曾勵珍放生 陳山聰賤價返TVB拍劇

壹週刊 第1240期

何家女婿夢碎,全世界睇死四失(失女、失事業、失財、失形象)陳山聰一定扮矮仔返無綫拍劇。面子緊要,就算監製王心慰七月叫他回巢拍《忠奸人》,四失聰依然企硬,拒吃回頭草。

但停工兩年有出無入,四失聰最後向現實低頭,主動聯絡高層樂易玲,但失勢樂大媽一直採取拖字訣,四失聰於是向製作部戲劇製作總監曾勵珍埋手,騷價被斬三分一,月內將會上《獎門人》做嘉賓,測試市場水溫。

珍姐放生 陳山聰賤價返無綫
早前不時西裝骨骨外出的陳山聰,曾表示有工作在身,無意回歸拍劇

主動求饒

四失聰自今年四月同何家超雲分手後,一直潛水無影,曾表示無意重返無綫拍劇的他,上月中為好友醒獅活動擔任嘉賓時,忽然改口風:「我曾經同樂小姐(樂易玲)見過面,拍劇,隨緣啦!」
據了解,當日陳山聰倫敦落泊返港,眼見他中年四失,樂易玲曾做好心,吩咐所有監製如有需要,可以 call四失聰埋位。而曾經與四失聰合作過《最美麗的第七天》,以及《 Only You只有您》的監製王心慰,主動叫他在新劇《忠奸人》中做大奸角,卻遭四失聰一口拒絕。樂大媽見對方唔領情,決定當佢透明,就算四失聰知衰主動約食飯,樂大媽唔會再上當。「見你咁慘,開聲叫人俾 job你做,又嫌三嫌四,況且大媽鬥唔過 SY(余詠珊),自身難保,仲邊得閒理佢呀!」一名無綫中人透露。
回歸拍劇心切,四失聰馬上轉膊,搵樂大媽另一死敵、製作部戲劇製作總監曾勵珍埋手。起初珍姐表現冷淡,不過有人面皮夠厚,日日搵、搏好感,講到明知衰,願意由二打六做起。睇準四失聰心急復出,珍姐食住上,將他的騷價由五千不足, cut到二千有找,生活逼人,四失聰只好一口應承,珍姐亦二話不說安排他上《獎門人》做嘉賓,預演回歸。


拍拖期間曠工無影,何超雲出面為四失聰拉攏樂易玲擺和頭酒。

四失聰拍過珍姐曾勵珍的《窈窕淑女》,近日成功冧掂對方開綠燈回巢拍劇。

今年七月,四失聰拒回巢拍《忠奸人》,角色最後由張繼聰頂上。

添哥棄用

上月底就有人見到四失聰手持劇本現身無綫化妝間,以為他埋位拍李添勝古裝新劇,但原來添哥已經將他列入黑名單。「當日《天梯》俾晒好位佢(四失聰),竟然掛住拍拖,無晒影,添哥私下同我哋話,陳山聰養唔熟,佢知道添哥開新戲都有 call過監製打招呼,但演員一早已經定好晒,無山聰份!」

得把口


近日積極跑步修身的四失聰,明顯清減不少,稍後時間更會參加馬拉松比賽。

曾高調表示,無意重返幕前的四失聰,其實只係為啖氣。「阿 Joel(陳之洋名)知道全部人睇死佢箍唔成煲,實返去無綫拍劇,佢自己知自己事啦!當年顧住拍拖得罪公司咁多人,佢同人呻過返到去實死冇生,寧願試吓做其他嘢,真係做唔掂先算,點知捱得嗰半年,咪又係要返無綫。」陳山聰的友人透露。

樂易玲曾勵珍證陳山聰回巢

曾勵珍與樂易玲昨晚證實陳山聰回歸,明年1月會拍李添勝監製的新劇。戲劇製作總監曾勵珍說﹕「不要用『投靠』兩字,每個有演技的演員都歡迎返屋企,是有新計劃。(先安排陳山聰錄《獎門人》試水溫?)無試水溫,適合便回來拍劇,已經有幾個監製搵他。(說他搲撈?)信我,不是,他是簽了新合約。」

製作資源部總監樂易玲透露陳山聰明年1月拍添哥新劇。對於她被指失勢,陳山聰轉投珍姐?她笑說﹕「咁快啲投向珍姐懷抱。(傳陳山聰要減騷錢?)無,他上個月已簽,有根據市場環境加騷錢。(有無叫他簽約後不要再掛住拍拖?)我幫你哋同佢講。他現在操fit回來,演出角色有發揮。」