去停車場攞車戴口罩，去眼鏡鋪戴口罩，同波友張兆輝食茶記都戴口罩！原來黃日華華哥為咗避免老婆梁潔華受細菌感染，一家都要高度戒備。

53歲華嫂證實患上急性血癌，完成咗5次化療嘅佢，體重急跌至97磅。據知華哥為免老婆再受細菌感染，禁絕親友到醫院探訪，又試過投訴醫院唔夠乾淨，而佢自己出入都一定要戴口罩。

呢日見到華哥，成個落晒形，問到太太情況如何，佢就話：「OK㗎！」其實實情華嫂病情唔多樂觀，化療後癌指數冇降低，要康復就要搵合適骨髓移植，可惜全家骨髓都唔啱用，到依家都仲搵緊。

由舊年底發病到依家，華哥堅持俾老婆住單人房，成三千蚊一晚，加埋醫藥費，半年就已經使咗成200萬。而除咗要出埠工作，華哥都會定時定候探老婆，每次都會留足兩粒鐘，認真係愛妻號！

黃芷晴晒母近照派定心丸

黃日華老婆梁潔華證實患上急性血癌，有雜誌指華嫂暴瘦，病情危急。囡囡黃芷晴6月16日出席活動，展示咗3張同媽咪影嘅近照，向觀眾大派定心丸。

「其實我上次去event已經承認佢嘅病，估唔到大家反應咁大。媽咪唔想記者同身邊朋友擔心，吩咐我今次要帶近照俾大家睇！」黃芷晴透露三張相都係喺母親節時候影嘅，華嫂精神尚算唔錯。

至於有指醫療費高昂，兩父女要撲水籌錢，黃芷晴就咁回應：「絕對冇呢件事！啱啱喺內地拍完電影，返到嚟工作量多番，出席好多活動。」問到媽咪係咪已經完全康復？黃芷晴就話要keep住睇報告同覆診。

黃日華出入口罩禁親友探

老婆梁潔華證實患上急性血癌，愛妻號黃日華即時緊張大師上身，搞到阿女黃芷晴都好大壓力！

據知今年4月，華嫂完成第四次化療，獲批准出院，黃日華即時安排老婆喺沙田凱悅酒店長住，等佢專心養病。黃日華又吩咐家傭每日到酒店房消毒兩次，但出院唔夠兩個星期，華嫂就因為細菌感染再入院。

據知黃日華為呢件事非常內疚，更加提高警覺，出入都戴口罩。呢次入院更加禁絕親友探訪，屋企又買埋好多消毒物品，總之所有嘢都要一塵不染，又試過投訴醫院唔夠乾淨，搞到阿女都好大壓力。身邊朋友都勸華哥放鬆啲，話咁樣會影響華嫂病情。