壹週刊 第1226期
同事誤以為我訪問張家輝，「吓？原來是張兆輝，差好遠啫。」此言差矣，張家輝練肌肉練到有情緒病要跟太太關詠荷分房瞓，眼前一樣咁 Fit的張兆輝卻簡單快樂得多，手上有兩、三層樓揸手，太太又有自己美容生意，他拍戲才真是賺錢買花戴。
他自我評價是︰「無野心、安分守己，我對自己沒要求，有份工就得啦。」如此性格難成大器，甚至令人覺得他好 hea、不思進取，當事人不知幾知足，「舒服就 OK啦，邊個不想年薪過百萬，但我不是那種材料，我是懶散啲，但不頹，況且我好用心去演好我的戲，對得住人對得住自己。」
就好似他回巢無綫拍劇演狙擊手教官，開鏡前個幾月，他自掏腰包請私人教練狂操，一星期練足四、五日，又戒澱粉又戒油，務求入型入格。「我今年五十歲，有朋友唔信要睇我張身份證。」此刻的張兆輝，應該開心過張家輝。
任勞任怨
細女特別黐身，惹來太太撒嬌，「老婆呷醋，覺得我特別偏心個女。唉，男仔梗係要受吓苦先會堅強。」
近年報紙經常說到張兆輝有半億身家，我老實不客氣直問，估不到他答得爽直︰「成日講我有幾多億身家，醜呀！當然我不及人哋幾十億身家，但都有幾百萬，比起幾十萬的人又好。我有好多同期訓練班的同學，無名無做呢行，相比他們我又幾好嘅。」
短短幾個小時訪問，他不下一次表明自己是個易滿足的人。當年他考入 TVB藝員訓練班，底薪只有二千元，的確比做酒樓經理的同學起步價為高，但三年後同學都加薪到七、八千兼有「下欄」，他還是三千以下，咁都無 hard feeling？「我無喎，剛剛簽了五年約，我個心仲暗暗歡喜，好囉，以後不用煩，繼續耷低頭返工，每年等加三百蚊。」
就是這樣不聞不問，張兆輝默默做了近廿年，公司派他做什麼，他就乖乖照單全收任勞任怨，「我無所謂，諗真是好笨。有同事叫我爭取一下，我認為刻意??特別待遇或演出機會，就無意思。」
○三年的《大隻佬》，一拍電影就得金像獎最佳男配角提名，更贏得劉德華讚他好戲。
任勞任怨不怕蝕底的張兆輝，縱然贏了同事之間的口碑，但頭十年的人工每月還是得九千。「同事讚我勤力，無失拖，不會扭計；公司唔會理，甚至覺得是應分，喂，有出糧俾你?！」我看住一邊做訪問，一邊扒椒鹽豬扒飯的張兆輝，有點不好意思，「唔怕，以前拍劇都係咁，五分鐘內食完飯盒繼續拍。」
第二個十年，張兆輝改簽了部頭合約，拉勻月薪有萬五以上，可惜角色愈做愈霉，工作量愈來愈少。最後他得出結論是， wrong timing和大樹好遮蔭。「八十年代電影圈蓬勃，我就被合約綁實，到合約差不多完，出面又水盡鵝飛，總之就生不逢時啦。無綫是大台，熟悉又有安全感。除咗呢行，我仲可以做乜？墨水又不夠人多，寫字又唔得，我都係為生活繼續留低。」彷彿是大部分打工仔的寫照，無奈。
同事讚我勤力，無失拖，不會扭計；公司唔會理，甚至覺得是應分，喂，有出糧俾你?！
他的易滿足，亦體現在美容生意上。因為拍劇拍到意興闌珊，他便轉行跟太太拍住做美容生意，高峰期有五間美容院，最後轉做批發，美加、東南亞的美容院都跟他拿貨，一年生意額過千萬。
生意人梗係想愈做愈大，但他卻認為生意不須擴大，否則有好多事要兼顧，「你睇李嘉誠幾辛苦，有無用過錢都唔知，一點都不過癮。目前我幾舒服，錢是賺不完，幾百萬都夠退休，你食得幾多？」真係吹佢唔脹。
多謝老婆
