雙胞胎女兒愛Hello Kitty 黎姿夫妻大坑做排隊黨

既要照顧馬家一大三細,又要睇實於上月開分店的皮膚科診所,公私兩忙的黎姿,上週五(六月二十日)孖住老公馬廷強,帶埋下月滿四歲的孖女 Pricia(大孖家蔚)和 Gianna(細孖家鎂),到大坑做排隊黨,試食月初新開張的 Hello Kitty主題餐廳。
閒日依然大排長龍,等足成個鐘都無位,大細孖開始扭計,廿四孝老豆唯有轉買外賣,氹囡囡開心。
對七年前遇交通意外,命懸一線的胞弟黎嬰,黎姿同樣仆心仆命。早前黎嬰在黎母陪同下行街,坐在輪椅上的他,精神飽滿又不時同身邊人微笑交流,康復之路漫長,但黎姿永遠樂觀。

壹週刊 第1268期:孖女愛Hello Kitty 黎姿夫妻大坑做排隊黨
同黎姿餅印一樣的大孖 Pricia,等位等到唔耐煩開始扭計,要媽咪抱實,至於在車上的細孖則全程紮紮跳,自得其樂。

扭媽咪抱

Hello Kitty幾乎無女不歡!黎姿一對孖女 Pricia(大孖家蔚)和 Gianna(細孖家鎂),也是 Kitty小粉絲。主題餐廳月初在大坑開業,為氹孖女開心,上週五(二十日),黎姿唧出時間,與老公馬廷強一齊,帶孖女落大坑做排隊黨試菜。
下午五時半,孖女由外傭陪往,坐七人車抵達大坑,司機落車了解排隊情況,原本坐在後座的細孖 Gianna,一馬當先爬上車頭位置,眼仔碌碌望住餐廳外的情況。
十分鐘後,黎姿同老公到,見到爹哋媽咪,細孖第一時間詐嬌扭抱,大孖亦樹熊上身,從另一邊夾實媽咪,要馬廷強幫口又出手,與外傭合力才氹掂大細孖乖乖坐低。


孖女的保母車先抵大坑,細孖 Gianna由外傭姐姐抱住,坐車頭睇街景。大孖 Pricia(右)就在後座舔車窗。

上週五黃昏,黎姿同富商老公馬廷強專程落大坑,為寶貝女排隊試食 Hello Kitty主題餐廳。

外賣補數

兩公婆唔介意大熱天時為囡囡做排隊黨,但小朋友耐性有限,等唔夠一小時,大孖 Pricia開始扭計,黎姿一手將她抱起,再指住人龍,解釋要排隊等位。之後大孖走埋去餐廳門外,與巨型 Hello Kitty公仔影合照。
至於細孖,發現家姐、媽咪唔見咗,隨即在車上嚎哭,外傭急急抱住細孖搵番媽咪,一樣於事無補。最後,決定放棄等,一家人上車打道回府。
護送妻女回家後,馬廷強再出動,吩咐司機送他折返大坑主題餐廳,買了三袋外賣,再到附近買 Pizza。


黎姿再出招,抱住大孖行去餐廳門外睇巨型 Hello Kitty公仔,媽咪、家姐同時無影,細孖 Gianna即時爆喊。


黎姿走到孖女乘坐的七人車,細孖 Gianna一馬當先,成功扭抱,大孖(箭嘴)亦不甘示弱,來一招樹熊上樹拑實媽咪。

一小時後,黎姿老公馬廷強充當廿四孝爸爸,再到大坑為孖女在主題餐廳買外賣。

精神飽滿

要照顧三個女和老公,還要睇實皮膚診所生意,黎姿七手八臂。上月底,診所分店舉行開幕禮,提起胞弟,黎姿悲從中來。「我最大心願希望做好診所,會默默……等我細佬康復,企番起身同大家講嘢。」
現時仍在接受語言及物理治療的黎嬰,早前在母親及看護陪同下,行公司購物。稍為肥了少許的黎嬰,精神飽滿,三人在百貨公司男裝部睇衫,選好衫款後,看護會先給黎嬰過目,只見他有問必答,面露笑容。有此成績,全賴黎姿的樂觀和不放棄。


一直面帶笑容的黎嬰,在母親(左)和看護的陪同下到百貨公司購物。

兩人為黎嬰挑選男裝,還會問當事人鍾唔鍾意。

上月底皮膚診所分店開張,黎姿提起胞弟現況時淚灑人前。

一直供細佬讀大學的黎姿,○五年更現身支持黎嬰的皮膚診所開幕禮,但估不到兩年後細佬卻遇上嚴重交通意外。

潮拜吉蒂

位於大坑的 Hello Kitty Secret Garden,裝潢同台北及首爾店完全唔同,大廚來自星級酒店,全店用上翠綠色調,以園林做主題,唔少 Kitty粉絲排隊朝聖。由於店內只有十多個座位,開業至今日日排長龍,假日期間等位,最少兩小時以上。
食物方面,提供 all day breakfast、迷你 pizza、沙律等,為配合餐廳主題,大部分食物、餐具及枱椅,都有 Hello Kitty嘜頭。

廿四孝老豆

無論名氣幾高、社會地位如何舉足輕重、對外有幾強幾霸氣都好,對住自己的寶貝仔女,點都硬唔起。

劉鑾雄
甘比女劉秀樺 08年出世,翌年大劉在蘇富比拍賣會上以 7,400萬投得 7.03卡彩藍鑽石送囡囡,並以其英文名將藍鑽命名為「 Star of Josephine」,好得寵。

李克勤
做了十年西貢居民的李克勤,因兒子 Ryan就讀位於香港仔的加拿大國際學校,為方便囝囝返學, 12年克勤一擲 5,410萬,買入壽臣山曉穎花園 4,000呎大屋, Ryan返學毋需再坐長程車。

劉德華
囡囡劉向蕙出世後,劉德華為保護愛女,全天候戒備,搬安全屋、加保鏢;劉華更自爆在家會戴 headphone睇電視,免得嘈醒寶貝女。