壹週刊 第1232期

自從○九年 Paco黃栢高被金牌大風「燉冬菇」，愛將鄧麗欣（Stephy）與男友方力申決定共同進退，離開金牌並分別簽約內地公司海潤影視及華誼兄弟，轉戰內地發展。今時今日， Paco在太陽娛樂東山再起，並積極羅致明年初約滿海潤的 Stephy回流香港發展，坐鎮做太陽娛樂一姐，與此同時，更有意安排小方與女友雙雙過檔，一箭雙鵰。

一時傳已婚，一時傳離婚，實情二人感情打風打唔甩。

保持聯絡

離開金牌後， Stephy鄧麗欣轉攻內地，先後拍了三部內地劇及兩部電影，收入遠勝金牌時期，不過，明年初便約滿內地公司海潤影視的 Stephy，卻密謀回歸香港。
原來，昔日一手捧紅 Stephy的黃栢高，自一二年加入太陽娛樂後，一直密謀想與昔日愛將方力申和 Stephy再合作。
「當年金牌人事變動，小方同 Stephy一直撐 Paco，佢哋三個咁多年都有保持聯絡，其實 Paco入咗太陽娛樂之後，一路都有意簽番佢兩個，知道 Stephy就嚟約滿， Paco當然唔會放過機會。」知情人說。

放低蛋糕，小方再到餐廳外泊好 Range Rover坐駕。

Stephy一支箭衝入餐廳，在後面攞住大蛋糕的小方顯得小心翼翼。

九餅中， Stephy跟 Kary感情最好，二人不時有聚會。

小方包場賀女友三十歲生日，更與 Stephy好友及舊同學玩到癲。

千萬轉會費

小方、 Stephy見證金牌全盛時期，二人攞獎一定多謝 Paco。

有過合作經驗， Stephy對 Paco當然有信心，而且轉會費亦相當吸引。

「 Paco開到一千萬三年簽 Stephy，除咗出唱片，仲計劃好有兩部戲俾佢拍，但絕對唔會放棄內地市場，會繼續安排 Stephy返內地拍劇賺人仔。 Paco成日話，今年三十歲嘅 Stephy，發揮會比以前更大，所以舊年太陽娛樂開《等，我愛你》，都專登搵 Stephy拍。」知情者續說。

包場賀壽

本週二（十月十五日）， Stephy三十歲正日生日，生日前夕，男友方力申為女友包下餐廳開生日 party慶祝。

「踏入三十歲，可以話係人生新階段，小方專登幫 Stephy搞呢個生日會，係想俾女友一個難忘回憶，除咗請 Cookies成員 Kary、 Miki、 Angela，仲有好多係 Stephy嘅舊同學。」 Stephy身邊好友說。
已三十三歲的小方，揚言要三十五歲後才會結婚，同女友思想行動一致，亦同樣撐 Paco。

「 Paco好錫小方，亦有高人測過小方好旺 Paco，雖然佢同華誼仲有接近一年約，但 Paco已經開定聲，等小方回歸！」知情人說。
去年九月， Paco大鑼大鼓，成功簽得薛凱琪。

Stephy早已融入小方大家庭， 10年 Stephy便跟隨小方及其父到北京探親。（《忽然1周》圖片）

頭號愛將

每年頒獎禮，總會聽到歌手在台上講「多謝 Paco」，身為金牌經理人的他，捧紅過無數天王天后，要數 Paco頭號心腹，不得不提方力申和鄧麗欣。

親生仔方力申
自 00年方力申退役泳隊後便加入 Paco旗下的經理人公司， Paco更安排小方歌影視三棲發展；電影方面，先後拍過近 30部作品，後期與 Stephy以情侶檔拍住上的《獨家試愛》、《我的最愛》等，票房口碑絕不失禮；歌唱方面，一首《好心好報》以及和 Stephy合唱的《好好戀愛》更成大熱歌曲。

愛將鄧麗欣
02年加入九人女子組合 Cookies便成為隊長，後來踢走餅碎九變四； Stephy有得留低之餘更受力捧； 05年離隊獨立發展，首張個人大碟《 Dating Stephy》獲得白金唱片銷量；電影方面，由出道至今， Paco為她開拓電影路，全部擔正女主角；《十分愛》、《我的最愛》更是她的成名作，套套超過一千萬票房。