壹週刊 第1226期

「為咗夢想，你可以去到幾盡？」
「巨聲幫」劉威煌、周志文（大孖）及周志康（細孖），於○九年參加 TVB舉辦的歌唱比賽《超級巨聲》，希望憑歌聲變巨星，最後雖落敗，但都叫薄有名氣。
上月他們再下一城，與 TVB音樂監製葉肇中（阿中）
及填詞人宋沛言（阿言）共十一位拍檔，在油塘一座工廈內開設「異類教育」，客人要玩迷宮、密室逃脫等真人實景 game，過五關、斬六將，猶如 TVB的遊戲節目。
不過「夢想」歸「夢想」，現實問題不少。
本刊找來海洋公園董事局主席盛智文
及真人 game行家等，組成
「星級裁判團」，替「異類教育」評分；會唔會 out，一睇就知！

「異類教育」所有遊戲室均以校園為主題，第一關，眾玩家就要排排座在禮堂當中，由神秘人監視，並在詭異的氣氛下，解開小女生的死亡之謎。

「有個女生被殺了，嗚、嗚、嗚……」喇叭傳來女孩的哭聲。在「暗黑與想像」遊戲室內，八個玩家緊張地聽着聲音提示，在限時二十分鐘內，重組桌子上的積木，再從積木上的文字，鬥快搵出女生死亡真相。第二個遊戲，是「暴民之反擊」，玩法似 Killer，玩家輪流分飾軍人及暴民，軍人通過手上的平板電腦殺人，暴民則透過閉路電視畫面觀察其他人的動靜，查出軍人是誰。
「異類教育」共有八個遊戲室，都以校園為布置主題，其他遊戲還包括密室逃脫、迷宮以及「多數決」等，當主持問到：「你是否喜歡唱歌？」假如你的答案跟其他大多數玩家不一樣，那就輸，就如電視節目《超級無敵獎門人》的遊戲。全部遊戲玩完需兩小時。「巨聲幫」老細劉威煌自信地說：「我哋花咗半年時間籌備，與同期興起嘅『密室逃脫』唔同。我哋係闖關遊戲，八位玩家要合作、亦要鬥拎高分。」另一老闆阿中滿腹大計說：「我哋遲啲會推出相關主題嘅小說，同搞虛擬樂隊。」投資額近一百四十萬，眾人雄心壯志可於半年至一年內回本。橋是過癮，但作為一盤生意，記者發現有後天不足之處。

劉威煌（右三）及細孖周志康（右四），與其他共十一個拍檔，一同開設「異類教育」。玩家讚好玩，只是實際營運上問題不少。

這遊戲叫「暴民之反擊」，玩法似 Killer，要以枱面上放有的平板電腦輔助。

位置：太偏僻

這類實體遊戲室，多設於旺角、尖沙咀等旺區商廈，方便客人即興組隊「挑機」。但「異類教育」位於油塘四山街工廠區，從港鐵站穿過房委會新開的商場「大本型」，再途經汽車維修場、貨倉，步行要十分鐘。記者第一次到遊戲室時，和另一群玩家同告迷路，須邊查 Google Map邊致電職員求助。
在工廠開工時間，「異類教育」樓下的貨車車水馬龍，沙塵滾滾，唯一的客用升降機十分繁忙，玩家來到都無「玩」的心情；晚間卻又渺無人煙，只有剛收工剝了上衣的工人行過，玩家又唔敢來「玩」。
負責「異類教育」電腦工程的李錦輝（阿輝）解說：「遊戲室需要大地方，好難搵，我哋一直主力搵工廈，咁啱識呢度業主，肯俾個好價。」「異類教育」佔地近三千五百呎，月租三萬，呎租八元多。事實上，觀塘、牛頭角一帶工廈，平均呎租較貴，約十三元，即同面積的地方，月租要四萬五千多元。一分錢一分貨，但阿輝堅持地點無錯：「如果真係一隊八位玩家都係女性，夜晚都會安排員工陪同來往港鐵站！」

