壹週刊 第1223期

復合兩年，許志安雖然一早認定鄭秀文，只可惜過晒適婚年齡的 Sammi安於現狀，更無意生 B，有傳男方兩度出手求婚均生吞檸檬，更遑論同居試婚。
天無絕人之路！今年初，入住渣甸山松園唔夠一年的 Sammi，收到大業主通知收樓重建。天后被逼遷，名下多個過億磚頭（物業）全部由家人入住或租約未完，當時見 Sammi忙開工冇時間搵屋搬，安仔吼準機會氹女友同居，為全面私有化鄭天后再一次搭棚。
上月中，許志安親自做司機，安排 Sammi連人帶家當進駐他位於干德道的殷豪閣物業。同居已一個月，本週一（八月十二日），許志安正日生日，晚上十一時，兩人撐完枱腳後，壽星仔做司機，與女友一齊返愛巢。

12/8
本週一，安仔正日生日，與 Sammi外出晚飯後駕車返歸。

失敗再嘗試

○九年，當時處於單身狀態的鄭秀文，以一千零八十萬一炮過買入梅道蔚皇居單位，並打算用來做姑婆屋，點知入伙兩年，許志安求復合成功，積極入廚氹另一半開心的 Sammi，開始同身邊人呻，屋企地方不夠用。
「買蔚皇居嗰陣， Sammi諗住做獨居老人，邊諗到會同安仔走番埋一齊！到 Sammi成日招呼安仔返屋企試菜，就開始發現地方唔夠用，心郁郁想搬大啲。」 Sammi身邊人透露。一向對居住環境有要求的 Sammi，搵樓搵足成年，才睇中渣甸山松園作為安樂窩，豈料入住短短半年，便收到大廈重建通知， Sammi被大業主逼遷，今年七月前搬走。名下有過億物業的 Sammi，原本不愁無屋住，不過其中兩個單位分別由父母及胞弟入住，另外兩個單位又有租約在手，忙住登台走埠，再做電影《盲探》宣傳， Sammi根本無時間再睇樓。
據知，當時許志安已大膽建議 Sammi搬到他名下的殷豪閣同居，但過慣自由自在獨居生活的鄭天后，聽到要同男友及外傭同一屋簷下，馬上耍手擰頭。堅持自住，可惜經紀搵足幾個月，都搵唔到 Sammi心水屋，逼遷在即，許志安再次出口提同居，並以「擘大眼想出街，都有人車出車入」作說詞，終氹掂急住搵屋搬的 Sammi，進駐許宅。

14/7
上月， Sammi正式進駐安仔寓所，安仔更吩咐工人（右圖白衫）幫 Sammi搬行李上樓。


早前， Sammi忙住宣傳電影《盲探》，冇時間搵樓，逼遷在即，唯有搬入許宅。

殷豪閣

Sammi雖然抗拒生 B，但卻表示將來有興趣領養小孩，即使唔同國籍都冇問題。

上週五（ 9日），安仔一班好兄弟張衞健、梁漢文、吳國敬等人為他慶祝生日，但 Sammi未有現身。

幫手秘搬

氹掂 Sammi落疊，許志安為保持低調，連 Big Four一班好友都無正式通知，就是怕 Sammi臨時改變主意。
「安仔知道 Sammi未 ready（結婚），今次話就話暫時有地方俾女友應急，實質係想試吓住埋，睇吓有冇機會再氹掂 Sammi答應結婚！」許志安友人透露。
上月中（七月十四日），許志安帶埋外傭到 Sammi的渣甸山住所，幫手收拾私人物品。下午五時，許志安揸住名下的白色 Benz返回干德道住所，唔想張揚的 Sammi戴住口罩，刻意同外傭坐後座。安仔體貼地將車停正大廈門口， Sammi拎住一大袋私人物品，九秒九衝入大堂，發現有記者，安仔即時面燶燶，揮手示意記者離開，再將 Sammi另一袋物品交給外傭，才駕車入停車場。

同電影獎項無緣，但無阻 Sammi廣告身價，企硬六百萬走唔甩。

挾住 Big Four之名，除了演唱會，許志安同蘇康、梁炳、健仔早前更一起接拍廣告，財源滾滾。

為咗氹女友開心，安仔愛屋及烏，經常抽空陪未來外父食飯，又做埋「柴可夫」管接管送。

Sammi之前租住的白建時道松園，被收購重建，現時大廈已封閉，外牆搭滿棚架。

響按趕客

本週一（八月十二日），許志安四十六歲正日生日，兩人一早外出食飯慶祝，晚上十一時壽星仔載住 Sammi返回干德道住所，一路篤住手機的 Sammi發現有記者影相，馬上摷眼鏡避開鏡頭，許志安亦一反平日的友善態度，怒睥之餘，更不停響按「趕客」。自一一年同 Sammi正式復合，一直介懷外界指他靠天后女友反彈的安仔，對於內地不時有人提出兩人情侶檔搵食，極之抗拒！
「安仔自尊心都好重，俾外面話佢靠 Sammi，梗係唔舒服，國內有啲單位出好多錢請佢哋情侶檔做騷，安仔都推。」一名製作公司人員說。

