三十四歲已經手執兩億六物業的容祖兒，今年三月被揭只丟低一千蚊俾阿爺過年，之後自爆同生父容錦輝：「無聯絡！」
一直屢傳欠債的容父，近日在跑馬地區被張貼印有大頭照的追債街招，不想父債女還的容祖兒，急急透過公司同父親撇清關係：「作為女兒責任做盡！」
十九年前父母離異，與母親及細佬相依為命的容祖兒，多次暗示要在金錢上照顧當年拋妻棄子女的父親。一家唔知一家事，被指爛賭欠債的容錦輝，決定開腔還我清白：「佢（祖兒）無同我還過錢，亦無俾過錢我做生意！」
為顧及母親感受，容祖兒近年刻意同父親不相往來。
父女情斷
容祖兒對住只有拍拖兩年半的劉浩龍，任由對方自由進出半億豪宅，甚至俾埋百萬波子男友代步，相反，跟有血緣關係的生父容錦輝，卻不相往來。
今年三月，容祖兒細嫲同朋友吐苦水，指天后級「哎吔」孫女只丟低一千蚊給兩老過新年，有失身份。當時容祖兒回應：「屋企事處理得好好……至於爸爸，就無聯絡。」
曾屢傳欠債的容父，近日被人在跑馬地區張貼印有他相片的追債街招，內容寫上「尋人——此人 容錦輝，仍係樂壇天后容××之父親！招搖撞騙，欠債唔還，見字速聯絡，否則後果自負。」
事發後，容祖兒黑面避傳媒，並由經理人霍汶希（Mani）代為發表父女斷親論：「咁多年祖兒一直由媽咪獨力撫養成人，關於爸爸嘅嘢，佢作為女兒責任做盡，祖兒為咗捍衞家人，以後老豆出面發生任何事，都同祖兒無關，佢唔會回應亦唔會負責，當下最重要只有母親，其他嘢，唔理。」
欠債貼街招
小時候父女關係融洽，但到容祖兒 15歲，容父與前妻離婚，父女關係日趨淡薄。
無爭人錢
除了被人貼追債街招，再有報導指事件同容父爛賭、欠下三十萬賭債有關，同時亦揭發他今年一月欠稅二千多元。
負面消息浪接浪，記者聯絡上當事人容錦輝，他連珠炮轟：「你哋真係唔好騷擾我屋企人啦（指有傳媒追訪容祖兒嫲嫲），啱唔啱先？佢老人家，你哋圍住佢，七十多歲啱啱先做完手術，隻腳又唔係咁方便，整到佢，你哋於心何忍先？
「我都係講嗰句，我搵嘅每一毫子，我唔係使公眾錢，我唔係公眾人物，我無義務要去應酬你哋（指傳媒），啱唔啱先？不過呢次我真係想澄清番，我冇爭人錢，欠債要還，我有『還評報告』（還款能力評估報告），我係白豬仔嚟?！」至於為何俾人追債，能否提供澄清證據，容父繼續火滾：「我有啲嘢要 settle，我而家都唔敢落街，坦白講我隻腳都唔方便，斷咗韌帶行都行唔到！如果我整親，我要搵我個女，我使乜排醫院排咁耐呀？」言談中，間接指自己同天后女兒毫無軱轕。
提到女兒的「斷親論」，容父覺得經理人霍汶希要負最大責任。「我唔係要攻擊我個女，但係佢經理人講嘅嘢係不盡不實，佢（祖兒）無同我還過債，亦無俾過錢我做生意，我所有做嘅生意，都係我自己搵返嚟嘅錢，我蝕都係蝕我自己嘅錢。（事後 Joey有冇搵過你？）冇，我都冇搵過佢，我好多年冇見過佢，我都唔知有咩得罪咗佢？唔緊要，你咁大個人都要有番你思想，有你嘅諗法，你認為呢個爸爸唔見唔緊要，我冇期望過你要扶持我，你今時今日飛黃騰達，我有我生活，你有你嘅忙碌。
「我啲老人家全部唔敢落街，嚇到佢手騰腳震，我而家唔係殺人放火，我都話咁多年，容祖兒出道以嚟，我無做過任何嘢丟佢架。我唔係咩十惡不赦嘅人，我屋企窮啲啫，我段婚姻唔好啫，我唔係做過咩危害社會嘅嘢，俾啲空間我屋企人吖！」