在遊戲「多數決」中，玩家要在獨立的空間解答電腦上的問題，同時也要「出口術」，以揮低別人確保自己屬於多數。

一行人未能玩到最後一關挑戰 Prof. Trickster，唯有和紙板公仔拍照留念。眾人指遊戲中用到的電子儀器吸引，但遊戲室的隔音欠佳。

遊戲玩法：多限制

在「暗黑與想像」中，玩家須重組面前的短文，找出女生死亡之謎。

「異類教育」遊戲設定需八位玩家同玩，股東之一，填詞人宋沛言（阿言）說：「一開始已經係諗八個，咁踢波都要十一個啦！」但問題是，七個不成，九個亦不行，人數限制「無得傾」！開業後，他們發現客人往往湊不夠八個，負責日常營運的郭富榮（阿榮）說：「唔夠人數，會詢問訂咗差不多時段嘅玩家頂上。如搵唔到人，客人又唔介意，唯有搵員工頂上。」記者認為上述方法未能彈性處理問題，負責市場策劃的張宏熙（阿熙）再補充：「我哋嚟緊會喺網上設立『約戰區』，等啲人自己湊夠人數，希望解決到問題。」
另外，記者在遊戲室拍照期間，清楚聽到隔籬房另一批玩家的尖叫、玩樂聲，明顯牆壁未有加裝隔音設備。「喺裝修過程中，我哋已加厚咗啲牆同選用實心門。當初無預咁多隊人一齊玩，估唔到隔音咁重要，去到中段已好難修正。」負責舞台設計的李正綱（阿呆）說。「其實最傳聲係冷氣機槽，我哋已鋪咗隔音物料。有時玩家太興奮大叫，隔籬聽到咪當俾人感受吓氣氛囉！」記者後來隨另一隊玩家入遊戲室拍攝，一行人士氣高漲，但玩到「多數決」時，用作投票的平板電腦居然 hang機，系統須重新啟動，令人相當無癮。開業一個月，平板電腦原來已「督」壞了三部，「可能玩家太投入。雖然唔係貴嘢，但都係成本。」阿輝呻道。

星級裁判團

「迷之密失」老闆　吳子匡（ Eugene）
呢幾日好多客同我講玩過異類教育，佢哋都話好玩。其實概念都係抄《賭博默示錄》。我之前諗過做，但 turnover rate（翻枱率）太低，玩晒要兩小時，我哋搞『迷之密失』，玩完只需四十五分鐘。而且佢哋位置喺咁遠，啲客都話難搵，對我哋未係威脅。
成功指數： 50/100

香港海洋公園董事局主席　盛智文
二百六十八蚊（正價）嘅價錢，喺香港標準嚟講，唔係平。尤其佢哋針對嘅係消費力唔高嘅年輕人。如果要俾呢個價錢去玩，一定要好玩到令人難以置信！
成功指數： 50/100

玩家　陳小姐
呢度比逃出密室有多啲唔同嘅遊戲玩，而且唔似密室咁困住咗，解唔到謎就無得郁。遊戲中用到平板電腦幾新鮮，不過如果中間有機會拎一次貼士、易啲過關會更好！
成功指數： 80/100

香港城市大學商學院市場營銷學系副教授　梁偉強
呢類遊戲係俾機會玩家去歷險，學習點去同一批同時係隊友、又係對手嘅人相處。好多公司願意俾呢啲錢讓員工參與，如 team building，一定有市場。但個市場競爭咁激烈，如果只係俾到人一剎那刺激而無咩得着，就好快會被淘汰。
成功指數： 50/100

