壹週刊 第1226期

王祖賢大走樣！驚爆香港娛樂頭條。當年同期，亦同樣被稱影圈靚人嘅鍾楚紅，日前出席活動，力挺王祖賢係俾傳媒追住嚇親，仲有攝影角度影響，先會搞成咁！

是但啦！反正膠面、大細眼，都係人為。換咗比王祖賢大七年嘅鍾楚紅，情況又如何？

話說有日《壹》仔路過中環嘉咸街街市，見到鍾楚紅坐司機車落嚟買生果，是日佢冇化妝，肚袋有幾大，面肉有幾鬆，風琴頸有幾多節，一清二楚。同平日出席活動，例必紅嘴一張， keep住美艷招牌嘅鍾楚紅比，無可否認，驚嘅！但諗吓，五十三歲自然老化，點都比硬膠人易於接受。

鍾楚紅零妝出街，勇氣可嘉。

仲有，因應鍾楚紅提出嘅攝影角度問題，八珍已將部分可能由角度同閣下動作而導致嘅相抽起，如果唔係……

買完幾個桃，生果檔阿嬸叫鍾楚紅試吓啲龍眼，果然甜，買！提倡環保嘅佢，自備購物袋。


望吓望吓，再買多盒紅莓先捨得走人。

望落肥咗唔少，要食生果餐嘅鍾楚紅，上星期二（八月二十七日），上「行」妝出席手錶品牌活動，同場仲有人氣劇《衝上 II》嘅馬國明、吳卓羲。