無見十年
至於有關他欠下爛賭債三十萬，甚至親自煲湯氹女的報導，容錦輝在電話中咆哮：「我阿媽話再見記者佢會自殺！又話唔想個仔同個孫好似鬧交咁樣！三十萬？佢點知我爭佢三十萬？我爭三十萬都知？佢（傳媒）好似瞓喺我隔籬！我爛賭？×！簡直黐線?！你可以喺我隔籬屋，求其問一個人我賭唔賭錢嘅！
「又話我煲湯上佢屋企？唔好玩啦，大佬！如果講到前妻，我起碼十年未見過佢啦，識我嘅人都知我唔識煮嘢煲湯××寫到實牙實齒！唔好斷章取義先得?！（指欠稅二千多元）我交六萬幾蚊稅，嗰二千幾蚊係罰款嚟?！」
容錦輝一再強調，手上有證據可以還他清白，並會現身交代被指欠債的傳聞，但直至本週二（十一月四日）黃昏，容錦輝以需要「 cool down」為由，未有為事件作出澄清。
錢作怪
容父容錦輝屢傳欠債，更不時惹禍上身，難怪容祖兒要同生父劃清界線。
借糧失蹤
00年，容父被踢爆向當年任職的美國安泰人壽保險公司，借糧七萬多元後失蹤，保險公司曾登報追討，最終由 Joey孭起欠債。
欠薪俸稅
02年，容父被稅局入稟區域法院，追討總額 3.9萬元的薪俸稅及暫繳稅， 99年，他亦曾被稅局追收 1.4萬元的欠稅。
刑事恐嚇
07年， Joey祖母林慧貞被指在超市偷香口珠，容父趕至催促職員放人，更揚言要搵人搗亂超市及斬人，最後被判刑事恐嚇罪及 160小時社會服務令。
反口加價
10年，容父自組的車行被投訴，客人落大訂後，容父反口加價不賣車，根據合約承諾，車行要全數退訂，但容父卻以病、周轉不靈、假期銀行閂門等藉口拖足三星期，遲遲無錢還。
英皇爆絕密文件證容錦輝謊言
有指容祖兒儘管與父親感情非厚，但為免「父」債纍纍，多年來堅持無條件揼水，實行父債女還。容父誓神劈願堅稱「自己欠債自己還」，從未收過女兒一分一毫。事情變成兩個版本，英皇在無可奈何下，終披露三年前，容父在律師見證下簽署的絕密承諾書。容父在承諾書中親認屢次向祖兒索款，並承諾在該次索款後不再對祖兒作出滋擾及索取利益，證明祖兒早年一直有協助父親，據知金額以百萬計。
容錦輝於2011年簽下承諾書，承認曾多次向祖兒索款。
這封具法律效力的絕密承諾書在2011年5月18日簽訂，內容大致是容父親認自己多次欠下債項及經濟出現問題，多年來屢向女兒索取大量款項，並承認從未有盡父親責任。由於當時容父再次欠債，要再向祖兒索款「填氹」，故承諾書講明該次索款將是最後一次，並鄭重向祖兒作出四大承諾，包括不再向祖兒索取款項及利益、不再作出任何滋擾等，如有違反，容父需全數退還款項給祖兒，並將一切事宜保密。雖然信中祖兒代父還債的總額被塗黑，但據悉她為父親一共還款以百萬計。Mani強調英皇今次決定公開承諾書，是希望祖兒不再受到傷害，讓兩父女得以平靜生活，亦重申祖兒不再回應是次事件。
老豆終於認數 借容祖兒73萬
絕密承諾書曝光後，容父終於親口承認自己做生意都是用自己錢，只是之後生意出了問題，女兒出錢相助，前後一共借了4次，總共73萬，並不是傳聞中的過百萬債。第一次問祖兒借錢，是要還之前問保險公司借的薪金；第二次是因為酒吧轉牌及裝修；第三次是因為劏車房執笠；而第四次就是吉之島車行結業。據容爸爸講，他最後一次問祖兒借錢是3年前2011年，而之後就没再見過祖兒。