宣萱與拍拖兩年的外籍獸醫 Ruan Bester一一年分手後，感情一直未有着落。四十三歲的她近年主力內地搵食之餘，亦積極物色新男人。記者早前發現她與一名年約五十歲的內地土豪，在銅鑼灣一間餐廳共處七小時，由下午四點對到十一點餐廳閂門。目標出現，冇放過！

恨嫁宣萱成功搭上土豪，早前二人拍拖到銅鑼灣撐枱腳。

唔使人招呼

一而再因為逼婚，搞到甩拖的恨嫁宣萱，即使貼埋大屋把心嫁獸醫男友 Ruan，但臨門依然撻 Q！
屢敗屢戰，立志搵水泡的宣萱，最近睇中一名內地生意人 S先生，為免錯失良機，四十三歲宣萱積極行動。
上月尾，二人前後腳相約到銅鑼灣一間餐廳撐枱腳。當日下午四時，身穿西裝打扮斯文的 S先生先到達食肆，半小時後，明顯打扮過的宣萱才施施然到達，二人選擇坐在一間有四張枱的玻璃房內，宣萱男友要求拉上簾，並吩咐侍應不要入內騷擾。
「佢哋由下晝四點坐到夜晚十一點餐廳關門先肯走，足足霸住張枱七個鐘！佢哋分咗六、七次叫嘢，次次都係叫少少；每次有侍應行入去，佢哋就刻意靜晒。個男人應該氹得宣萱好開心，因為不時聽到佢哋細聲講大聲笑，期間個男人又提出宣萱喺內地有乜需要，佢都可以幫手。」知情者說。
對食七小時，直至食肆休息，一臉滿足的宣萱才與男友一齊行去停車場攞車，由宣萱揸車直駛她西貢寓所方向。

食足七粒鐘，一面滿足的宣萱孖住土豪行去停車場攞車，沿途依然傾唔停。

宣萱唔介意做埋柴可夫，親自揸車送新歡返歸。

買屋留後着

自從離開 TVB後，宣萱主力內地搵人仔，上月在北京《第四屆樂視影視盛典》頒獎禮，憑內地劇《悠悠藥草香》奪得「喜愛角色」獎，又在訪問中暗寸舊主，自己靠個人努力得獎，毋須以續約換獎。
搵食瘟仔都走祖國咇，在內地密搵超過兩年的宣萱，儲埋唔少！去年九月以一千三百二十萬買入清水灣曉嵐閣一個千五呎單位與父母同住。未搵到「碼頭」泊岸，起碼都有間姑婆屋做後着，凡事留一線，宣萱好醒！

宣萱日前出席慈善活動，直指 TVB劇集欠新意，故有意撐王維基拍港視劇。

新屋準備入伙，早前宣萱與媽咪去睇餐枱、梳化等傢俬。


頻頻買磚頭的宣萱，去年再度出擊，以 1320萬買入西貢曉嵐閣單位。

去年宣萱曾被指搭上薛凱琪黑人舊愛 Reggie Martin，二人更被拍得到酒店密會三粒鐘。

當日二人在利園一間西餐廳由下午四點食到十一點，更吩咐員工拉窗簾，零騷擾撐枱腳。

屢戰屢敗

入行二十一年，宣萱公開承認的有四段情，可惜次次臨門一腳，都分手收場。

張衞健
93年與張偉健合作電視劇《龍兄鼠弟》種下情緣，為免影響事業，兩人一直地下情，但戀情也只維持了兩年便告終。

榮文瀚
96年，由朋友介紹認識中信泰富主席榮智健的堂姪榮文瀚，二人大方公開戀情，拍拖六年更一度傳出婚訊，最終因聚少離多分手。

陳建緯
03年與家底豐厚的牙醫陳建緯撻着，雙方已經見晒家長，宣萱更揚言願意為愛情犧牲事業，退出娛樂圈，恨嫁之心表露無遺，但拍拖兩年，又散。

獸醫 Ruan
09年，愛狗的宣萱戀上細她四年的外籍獸醫 Ruan，兩人視對方為結婚對象，宣萱更遠赴南非見家長，以為好事近；但這「寵物情緣」始終分手告終。