬧喊嗰個係梅小惠，嗰時拍緊《公私三文治》，佢做我細妹，有日我遲到，啲人已經係咁催我埋位，佢又不斷講嘢，我咪叫佢收聲，佢即時喊出嚟，雖然相隔咗咁多年，我都要再同佢道歉，當年我以為大家真係好似阿哥細妹咁，其實都唔應該。」
認改劇本
對女藝人， Sam哥口下留情，但對經常忘記對白的吳卓羲，吳鎮宇絕不口軟：「其實我由頭到尾鬧嗰個係吳卓羲，有時我哋夜晚收工去玩，第二日開工我都記得對白，但佢就唔記得，我哋好 friend，佢唔介意嘅。不過我發覺而家鬧人都無用，黑吓面咪算囉，反正唔黑面都會俾人話黑面。」
有指 Sam哥同 Cool魔雙劍合璧，會即場改劇本，吳鎮宇直認：「我哋將啲對白改順口啲，或者有啲戲大家可能唔明嘅，會花啲時間執吓，我哋同樣覺得唔需要寫到 Captain Cool咁鋒利，大家傳統睇慣嘅角色，一係衰人，一係好人，過咗位觀眾未必贊同，對白唔可以太討厭。不過我哋唔係要干涉，你來我往，大家幫吓大家，唔好講到我乜都要管。」
吳鎮宇跟陳法拉、張智霖等早前飛馬來西亞宣傳《衝上雲霄 II》，他跟 Cool魔都 chok爆。
十年前跟演技初班的胡杏兒做情侶，經他指導下，胡杏兒在戲中表現被大讚。
在英國拍外景對稿，吳鎮宇笑笑口，反而法拉就十分嚴肅。
呢幕陳法拉在英國憶舊男友不辭而別，但喊極無眼淚，俾網民指戲屎。
去年八月，吳鎮宇跟陳法拉及張智霖在中環拍外景，途人不斷閃燈拍照阻礙進度，不過三人依然投入未受影響。（《蘋果日報》圖片）