上月宣佈添食至700集嘅無綫處境劇《愛·回家》發生大地震！第一個被震走嘅就係心散自大嘅「馬子妮」蔣家旻喇！

喺劇中飾演乖乖女嘅蔣家旻，恃住自己喺電影《第一次不是你》做過女一，就以為自己好有料，工作態度麻麻。

高層曾勵珍就忍咗佢好耐，最近終於下令要佢喺劇中「人間蒸發」，安排佢出國進修。據知高層就以半年反省期做懲罰，到劇集就嚟大結局先安排蔣家旻回歸埋尾。

不過無綫叮人手法都好辣架，先氹咗一路諗住闖影圈嘅蔣家旻續約，之後先再叮佢出局。被公司咁玩法，蔣家旻梗係喊爆喇！馬家班演員都好唔捨得，仲幫佢搞咗個farewell飯局。不過其實怪人不如怪自己，當初點解唔好好做好份工呢？

高海寧大熱「回家」

《愛·回家》大地震！被震走嘅又點止蔣家旻一位呀，「小炒王」朱慧敏亦都處於震央附近，危危乎！

由開劇到添食都堅持同導演、助導，每隔幾日就炒大鑊嘅朱慧敏，仇家多到數唔晒！

其實佢自己都知衰架喇，不時都有搵珍姐傾偈補飛，又同編審飲茶灌水，再做埋「金手指」篤湯洛雯自保。但係「民意」呢家嘢點到你漠視呀，珍姐最後都係決定要叮走朱慧敏！呢排《愛·回家》係咁加戲俾朱慧敏，其實就係想谷晒佢啲戲，跟手就會話佢決定出國發展。

有人out就有人in，據知高海寧好大機會補上，加入呢個入晒屋嘅長壽處境劇！高寧呢勻真係冷手執個熱煎堆！