《中國好聲音3》陳樂基兩度參賽 葉晴晴沒特權

內地熱播綜藝節目《中國好聲音》第三季,最近兩次節目中,代表香港的歌手 Robynn& Kendy及樂隊 Killersoap主音歌手陳樂基( Rocky)成功入圍。 Robynn(葉晴晴)被爆是中共元帥葉劍英的孫女,更被質疑有特權,但據知比賽當日 Robynn& Kendy由朝早七點一直呆到凌晨一點才出場,根本無任何厚待;至於唱《月半小夜曲》入圍熱爆網絡的 Rocky,更獲四評判高度評價,是繼 G.E.M.後,另一個在內地節目發光的港星。

港人代表 陳樂基兩度參賽 Robynn& Kendy冇特權

G.E.M.做人辦


陳樂基與 Robynn& Kendy齊齊入選《中國好聲音》,表現不錯順利晉級,為港人爭不少光。

以上載歌曲到網上成為網絡歌手的 Robynn& Kendy,一二年簽約環球唱片,正式進軍樂壇。一直以唱作組合出現的 Robynn& Kendy,自去年開始,已被《中國好聲音》留意,邀請參賽。
「舊年年初,《中國好聲音》搵過佢哋幾次,但佢哋覺得自己台上經驗未夠,所以推咗。後來見到 G.E.M.參加《我是歌手2》, Robynn& Kendy發覺歌手唔可以再好似以前咁,只係靠出碟宣傳,大家認真商量過,決定參賽,輸就當累積經驗,贏就當 bonus,所以今季決定去馬。」知情者說。

等足十五粒鐘

Robynn爆出是中共元帥葉劍英孫女後,被質疑有參賽特權。但據了解,兩人參加第三季《中國好聲音》,一切程序均與其他獲邀參賽者無任何分別。
「 Robynn& Kendy做咗好多 demo寄俾大會,之後收到通知,要親身飛去上海試音,有幾次仲係臨時臨急話要飛,試咗好多次,到最後先通知入到圍參加比賽,過程同其他參賽者一樣。」
同樣入圍第三季《中國好聲音》的陳樂基,對 Robynn& Kendy被指享有特權,亦代二人抱不平。
「比賽當日,佢兩個朝早七點就 standby,本來下午四點輪到佢哋上台,點知到最後喺現場等到十二點幾一點先出場,如果咁都叫做有特權,我冇嘢好講囉。」陳樂基說。


雖然有個雄厚後台,但 Robynn向來處事低調。在香港住灣仔區的她,選擇華而實的大廈居住,鄰居大多為外籍人士。

小巨肺 G.E.M.參加了《我是歌手2》而紅遍內地,成為香港歌手的新傳奇。

成為搶手貨

Robynn& Kendy入圍《中國好聲音》後,不少內地商演及電影片約均主動敲門。
「好多客都覺得佢哋掂,而家搵佢哋做商演,價錢已經比以前高咗三成有多,另外仲有電影公司搵佢哋,角色未傾到,總之係想飲頭啖湯嗰隻;不過 Robynn& Kendy係歌手,拍戲嘅事,會再仔細考慮過先。」
對於被質疑有參賽特權, Robynn& Kendy說:「所有嘢平常心,唔會理太多。嚟緊半個月要喺上海比賽,會盡力做好本分,多謝大家支持。」


Robynn& Kendy與不少歌手相熟,八月三日中午十二時,記者撞上她們與新進歌手林奕匡餐聚,原來兩女準備為老友執導拍 MV,所以相約出來傾細節。

上季冇人吼

另一入圍參賽、樂隊 Killersoap的主音歌手陳樂基,其實已入行十一年,十分有經驗。參賽當晚,他以粵語曲《月半小夜曲》出戰,搏得四位評判為他轉身,其中那英更激讚他勇敢。
「其實上年我都參加過(第二季),當時我對自己都幾有自信,點知唱完冇評判轉身,跟住花咗一年勤力練習;班隊友亦好支持我,特登幫我將《月半小夜曲》重新編過。我一個人上台,但 Killersoap班隊友都喺背後支持我。我好多謝咁多人讚,不過我明白好多嘢來得快,去得亦快,所以唔會睇得咁重。」陳樂基說。


樂隊 Killersoap是五人樂隊,接受訪問時即時獻唱自家作品《不翼而飛》,可惜鼓手 Gould因在內地參加鼓手節而未有參與在內。

Killersoap在工廠大廈租了地方夾 band,因為開支大,所以與另一樂隊逆流夾份。

自小便醉心音樂的 Rocky,其父母亦愛夾 band,爸爸教他玩結他,媽媽教他彈琴,非常合拍。

紅色家族

Robynn(葉晴晴)的祖父是中共元帥葉劍英,葉劍英育有三子三女,分別由四位夫人所生。長子葉選平從政,曾任前廣東省長及全國政協副主席;次子葉選寧,三子葉選廉則從軍,其後在軍方巨企保利集團中執掌大權。 Robynn父親是葉選廉,母親蘇丹丹前年因癌病離世,胞姊是葉明子,堂家姐葉靜子為時裝設計師,曾與伏明霞的老公梁錦松傳緋聞。

不甘受縛

因為陳樂基入圍第三季《中國好聲音》,令不少人開始留意 Killersoap,此五人樂隊組成已十一年,成員包括主音 Rocky、結他手文文及歐仔、 Bass的細佬及鼓手 Gould;過往曾自資推出過三張唱片的 Killersoap,雖然有唱片公司邀簽約,但為了自由做音樂, Killersoap企硬,拒絕受縛。