古仔（古天樂）應不愛講古仔（故事）。
有過輕狂歲月的小白臉，看客們追逐他幾時再惹上官非或緋聞，怎知完咗就完咗，近十年來除了拍戲都係拍戲，像關正傑只等於唱歌，悶，卻專業。
面對 Mr. Cool，索性由冷笑話問起：「你保持膚色咁黑，不會為演《少年包青天》吧？」古天樂木然答道：「你點知唔係？我連情節都構思好——
「少年的包公本來白淨、開朗嘅，有許多天真想法，甚至是一個發明家……」何曾見過古仔如此投入講故事？而且似在講自己：「是後來目睹太多政治腐敗、世間爾虞我詐，終於他選擇古肅，選擇黑口黑面，揸正嚟做。
「我傾過條橋，人人當我開玩笑。」
古肅天樂也選擇黑面。古叔，因為眼前的男主角剛四十三歲了，不再少年時。
少說話
經歷了咁多，想不出什麼比家人、親屬更真實。
就別理會筆者怎樣邀約古天樂，另有內情，並非故作神秘或自抬此篇彌足珍貴，反正古氏專訪極罕，做，也不健談。
「現時有幾多部戲拍緊？」「兩部。」「今次不是為宣傳某一部？」「很多年不會了。」「係唔相信專訪可以幫到電影？抑或根本唔相信專訪有意義？」「總之少說話多做事。」
咁，很難問下去，於是我提出兩點假設：
一、站穩陣腳了，不想靠??撈，而接受得一次勢不免順得哥情失嫂意（包括片商和媒體），唯有盡量婉拒。
二、作為專業演員，愈少談私生活，愈容易令觀眾投入信服其角色。
古天樂終於答得較長：「你說的都有道理，但我無諗得咁複雜， day one入行我便少嘢講，如果紅咗才扮 cool，我覺得很肉酸。連所謂好新聞我也不想登，利用記者寫了好新聞，下次壞新聞便要求人家不追問，兩不拖欠穩陣。
「關於第二點，劉青雲見解類似。他說所以我演麻甩肥佬都有說服力。為求神似，我跟貨車司機生活過幾日，這種事別事先張揚，否則班司機會當成陪明星趁熱鬧。同樣道理，我不相信公開講的能有幾多真心話。」
圈中老友數劉青雲？
「當然。合作了十部，第一部是《絕世好Bra》，兩個唔出聲的人初次埋牙便來套搞笑，反而順利，勝在無乜多餘嘢。
「愈有心拍喜劇的人，愈不要隨身袋住幾個笑話，一不小心對着重複的人講了重複的笑話，就肉酸嘞。根本藝人最好別自發噏東噏西，下次做代言人時容易被摷番前言不對後語，網上搜尋，一?乜都記得。」
筆者記得某食神未拍百佳廣告前曾揚言不屑去超市。古天樂當然沒搭嘴，他不講廢話的。
多做事
劉青雲古天樂，兩條炭。與前者天生黝黑不同，古仔白底，後天加工得一發不可收拾。美白能病態上癮，美黑何嘗不是？
「我是真心喜歡黑，無乜原因。出 trip不方便照太陽燈，又話咩皮膚癌，少曬了。同青雲做對手戲好，唔使遷就；以前在 TVB拍劇，燈光師叫我坐定便唔好郁，因為花旦要白。」
關風水事？
「當然唔止一個『高人』同我講愈黑愈旺——事後吖嘛，事前一個都無，事後就諸葛亮的說話，我不可能信吧。」
與劉青雲意氣相投，很難不聯想到獎項。近年古天樂逢拍必大片，台前幕後皆金像獎常客，斯人獨憔悴了。
「同青雲比，我肯定未夠年資。他好遲才攞影帝，攞到，大家驚奇：『咦乜青雲原來未攞過？』咁先好，攞到你心服口服，眾望所歸，怕什麼遲？
「一部電影拍成便有本身生命，演員和導演亦不再控制到，唔同做歌手有所謂 fight獎造勢。只可以等評判睇作品，但連我都絕少翻睇自己作品，除了拜年那幾天，在親戚家，電視播着我的賀歲舊片，親戚又唔好意思轉台，幾鬼尷尬。」
有些出人意料又眾所周知，古天樂至今一直與父母同住，一直每年跟着去拜年，戀家得不符合既定形象。
「感性說話我唔識講，但經歷了咁多，想不出什麼比家人、親屬更真實。」
「少年的包公本來白淨、開朗嘅……」
《神鵰》的楊過比小龍女更白。
古天樂說，與劉青雲是不會一齊去蒲的朋友。
租了個貨倉來擺玩具。
寵愛
古天樂例牌拒提戀情。關於愛，讓我們談談玩具及寵物。
「那些公仔，不單為收藏，也為工作。眼見荷李活出咁多勁嘢，我常常請電影人到我貨倉，對住一比一 figure，大家努力諗諗吧。
「曾經有鬼佬特技師同我講：『你們香港也做到了，只不過未做完。』並非客氣並非諷刺，香港真係，搞出一條預告片或者一個場口作賣點就夠，係咁多。」
唉，嗜好也離不開事業，那養狗呢？
「我沒養狗了，自從牠『走』後。我唔會俾錢買寵物，拍戲時人家送的，當日收工牠便乖乖跟我上車，怎能不疼錫呢？到牠過世，我哭得直頭世界末日，牠是我親人。朋友勸我另養一隻，我話：『你會不會失去一個親人就搵過另一個親人？』
「有人愛狗的方式是不斷養，我會答，我現在無養，但唔改變我愛狗。」
約定
對，豈會忘情棄愛？唯無必要逢人便答。通常，我會誘導被訪者揀記者（即係我），但印成報刊，其實無得揀讀者?。
對着 Mr. Cool，耍唔到佢。
真有點無話可說了，古天樂大概也不好意思，忽然道：「你過幾年訪問我吧，我到時會有新狀況，現在不能透露的。一般操守是講得出要做得到，我實際啲，做得成，先至好講。」
無言為定。
戰爭與和平
這天古天樂剛從新加坡回港，機場直接往 salon，整頭預備黃昏拍廣告，但他說算清閒，可做訪問。
拿出新玩具拆盒——防水耳筒。「你睇，無窿的，架在太陽穴利用耳骨震動，也不貴，六百幾蚊，我在飛機見到即叫助手買。」此刻古仔悠然自得。
筆者卻悵然——理應娛樂無窮的娛樂圈尖子竟無趣得像 business men獨享空中購物樂，賺咁多錢為乜……
他繼續說：「其實聽音樂唔使開咁大聲，只不過周圍太嘈，潛入泳池底靜靜聽，正！」
其實男性的物慾亦唔使咁強，正如六百幾蚊，但想到要置身於無人騷擾的豪宅泳池，錢缺不得，萬事如是，難怪古天樂咁拼搏。
開大聲為了細聽；忙碌為了悠閒；武裝得潑水不入，為了和平。
壹週刊 第1233期
撰文：余家強
攝影：羅錦波
協力：歐陽慧芯