已出街的無綫週六節目《區區有鬼故》，首集由李詩韻與王浩信孭飛，同場還有卡拉之星的王俊棠；但拍攝期間未鬧鬼，先遇鹹濕鬼。有指李詩韻遭搏懵，涉嫌經手人王俊棠事後更被導演問話。雖然最後判定為誤會抽水，但面對蝕底咗的李詩韻，王俊棠話：「佢需要我道歉都冇所謂！」

走墊照摸嬲爆

上月底播出的《區區有鬼故》第一集，其中一幕李詩韻要被二打六王俊棠摸 pat，為防有詐，李詩韻事前已在褲內加 pad，做足防範功夫。「抽水戲」順利完成，導演要求補多個近鏡，據了解，李詩韻以為大頭影唔到全身，於是放下戒備，將墊 pad拎走。
出事啦！有指補拍大頭鏡頭時，王俊棠繼續連戲，照樣將手放在李詩韻的 pat pat上，令一場假抽水戲變成真抽水。無論王俊棠有心定無意，硬食鹹豬手的李詩韻當下面色一沉，在場的工作人員見狀亦個個呆晒。
「拍完個 shot，李詩韻塊面已經黑晒，王浩信都聞到味，知道發生咩事！最弊係王俊棠收工仲大大聲，講笑咁話：『好嘢，今日摸咗個靚女 pat pat！』大家知佢一向把口唔收，又鍾意講笑，但對個女仔嚟講，蝕底咗仲要聽埋啲輕佻說話，梗係唔舒服。」一名現場工作人員說。

早前出街的《區區有鬼故》，第一集李詩韻就係呢一場俾王俊棠摸 pat戲，鬧出真抽水事件。有指同場的王浩信都替李不值。

王太出面補飛

據悉，導演事後召王俊棠「問話」，經過解釋，導演接受他「唔知對方攞走個 pad」，裁定王俊棠「無心之失」。為安撫硬食鹹豬手的李詩韻，據知翌日跟住老公開工的俊棠老婆亦幫手補鑊。
「王太嗰日同李詩韻講咗唔好意思，又幫口解釋番，李詩韻都接受，兩個之後都一齊再埋位開工。」

近日李詩韻被踢爆跟家住山頂千萬豪宅的潛水總會董事潘樹維拍拖。當晚戀情曝光，女方急得跳車走。

李詩韻在《寒山潛龍》一人分飾兩角，花旦中算是有演技的一個。

誤做鹹豬手

涉嫌做鹹豬手，王俊棠在電話中交代始末，並堅稱一場誤會。
「誤會一定有，嗰場戲我要摸佢……臀部，我睇住佢墊 pad打底。（點解拍近鏡都仲要照摸？）我唔知佢幾時拎走個 pad，亦唔知補拍緊大頭，所以咪照番之前咁做。當我隻手一放，個心都打個突，哎吔死嘞！掂就掂到，但都要照拍落去！」王俊棠說。
對於導演「問話」，王俊棠認有其事。
「導演有打俾我，問係咪有咁嘅事（抽水），我已經解釋咗！」
當日收工，一句「摸咗靚女 pat pat」，令事件火上加油，對此王俊棠說：「我成日講笑！若果對方有唔舒服，需要我道歉亦冇所謂，我會衷心講對唔住，真係冇意嘅！」
至於蝕底咗的李詩韻，截稿前仍未有回覆。

王俊棠曾在慈善節目表演唱歌接力，因而被冠以卡拉之星稱號。

有指王俊棠被導演問話後，翌日王太代夫向李詩韻解釋清楚。

王俊棠：無話可說

王俊棠昨晚到觀塘APM出席電影《泰山3D》首映。他一到場就被記者追問有關之前疑似「鹹豬手」李詩韻事件，他即轉話題說：「十一月七日我會喺屯門大會堂有演唱會。」問到有否請李詩韻出席？他指：「我無請任何人睇。」之後他又說事件已過去，無話可說，又不會找李詩韻，因為這只是個誤會。又問到李詩韻是否相信他？他說：「你哋自己問番佢。（佢依家有男朋友喎！）唔清楚，總之依件事過咗，完咗架啦。」

經典鹹豬手

娛樂圈出現過的鹹豬手不多，講到經典喎，一定非蔡子健莫屬。

蔡子健
2008年，苑瓊丹在香港電台第二台客串做《瘋 SHOW快活人》節目時，在「娛樂大爆爆」環節內爆出無綫內有一名男藝人是「魔術鹹豬手」，指他表演魔術時故意不小心觸摸女藝員，引起軒然大波，最後查出「魔術鹹豬手」正是蔡子健。

洪天祥
2013年，許慧欣自爆與洪天祥拍攝電影《港都》時，男方竟然趁吻戲加碼偷摸她的臀部，事後洪天祥解釋自己是動作演員出身，當時是預備要將她抱起來才錯亂摸到她。