壹週刊 第1226期

《飛虎》開拍續集，宣萱out換鍾嘉欣做女主角，馬德鐘留低，再加黃智雯及羅仲謙雙生雙旦。

上星期齊人拍外景，羅仲謙、黃智雯拍跳車戲，為免危險，二人只負責大頭近鏡，替身代跳。相反，只在頭及尾段現身的胡定欣，與嘉欣 BB拍追打戲時，兩女吓吓到肉，巾幗勝鬚眉！

胡定欣掃堂腿踢走鍾嘉欣手槍，初時就住踢，怕傷到對方，點知導演唔收貨，胡定欣加大力度，鍾嘉欣手指即中招。

一次搞掂

日前《飛虎 2》分別在昂船洲拍飛虎特訓場面，以及鍾嘉欣與胡定欣在西貢打餐死的戲份。拍特訓戲時馬德鍾、羅仲謙、梁烈唯及一班大隻港男齊人埋位，但當日戲肉是拍大隻謙教黃智雯跳車戲份。
由於要蒙眼企在行駛中的車頂跳車，有一定危險性，為免發生意外，導演下令用替身，大隻謙與黃智雯只是補拍起跳及跳到另一部車的近鏡。無論起跳及扮凌空跳到車頂，大隻謙都一 take過，唔使 NG重拍。

兩年前參加無綫功夫新星奪冠軍的廿一歲何佩珉，當日做鍾嘉欣替身，原來她已跟 TVB簽約，分別在《寒山潛龍》、《愛回家》及《飛虎 2》中以真面目演出。

弄假成真

輪到黃智雯，未做先嗌「好驚！」的她，起跳動作生硬，跳到另一部車的車頂時，劇情指她失足傷腳，拍了多次，她均無法做到凌空跳下的效果，最後還弄假成真，跪落車頂時，撞到上五寸下五寸。

羅仲謙、黃智雯的動作演出靠剪接，相反，鍾嘉欣同胡定欣就嚟真！胡定欣先要以掃堂腿踢走鍾嘉欣手上的槍，再膝撞對方腹部，之後鍾嘉欣反擊掟胡定欣埋鐵閘後，兩女再埋身肉搏。雖然有替身 stand by，但二人仍要親自上陣，結果，鍾嘉欣被對方踢傷手指。

蒙眼謙謙扮跳車，其實只係喺車頂凌空跳一下，無難度，之後再由替身代拍跳車頂危險動作。

手都震埋

誤傷鍾嘉欣的胡定欣事後說：「我同男仔拍會再去盡啲，嘉欣咁弱質纖纖，我都唔敢太大力，但收咗力導演又話唔夠狠。」
一早講明想借今次《飛虎2》搣甩 BB花朵的鍾嘉欣，表示拍動作鏡頭唔算太辛苦，反而是她在劇中角色有「創傷症」，要經常歇斯底里狂嗌，有時連收工都抽離唔到角色，好吃力！
「個角色性格同本身係兩回事，搞到我成個人好緊，有時仲會出現手震，啲同事話我就算唔使埋位，個樣都好兇！」鍾嘉欣說。

劇情要黃智雯失手，跪在車頂，最後弄假成真，導演滿意收貨，黃智雯痛到扁嘴。

黃智雯起跳時腳震震，堅持扶實手柄，她說：「又睇唔到嘢，架車又郁緊，我唔敢放手呀！」

武指（左一）教落地動作然後扮跌倒好痛，本身已經受傷的黃智雯更加七情上面。

視頻：《飛虎2》現場探班