體重膨脹至145磅嘅衛蘭，被老闆黎明形容為「肥過部電單車」。再加上做嘢心散，有傳黎明決定今年約滿後唔再同佢續約。但細妹衛詩自藏毒一事之後再無工作，獨力養家嘅衛蘭驚無飯開，唯有向黎明認衰，仲保證會努力減肥。

最後黎明就同佢續約三年，不過8月衛蘭就要埋位為年底演唱會拍性感海報。要極速變番以前咁索，黎明就幫佢搵嚟成功幫欣宜減磅嘅張玉珊幫手喇！張玉珊出名穩陣，佢就要求被人叫做「迷幻姊妹花」嘅衛蘭承諾戒煙，仲要驗埋血。

上個禮拜四，衛蘭好乖咁喺公司同事陪同下，去尖沙咀做機。之後會合埋細妹去行超市。雖然已經減咗6磅，但衛蘭依然周身肉，精神都唔多好，好大對黑眼圈。見佢哋掃咗一大袋生果先鬆人！睇嚟呢次衛蘭減肥決心都好大喎！

昔日祖兒勁敵

145磅嘅衛蘭，108磅嘅衛蘭；145磅嘅衛蘭，108磅嘅衛蘭。各位粉絲，接受現實喇！呢個就係依家嘅衛蘭！145磅！憑住一把靚聲加甜美外形，殺入樂壇嘅衛蘭，事業亦都隨住佢嘅身形大起大落。

04年衛蘭正式出道，鬼妹仔嘅佢憑住翻唱黎明舊歌火速走紅，橫掃所有頒獎禮女新人獎，仲打入《叱咤》「我最喜愛女歌手」三甲。07年仲已經殺入紅館開演唱會，升晒grade嘅佢成為廣告商寵兒，接廣告接到手軟。佢更一度踢走天后容祖兒成為某護膚品牌代言人。

不過風光日子只維持短短幾年，接而連三嘅負面新聞，令衛蘭不堪壓力，不斷膨脹，事業亦都全面插水！2014年仲以脹爆身形擔任伍樂城演唱會嘉賓，嚇窒一眾粉絲！