《衝上雲霄》開拍電影版，除搵古天樂做機師、鄭秀文做何年希，至於本來預咗徐子珊做Cool魔女友，臨時被飛走，改由回巢TVB嘅佘詩曼頂上。

上星期二（六月二十四日），同朋友飛去米蘭過生日嘅徐子珊，就校啱時間晨早六點幾返到香港，之後直接返屋企，放低行李，又出席活動。聽講徐子珊為咗呢次被飛，近排就成日請假，佢梗係嬲啦！明明到手嘅嘢，無啦啦被人搶走，唔放吓假又點下呢啖氣。

今次徐子珊被踢走，原來係樂易玲應承過阿佘，如果公司開電影，必定由她做女主角。雖然阿佘喺戲內做Cool魔張智霖前女友，但查實戲份要同內地女星楊子珊瓜分Chilam，佔戲其實唔算多囉！

其實今次電影版，角色都全變陣，而之前成日同男主角有爭拗嘅陳法拉果然冇得留低，換咗 Sammi，再加埋新機師古天樂，就同台灣郭采潔做一pair玩異地情。