同佘詩曼拍《十月初五的月光》電影版 張智霖改期遷就老婆監場

張智霖轉會蕭定一公司後強攻電影,即將起程飛歐洲為今年賀歲片《衝上雲霄》開工外,手上還有兩部電影,排住隊等埋位,包括同周秀娜合作的港版《風月俏佳人》,以及同傳過有 road的佘詩曼再拍電影版《十月初五的月光》。

據了解,有合作女角「最終決定權」的 Chilam嫂袁詠儀,雖然開綠燈,但講明要監場,由於檔期撞正靚靚在外地開工,為讓老婆放心, Chilam親自出馬,同電影公司講數,將電影開拍日期提前到緊接《衝》片後,就晒靚靚。

附帶條件 翻撻佘詩曼 Chilam改期遷就老婆監場
2000年 Chilam同靚靚拍拖期間,與合作拍《十月初五的月光》的佘詩曼的緋聞傳到似層層,男方更一度宣布取消婚事。

忽然冇期

逢電視劇必中的張智霖,不論是○○年的《十月初五的月光》、一一年的《魚躍在花見》,到去年的《衝上雲霄 II》,每次投彈,都有一定威力。接住 Cool魔角色餘勇,轉會後的 Chilam決定銳意在電影方面放更多時間,先有賀歲片《衝上雲霄》電影版,同台灣爆紅的郭采潔做對手,另外,公司還為他安排兩部戲,一部是同娜姐合作的港版《風月俏佳人》,另一部《十月初五的月光》電影版,對手更是昔日傳過緋聞,搞到袁詠儀親身監場的佘詩曼。
按原有計劃先拍《風月俏佳人》,明年農曆年過後再開原班人馬上陣的《十月初五的月光》,但上月初,周秀娜的經理人忽然收到通知計劃有變,《風》片要待明年一月,才落實開拍日子,搞到 Chrissie(周之洋名)的工作編排大混亂。
「原本 hold晒十月至十一月啲期開工,突然間話改,要重新排過,電影公司只係話 Chilam個期唔得,其他都無交代。」周秀娜公司的職員透露。


同年阿佘同 Chilam encore再拍電影《跑馬地的月光》,靚靚試過踩落片場探班,進行突擊檢查。

《衝》片中 Sam哥吳鎮宇有鄭秀文做拍檔,至於 Chilam就同台灣女星郭采潔演對手戲。

親自監督

○○年無綫劇《十月初五的月光》不但令佘詩曼穩坐一線花旦位置, Chilam亦進一步證明是收視福將,但拍攝期間,卻盛傳兩人暗中撻着,之後兩人再拍電影《跑馬地的月光》時,本來人在廣州開完工的袁詠儀,直踩片場突擊探班; Chilam更一度在公開活動上,宣布取消翌年同靚靚結婚,令緋聞甚囂塵上。
時至今日, Chilam、靚靚的囝囝魔童都七歲大,但佘詩曼三個字,仍然觸動袁詠儀神經,對於老公要同「舊愛」再合作演情侶,她就算沒有企硬反對,仍講明屆時兩人同場,誓必現身監場,礙於電影開拍日期撞正靚靚到外地開工,為了令另一半安樂, Chilam主動向電影公司提出改期。
「初時 Chilam都無講明究竟點解,只係話唔想自己同阿靚撞時間開工,囝囝無人照顧,總之堅持提前拍咗同阿佘嘅戲份,反正電影公司又係 management,自己友實度得掂,係娜姐嗰邊要再 plan過晒啲期,佢哋麻煩啫!」知情者說。


本月初 Chilam、阿佘同場出席《衝上雲霄》電影版記者會,兩人面左左無傾偈。

當年拍完劇, Chilam同阿佘情侶檔到內地登台,態度親暱。

當年《十月初五的月光》收視最高 46點,不單令 Chilam事業更上一層樓,亦令阿佘彈上成為一線花旦。