近年，專心鑽研廚藝的 Sammi，經常孖住安仔拍拖買餸，再返歸玩煮飯仔。


復合兩年， Sammi安仔已先後三次拍拖遊日本。

進駐許宅只有兩日， Sammi孖住安仔出席劉培基作品展，但刻意前後腳，又不肯合照，表現避忌。

搵落唔少

自知吸金能力同 Sammi差一大截，一直想將女友全面「私有化」的安仔，過去一年忽然積極，以往鮮有做酒吧夜場騷的他，現時一個月至少跑三、四場，更將情侶檔出騷門檻調低，只要合乎「同騷唔同台」大原則，安仔都肯接，密食儲老婆本，無非想向 Sammi展示養老婆能力，為結婚鋪路。「安仔喺大家庭出身，身邊好多老友都結晒婚，同番 Sammi一齊佢已經認定對方係一生一世。搵錢能力唔及對方，咪密啲做囉，但其實安仔根本搵落唔少啦！」安仔好友說。
為氹女友，安仔豪擲二千四百多萬買下干德道住所，由九龍搬到香港區，方便同 Sammi見面外，之後再花過百萬買 Benz親自管接送，今次氹掂女友進駐許宅， Sammi落疊做許太，又踏前一步！

搵得到

身價唔夠天后女友高，安仔「密食當三番」又得咗！除咗孖住好兄弟梁漢文、蘇永康、張衞健做 Big Four巡迴，更頻頻返內地登台，連酒吧騷都唔放過。

結婚「慌」言

同許安復合後，抗拒結婚生仔的 Sammi每次被問及婚事，都耍手擰頭，更揚言對婚姻存有恐懼。

冇慾望生仔
11年， Sammi出席電影活動被問到生仔，她堅決回應：「對生仔慾望唔大。（咁安仔呢？）我點知？呢啲私房事，等我哋自己解決，除非突然有，不過我唔會俾呢個突然發生。

諗都唔好諗
Sammi出席 fans生日聚會，被數百歌迷催婚，大叫：「結婚！結婚！」 Sammi竟笑笑口話：「諗都唔好諗呀！」

公開求婚嬲爆
年初， Big Four舉行演唱會，張衞健預告安仔會在演唱會上求婚， Sammi聞言即說：「佢咁做我一定會嬲爆！」

婚姻恐懼症
早前與拍檔劉華出席電影宣傳，被問到會否羨慕對方成家立室好幸福， Sammi即說：「我對婚姻有恐懼，結唔結婚對我嚟講冇分別，我亦完全冇諗過要做媽咪，我唔識照顧人。」

安仔承認與Sammi同居：「好誠意地邀請佢」

Now TV獲得英超2013/14年第三個球季開始嘅獨家播放權，早前邀請許志安主唱主題曲「超班」，今日喺銅鑼灣嘅記招首播MV。

安仔被問到係咪同女友鄭秀文（Sammi）同居，關係再進一步，安仔大方承認，佢話：「佢（Sammi）以前住嗰度成棟大厦拆，我好誠意地邀請佢，佢都諗咗一陣，佢嚟住係臨時性，暫時性照顧。」安仔強調同計劃結婚無關。

安仔話，因為Sammi位於渣甸山嘅住所松園需要全棟拆卸，故此暫時收留對方入住，但就冇預Sammi嘅父母份。至於Sammi落腳之後、安仔會否唔俾佢走？佢就裝出一副滿不在乎樣話：「唔得、唔得，只係暫時性。」

Sammi同安仔同屬基督徒，Sammi更經常話唔支持婚前性行為，安仔亦表明同Sammi分房而睡，又強調屋企雖然地方細，但都有幾間房。安仔仲話，今次係誠邀Sammi到其家中暫住：「好耐先鼓起勇氣開口，驚佢拒絕我。」

對於同居是否試婚，安仔話：「同結婚係兩件事，我唔會因為咁而『講不如結婚』啦！」被問還是已經秘婚，安仔回應：「如果結咗婚你會知，冇得呃，只係暫時性照顧。」現年46歲的許志安，被問到對於結婚還要考慮甚麼，佢呆咗一呆，再謂：「總係爭啲啲，等我返去諗諗。」