九五年的台慶劇《情濃大地》，已跟周海媚做對手戲。
難得太太跟他意見一致，所以張兆輝很感激，更帶點激動︰「我好幸運識到老婆，我無情趣又不解溫柔，老婆又靚又醒，可以參加香港小姐。男人最重要係個老婆，對方係幫你支持你，真係煩少好多嘢。」
當年的張兆輝其實好鬼宅男，拍劇年代基本上放工後沒有娛樂，為了盡快供甩層樓，拍拖出街食飯睇戲一律免問，「我成份糧供晒樓，要食老婆份糧，大家都勒緊褲頭，出街等於花錢，不如留在屋企，兩公婆飲紅酒，悶都無辦法，都不敢叫朋友回家，要招呼嘛，每個月得兩百元壓袋。」
他最大的娛樂，應該是每天拍劇力竭筋疲後，當美容師的太太為他炮製的窩心 facial，時至今日結婚十六年，太太都不厭其煩捉住他上床，「她話我又唔係要拍四仔，做運動練到十二嚿腹肌都無用，終日被件衫遮住，反而塊面要見人。唉，又被她講中，唯有瞓低讓她做 facial。」
回無綫演狙擊手，張兆輝刻意減肥十幾磅，點睇都不似五十歲。
老婆身兼數職，既是他的美容師，又是他的財務策劃同人生教練，幾時買樓、幾時要出去跟人 social，太太都幫他一把，「我真係不會 social，以前 TVB叫我做訪問，我推了幾次，心想無須要宣傳，劇集出街自然有人睇。近年被老婆講得多，一見我坐在屋企就抦我，叫我出去接受訪問，同人飲吓傾吓，搵監製夾吓宣傳。老婆又講得有道理，以前有五單宣傳，我依家會去三單，算叻仔。」
穩陣
近年被老婆講得多，一見我坐在屋企就抦我，叫我出去接受訪問，同人飲吓傾吓，搵監製夾吓宣傳。
推算他做生意的太太是數口精，應該是一家之主負責管數，張兆輝不以為然，「又唔係，老婆大頭蝦，我管錢好啲。自小老豆講到明，除了供書教學，一切消費都要靠自己，所以我對用錢比較謹慎。」
爸爸是個織藤器傢俬的師傅，靠一雙手養活一家七口，排第四的張兆輝課餘時間都要幫手織埋一份，暑假又試過在地盤做散工，一日有五十蚊，一個月已賺足全年書簿費。
別人的第一桶金是投資得來，他卻是儲回來的，「廿八歲買沙田富豪花園，廿幾萬首期是我自己積少成多儲起來。我不貪心，從來不買股票，拍戲點睇實個市呀？以前老婆買過山埃貼士，蝕咗錢後更加不敢入市。買樓我都好穩陣，一直都是樓換樓。」
他自言當演戲是興趣，想做多十年就退休，「未來十年是搵子女的生活費，我好知足，你可能認為我懶，但好肯定我花十九年時間在 TVB拍劇，相等於外面的三十年。」
張兆輝有兩個哥哥，一個開運輸公司，一人搵錢養四個子女，雖則手停口停，但總算有層樓揸手，搵到兩餐晏仔。另一個哥哥住公屋，公一份婆一份，放假就四圍旅行。不愛比較的張兆輝，此刻體會更深，「每個人都有不同層次，做人要有自知之明，我有事業有家庭，安居樂業，身體又健康，你仲想點？」
轉台
我問張兆輝羨慕黎耀祥近年撈到風生水起嗎？他答得好快，「我不需要羨慕佢，是他一早羨慕我就真，當年我拍《錯愛》，他還企在我身後，演秦沛個仔。」
黎耀祥撈了近廿年，至近年先有得擔正，真係苦苦苦苦盡甘來，張兆輝好歹都當過幾年小生，十年前才跳出電視，走入大銀幕，遲到總好過無到。
今年他更掹車邊，拍荷李活導演米高曼執導的《 Cyber》。今時今日，仲講無綫電視？我早已轉台睇 NOW。
撰文︰鄭子瑩
攝影︰陳家維
協力︰蘇韻詩
化妝、髮型︰ Connie@Bridal Corner
服裝︰ Hugo Boss