上星期，三十三歲的黃宗澤（ Bosco）突然爆出與四十二歲過氣名模楊崢姊弟戀三個月，二人先後被目睹在西貢拖手、一塊曲奇兩份食，又被途人拍下在深灣遊艇會拖手談心親嘴照片，劇情原來還未夠精彩！
據知， Bosco去年曾向一北京富商千金 Tina展開追求，甚至見過家長，澤媽對 Tina亦讚不絕口，落晒力撮合二人好事；可惜神女無心，今年一月被拒愛的 Bosco，忽然爆出搭上楊崢，過程戲劇化，連澤媽都藐爆。
有錢有樣
不少黃宗澤身邊朋友，都知他的女友是一名北京富千金，但上星期突然爆出 Bosco與楊崢發展姊弟戀，戀情峰迴路轉。
「上年十月左右， Bosco同玩開嗰班朋友講自己追咗個北京有錢女，又話個女仔有錢個樣又靚，仲話等發展穩定就公開戀情，講到好認真。個幾月前， Bosco終於帶咗 Tina出嚟介紹俾圍內朋友識，就算喺班朋友面前，佢對個女仔都好到痺獻晒殷勤咁，點知新年過咗就冇聲冇氣，無端端仲要爆個楊崢出嚟，雖然成班朋友知道佢嘅女神係楊崢同陳嘉容，但一樣 O晒嘴，冇諗過佢哋會撻得着。」知情者說。
北京富少女 Tina
一月才被 Tina拒愛的 Bosco，二月初便爆出與楊崢發展姊弟戀，兩人在深灣遊艇會拍拖時，被途人拍下情深一吻的照片並上載討論區，火速成為熱話。
見過黃阿媽
本刊早前也曾目擊澤媽與 Bosco女友 Tina一齊返回火炭的寓所，二人沿途有講有笑，十分融洽。
「 Tina屋企係做石油生意， Bosco舊年年中開始追佢，都有帶過佢去九龍城自己開嗰間蠔吧食嘢，仲介紹埋媽咪俾 Tina識，澤媽勁鍾意個女仔，話佢有禮貌係好女仔，仲出晒力幫 Bosco追 Tina，除咗主動約 Tina出嚟見，又幫 Bosco講晒好話，可惜 Tina唔鍾意 Bosco呢類口花花吊兒郎當男仔，今年一月仲同 Bosco講清楚，大家冇可能再進一步，做朋友就冇所謂。」
澤媽見 Tina
早前， Tina從北京來港， Bosco媽咪主動約她見面，坐住架名貴房車 Bentley的 Tina載埋黃媽媽齊齊返 Bosco位於火炭的寓所，全程有講有笑，相處融洽。
提起楊崢，澤媽即耍手擰頭頭冇回應。
一向以孝順見稱的 Bosco，在黃媽媽六十歲時為她搞大壽慶祝，氹得媽咪開心不已。
一反常態
當「崢澤戀」爆出時，楊崢夠膽揸住 Bosco架仿古董車出席公開活動，出奇地高調。
生吞檸檬的 Bosco火速搭上比自己老九年的熟模楊崢，還一反過往低調作風，十分異常。
「佢同楊崢識咗好耐，久不久都有出嚟玩吓飲嘢，一直都冇聽 Bosco講過話一齊，而家仲話拍咗三個月拖？但之前明明係追緊個北京有錢女，無可能會同楊崢拍咗三個月拖！ Bosco好孝順，佢拍拖一定會帶俾阿媽見！仲有，佢無理由會咁唔小心，仲要一問就認拍拖，完全同以前嘅做法唔一樣，唔知搞乜。」黃宗澤身邊友
人說。
冇晒面
「崢澤戀」爆出後，不少人均議論紛紛，據知，澤媽對 Bosco與楊崢搞埋有
微言。
「 Bosco媽咪好唔開心！以前胡杏兒雖然係霸道啲，不過對佢老人家好好，亦真係對佢個仔好，幫到 Bosco。至於 Tina又靚又有錢，澤媽勁鍾意，好鼓勵個仔追佢，可惜撻唔着。楊崢大 Bosco九年，又多負面新聞，連啲親戚都打去問佢點解 Bosco會揀個年紀咁大嘅，搞到澤媽都唔知點反應好。仲有， Bosco冇同澤媽提過，佢都係睇報紙先知個仔拍緊拖，所以有啲嬲。」知情者說。
有鋪有樓
胡杏兒與 Bosco相戀七年，二○一一年女方奪視后時公開愛的宣言，翌年卻分手收場。
姊弟戀夠奇幻外！ Bosco的身家幾級跳，亦令不少人稱奇。
「 Bosco同我哋講話一個月買衫錢都十幾廿萬，又話自己有三間鋪同兩層樓，要趁呢期個市麻麻入多間鋪，之前佢都睇過古巨基擺花街個鋪位，不過要成六千幾萬，即刻嚇窒。
「好老實， Bosco喺 TVB拍劇賺幾多吖？好似之前話掟咗八百萬喺馬來西亞搞酒吧 House Music Club，實情係佢埋到啲拿督堆，人哋預埋佢玩，所以邊使夾八百萬咁多，吹啫！不過咁， Bosco仲有個鋪喺沙田，尖沙咀又有間酒吧，九龍城間蠔吧開咗冇耐就話想整間喺香港區，佢係好有生意頭腦嘅。」 Bosco身邊友人說。
埋富人堆
一心進軍飲食王國的 Bosco，為方便在商界打開門路，積極廣結有錢人。
「以前好多都係胡杏兒幫佢搞，兩個散咗之後， Bosco就開始同啲有錢人玩，好似大年初二，曦哥（晨曦球隊班主周文曦）喺山頂屋企個 club house搞新春團拜，請咗百幾人，打吓麻雀玩吓啤牌賭吓錢， Bosco都有去，自己一個嚟，在場啲女仔見到佢，好似蜜蜂見蜜糖咁， Bosco都玩得好開心，以為佢仲係單身添。」
星期一（二月十日）晚，本刊在九龍城南角道 Bosco開設的蠔吧見到澤媽，提到有關 Tina及楊崢，澤媽煞有介事，一支箭坐上車，又搞笑地否認自己是 Bosco媽咪，之後又表示：「我乜都唔會講。」一時一樣！
近年來， Bosco被發現愛埋有錢人堆，認識了不少上流社會人士，今年的年初二， Bosco單拖出席周文曦在山頂屋企會所搞的新春團拜，現場被不少女士圍住，同場還有 Hotcha的 Winkie及梁烈唯夫婦等人。
Bosco高調承認與楊崢相戀之後，胡杏兒約埋好姊妹胡定欣、姚子羚、黃智雯及胡蓓蔚在家中相聚。
雖然 Bosco表示與楊崢相戀三個月，但近月來，本刊卻只拍得 Bosco放假時多數一支公逛街的照片。