《星夢》鄭世豪十二月結婚 失婚楊明做伴郎

壹週刊 第1233期

一場《星夢》,令冠軍鄭俊弘、亞軍鄭世豪及屈居第四的姚兵由霉菜變紅人,無綫亮燈儀式都預埋佢哋一份。

上位有代價,鄭俊弘被迫跟秦沛女轉玩地下情,反之由比賽到攞獎都冇包袱的鄭世豪,卻趕在年底做老襯迎娶圈外女友。據知今年六月,鄭世豪在巴士求婚成功,同女友結婚變分手的楊明,因為有份做求婚軍師,年底會幫手做鄭世豪伴郎,唔怕觸景傷情。

失婚楊明做伴郎 《星夢》鄭世豪十二月結婚
35歲的鄭世豪即將做老襯。上週六(十九日)他與女友睇婚紗,沿途將她攬到實。

大排筵席

在無綫做「三打七」十二年的鄭世豪,贏得《星夢》亞軍跑出後,據悉近日無綫已跟他改簽親生仔約。事業不但見曙光,鄭世豪亦好事近,將於十二月初跟拍拖兩年的圈外女友結婚,可謂雙喜臨門。
《星夢》男大多屬窮光蛋,繼有林子博喊住話結婚多年,無錢買鑽石婚戒俾老婆後,屈居第四的姚兵,亦在節目自爆當年在寧波結婚無錢擺酒。雖然「一騷約」的鄭世豪在無綫同樣收入有限,好在他早年跟酒廊歌手黑妹李丽霞拜師學唱歌,常有機會跟實師傅登台搵食。據悉他每場歌酬五千,但密賺當三番,儲老婆本話咁易,故有能力豪花數十萬在旺角帝京酒店擺三十多圍酒,婚宴唔失禮。
至於戥穿石陣容,據悉除有爆紅的鄭俊弘,還有《巨輪》奸仔黃嘉樂,而伴郎重任,竟落在做不成十月新郎的楊明身上,認真玩嘢!


《星夢》冠軍鄭俊弘幫鄭世豪任婚禮兄弟。唔知婚禮當晚喊包世豪會唔會又開心到喊!

婚事泡湯,仲要同女友分手的楊明,可以收拾心情做老友世豪的伴郎。

陪老婆試婚紗

上週六(十九日)中午,鄭世豪以嘉賓身份到元朗出席剪綵騷,為婚禮使費搏命掘金,收工後便坐的士趕往尖沙咀,會合在附近等候的四眼準老婆。看似粗豪的鄭世豪,全程攬實準老婆行去婚紗鋪,更攞手機幫手影低女友每一個婚紗造型,夠細心。

事後記者致電準新郎鄭世豪,求證他搵失婚楊明做伴郎一事,他說:「六月搵佢做伴郎,嗰陣都唔知佢結唔成婚,以為佢延期咋。之後我有問怕唔怕尷尬,佢話冇問題照做。」捱足十二年終於有出頭,對鄭世豪而言二○一三年意義重大。「六月求婚嗰陣,面試《星夢》被叮走,真係冇諗過之後可以入圍仲贏埋,今年對我嚟講係雙喜臨門。」

鄭世豪女友
女友試上多款婚紗,準新郎鄭世豪不但冇唔耐煩,反而經常拿起手機幫她影相。
鄭世豪女友
鄭世豪女友
外形粗豪的世豪其實係浪漫男友,數月前他選擇在巴士給女友一個驚喜求婚場面。
鄭世豪女友
拖女友試婚紗前,鄭世豪跑到元朗出席剪綵騷,搏命搵錢。

求婚大龍鳳

至於伴郎楊明,則踢爆鄭世豪求婚浪漫,為成功娶妻,當日搵埋班兄弟幫拖做大龍鳳。「我唔只幫佢做伴郎,仲同黃嘉樂幫佢上演巴士求婚記。嗰日世豪安排我哋班兄弟早一個站上巴士,班姊妹就遲一個站上車,佢拖住女友扮偶遇我哋,之後成班人圍住佢女友送上玫瑰花,世豪就攞隻鑽戒跪低求婚,當時好夜,巴士上層得兩個乘客,不過佢哋見世豪求婚成功,都同我哋一齊歡呼。雖然當時自己做唔成新郎心情 down爆,但見老友結得成婚都戥佢開心。依家我已經放低件事(失婚),做伴郎冇問題。」

為撮合老友鄭世豪人生大事,黃嘉樂(中)同楊明有份幫他上演一場求婚大龍鳳。
為撮合老友鄭世豪人生大事,黃嘉樂(中)同楊明有份幫他上演一場求婚大龍鳳。

繼《星夢》決賽拉隊撐鄭世豪後,《法網狙擊》一班演員森美、陳敏之及陳志健、蕭正楠又設宴為他慶祝,可見他甚有人緣。