宣傳：錯估形勢

「異類教育」與近期流行的「逃出密室」系列，都屬於室內實境遊戲。雖然玩法上有出入，但都是針對同一群玩家，而後者早已開到成行成市。加上，「異類教育」現時收費每位二百二十八元，較「逃出密室」貴約一百元，價錢競爭相當輸蝕。而玩家亦偏向玩過就算，玩家黎先生說：「好玩啊，但除非有 second attempt discount，否則唔會再玩。」「巨聲幫」原來未詳細計劃「轉遊戲吸客」的安排，只粗略預算平均三個月轉一次，但熟客容易玩厭。為搶客，「巨聲幫」碌盡友情卡，製造「明星效應」。阿中說：「咁多 partner，個個有自己 network。」他們於上月開幕禮，請來張敬軒免費擔任嘉賓，又有其他「巨聲幫」成員，如林欣彤等試玩。同期又舉辦「 222宣傳」，「就係俾二百二十二人試玩。一來當宣傳，二來當壓力測試同收集玩家數據。」
不過，劉威煌承認，宣傳上錯估了形勢，「原計劃於七月開張，食盡暑假檔期，但因為太多設備未準備好，最後延至八月中先開幕。」他們希望保持神秘感，故只靠網頁及 facebook宣傳，而網站上亦完全沒有透露遊戲內容。採訪初期，更禁止攝影師以近鏡拍攝遊戲房的情況，希望吸引客人揭開「神秘面紗」：「點知咩都唔講，反而吸引唔到客，係要講啲唔講啲先最好。所以我哋製作緊廣告，遲啲會出。我哋仲會喺 facebook同網站透露更多遊戲細節，等玩家有多啲了解。」他說。

「異類教育」十一位股東和主要工作人員，每逢週一晚開例會，但眾人坦言很難約齊人開會，唯有把會議記錄寄給各人，好讓缺席者緊貼進度。

「異類教育」設有《異類精英榜》，以記錄開業以來最高分和最低分的玩家，其中歌手狄易達亦有來試玩。

延續夢想

劉威煌、大孖及細孖○九年參加《超級巨聲》，劉威煌更是當屆隊長，但未能勝出，現在只間中在 TVB大型節目中過鏡演唱一、兩首歌。而孖仔更少唱歌機會，主要在 TVB拍劇。不過由於樣貌太相似，即使記者和同事每晚追看《衝上雲霄 2》，至今仍未能分辨到飾演飛機維修員的是周志文還是周志康。
劉威煌坦言巨聲夢碎，要「搵定後路」，故近年積極創業，除了開辦「異類教育」，亦有和朋友開音樂中心，「比起頭兩年，近年的確少咗演出機會。但我唔會放棄演藝事業，亦唔會淨係坐喺屋企等機會，我寧願試多啲唔同嘢。」先有《超級巨聲》，後有《星夢傳奇》，演藝界長江後浪推前浪；食住名氣搵真銀，才是現實中的上策。

開業成本（ 07/13）

租金*　$90,000
器材　$300,000
軟件開發　$200,000
宣傳　$100,000
裝修　$500,000
雜費#　$180,000
總投資　$1,370,000
*兩個月按金一個月上期
#連儲備資金

營業資料（ 08/13）

營業額　$180,000
租金　$30,000
人工#　$65,000
入貨　$2,000
雜費　$7,000
賺　$76,000
#四位長工，四位兼職，未包老闆人工。

同場加映　生意跟進《逃出香港》股東內訌

記者今年五月訪問「逃出香港」時，尹思騰（ Instant，右）和施煒恒（ Raymond，左）互送高帽，指對方是最佳拍檔，但六月這對朋友已分道揚鑣。

本欄於今年五月，曾訪問成功掀起全港逃脫熱的《逃出香港》。當時他們氣勢如虹，不斷開分店，甚至發律師信予後來者告人抄襲。但原來該生意的多個股東已內訌，六月該公司發出聲明，指其中一位老闆尹思騰（ Instant）已離職。當日自稱是 Mensa天才會成員的 Instant，一直負責公司發展策略等事宜。據悉， Instant是因為和《逃出香港》其餘拍檔有款項達三百萬元的金錢糾紛，而被其他股東逼走。據知《逃出香港》亦已報警，警方正進行調查中。本刊向《逃出香港》查詢，但他們未有就傳聞作出回應。
《逃出香港》的擴展步伐因而放慢，現時分店有三間；行家「迷之密失」老闆說：「佢哋原本個勢好勁，幾怕追唔到佢哋！佢哋元朗同觀塘兩間分店，都遲咗開。原本仲話四、五年內上市添！」未知內裡誰是誰非，然而股東多，紛爭自然多，從來是生意人最頭痛的事。