在八十年代樂壇風光期入行的蔣志光，橫跨兩個世紀，近日終在《老表，你好hea!》發圍，挑機歌神唱《愛是永恒》，又與老拍檔韋綺珊再唱經典作《相逢何必曾相識》，拍住翻生。53歲的蔣志光被八、九十後當新星熱捧，無綫打蛇隨棍上，捉住二人做武器，光復台慶收視。台慶會安排《老表》班演員做一part趣劇，冇正式在熒幕前唱歌起碼十五年的蔣志光仲會同韋綺珊合唱《相逢何必曾相識》。

有爆紅光環，但蔣志光無抓緊時間吸水，得閒打書釘、探舊街坊，淡泊名利；至於住豪宅又跳拉丁舞少奶奶韋綺珊，則選擇搏到盡。

一齣《老表》令捱足三十年的蔣志光爆紅，拍住「老婆」韋綺珊喺今年台慶孭重飛，吐氣揚眉。

打書釘唔宣傳

正當網民同張智霖都急call蔣志光復出樂壇，當事人則一副我獨醒態度。
入行以來只做過四次專訪的蔣志光，上週六（十一月八日）悠閒地去書店打書釘、行唱片鋪，去灣仔街市搵舊街坊吹水，你有你熱捧，他照舊寫意過。
「公司想谷佢，仲諗住好似鄭俊弘咁唱埋劇集主題曲；不過蔣志光唔係你俾佢唱，佢就唱，佢話除非有公司肯俾佢做到自己鍾意嘅歌，但又照顧到市場唔令老闆蝕錢，佢先考慮復出樂壇。無綫份糧連埋爆騷都過二萬蚊，每年仲收緊《相逢》嘅作曲作詞版稅，夠養妻兒，蔣志光唔強求名利，好知足。」知情者說。

懶理近期紅爆，唔追名逐利的蔣志光上週六（ 8/11）寧願獨自行街，攞住本文學書打書釘大半個鐘，都唔接訪問谷自己，更有指他嫌錢腥，唔趁熱接騷。

慳家的蔣志光，與家人租住銅鑼灣唐樓已經滿足。

曾住灣仔的他，再殺落灣仔街市入貨。佢一出現麵包鋪，班收銀阿姐即圍住佢起哄。有 fans撐，蔣志光只以一個含蓄的笑容回報。

轟香港冇樂壇，只有娛樂圈的他，當日行埋唱片鋪。但全程只搵外地爵士樂唱片，本地嗰啲眼尾都唔望。

喺街市捉住菜檔舊街坊吹水，對方猛同蔣志光講：「我有捧你場呀！」

06年台慶
在無綫廿年，蔣志光唱歌強項無用武之地。 06年參演台慶，跟十幾個男藝員反串扮女人跳勁舞後，台慶表演冇再玩。

蔣志光否認復台慶

蔣志光昨日現身電台接受老友劉美娟嘅訪問，他亦都坦承工作量增加。問到收入係咪豬籠入水？他笑言：「收入就仲未到手喎。（食住個勢復出樂壇？）仲未住，o依家仲好熱鬧，等所有嘢回復平靜先再考慮。（話張智霖間公司有向你招手？）係有同我傾過吓，但都只係好初步嘢，其實一直都對音樂有興趣，唱番歌只係近排嘅事，以前係識唱，但唔代表鍾意唱啫。」

對於有指蔣志光「光復」台慶，佢就笑住否認：「我唔承認呢兩個字，作為公司員工，我做嘢都只係願意同唔願意，（對上一次參加台慶已經係2006年？）係呀，因為台慶最大嘅問題係要跳舞，但我老人家體力負荷唔到啦。其實公司年年都有叫我，都好尊重我 !（今次剩係唱歌所以應承？）係因為今年套劇未完，有義務幫劇宣傳，（係咪唔跳舞？）唔考慮跳舞啦。」

講到有雜誌話蔣志光仲住喺唐樓，平時生活都無乜改變一樣係同啲街坊打牙骹，去書店「打書釘」。蔣志光就話：「咁事實就係事實，冇乜嘢事可以隱瞞！（藝人得表面風光？）唔係，而係冇乜嘢可以阻到我，如果我唔想就唔會留喺嗰度。我信自己做邊行都可以勝任，咁我o依家係做演員，次序會係以拍劇行先，唱歌只是第二囉。」

復出做舞后

同蔣志光一齊「復活」，九五年下嫁黃姓商人後便做少奶奶的韋綺珊，家住月租四萬的太子道豪宅，閒時學跳舞消磨時間，沒料到客串《老表》會爆出。台上三分鐘，台下十年功，闊太韋綺珊準備十足。
「我搵營養師幫我 keep fit，每日飲三公升水排毒，又跳五粒鐘舞。我唔識睇中文，陳永業幫我錄低晒劇本內容，自己再將對白譯番英文拼音。」
食住個勢，戰鬥格韋綺珊迅速「賣身」予糖妹經理人，又答應高志森女友焦媛明年初演出歌舞劇，登台騷排山倒海。唔想齋唱，年過半百的韋綺珊苦練拉丁舞 Salsa，做埋舞后。
「幾十歲咁爆都幾開心，屋企人成日窒我：明星喎，唔好自己落街買嘢！」韋綺珊說。

「燒衣」版
除呢兩句「相逢何必曾燒衣，在這一息間相遇奈何橋」係編劇集體創作，其餘由蔣志光一手包辦，又食胡。

未拍過劇的韋綺珊，去年因被蔣志光加王祖藍夾擊發功，才答應處女演出，結果爆紅。

嫁商人，生埋兩個女的韋綺珊，居於月租四萬的太子道福怡大廈，一直過住生活無憂的少奶奶生活。

接棒　長女唱爆咪
韋綺珊唱得，同佢一個餅印的十八歲大女 Natasha（黃凱珊）遺傳母親天分，唱功一樣勁，並準備入樂壇一闖。

12年 Natasha在九展舉行的全港校際唱歌比賽贏得冠軍。翌年她以表演嘉賓身份再度出現，有過百學生 fans湧到台上打氣。

在 YouTube找到 Natasha自彈自唱演出，歌聲同佢媽咪一樣聽出耳油。

挑機吳若希
跳舞當日，韋綺珊自爆近期最愛唱吳若希 hit歌《越難越愛》，仲攞出佢用英文拼音的廣東話歌詞即場唱，挑機後輩，證明唔 out！