大婆借全家阻老公失敗 洗米華提早離隊見Mandy Lieu

Mandy Lieu搭上太陽娛樂老闆周焯華,二廠跟正牌周太陳慧玲不斷隔空過招。最新戰況,正印、小三同時懷有華種, Mandy Lieu單拖到養和求診,陳慧玲則拖實老公去拍賣會,論牌面,小三輸晒。
恃住佗有周家慈姑椗,仲傳係孖仔,華嫂再出動老爺、仔女箍老公到泰國過火辣聖誕,日日 fb晒一家大細幸福合照,全面宣示主權。表面又贏漂亮一仗,實質今次芭堤雅、曼谷之旅,兩夫妻除了大隊食飯,其他時間幾乎各有各,有四個半月肚的華嫂全程 mark實囡囡周梓潼同老爺,至於周焯華則膽拖囝囝周柏豪,同友人曬太陽、打波、蒲 gym房,比起上月 Mandy Lieu化身人肉坐墊,任周焯華背頂胸坐大髀,親密度天與地。
本週一(十二月二十九日),被正印挾住同老豆慶祝生日的周焯華先行離開曼谷,撲往新加坡見又係有咗,佗 B女四個半月的 Mandy。一日未正式斬纜,小三未輸得晒!

泰國冷待大婆 借全家阻老公失敗 洗米華提早離隊見Mandy
27/12
周焯華曬太陽,不忘睇書自我增值,所閱讀的《向林肯學領導》,於本月初出爐,提供了這位第十六任美國總統的領導技巧。

精心布局

佗住孖 B,周太陳慧玲階段勝利!再打親情牌,睇準老公周焯華愛錫家人,大小家庭聚會必定現身,於是趁老爺生日、仔女放假,安排聖誕遊泰國,順理成章宣示正印大時大節可與老公、家人共度的獨有特權。
「華嫂知道老公鍾意人多熱鬧,又鍾意家庭樂,自從 Mandy出現,要挾老公遊埠過二人世界已經好難,反而家庭聚會就一定俾時間出嚟,老爺生日,華嫂機不可失,安排舉家外遊,老公要見 Mandy,都冇咁易話去就去!」知情人說。
周家連親朋戚友一行十多人,於平安夜(二十四日)起程往泰國。
首站是芭堤雅,大隊入住當地五星級的 Royal Wing Suites& Spa酒店,領隊的周焯華一家五口,更住在租金高達港幣一萬六千二百元一晚的總統套房內。
上週六(二十七日),當地時間早上九時半,周焯華單拖現身酒店泳池曬太陽,一邊扯煙,一邊睇今個月才出版的《向林肯學領導》,乾煎四十五分鐘後返上房。至十一時,練到一身肌肉的他,孭住背包到健身室,同友人一起做 gym一小時,之後再去網球場會合同元配所生的大仔周柏豪,在私人教練的陪同下一齊打波。
現場所見,周焯華揮拍勁度十足,絕非新手。烈日當空下,大戰兩個半小時,才捨得離開。
老公晨早出動,著住粉紅色流蘇長裙的陳慧玲,到下午三時才現身,在酒店大堂對出的戶外地方透透氣,四個月孖 B肚,明顯又大又圓,華嫂邊行邊護肚,小心翼翼。

泰國冷待大婆 借全家阻老公失敗 洗米華提早離隊見Mandy
現真肚
佗孖 B四個半月的陳慧玲,肚皮渾圓明顯隆起。
泰國冷待大婆 借全家阻老公失敗 洗米華提早離隊見Mandy
遊泰國期間,陳慧玲透過繼子上載同老公合照晒恩愛,鏡頭後兩人實質甚少交流。

上落樓梯
陳慧玲分外小心,不時以手護肚。

透過經理人承認有喜的 Mandy Lieu,在周焯華的安排下,離港安胎。

在泰國期間,兩父子經常孖咇打波、健身。

在健身室練足一小時無停手的周焯華,主力操四頭肌以及背肌。

唔拖唔理

做 gym打波出一身汗,梳洗過後,周焯華同友人落樓,華嫂被安排與囡囡、老爺,以及太陽娛樂高層黃栢高同車離開,至於周焯華則跳上另一部七人車,由當地警車開路,齊齊前往市中心的中式泰菜館「張龍記」醫肚。周焯華做先頭部隊,大住肚的華嫂由囡囡和老爺傍實,殿後入場。
連日行程無乜兩句的周氏伉儷,食完飯罕有孖住囡囡三人行,到附近會合食完泰菜,再去掃街邊小食的大仔周柏豪。大肚婆無論行去邊,老公周焯華都視而不見,唔單只冇拖實老婆過馬路,兩人的對話亦有一句、沒一句,表現疏離。


老爺幫手箝藉
老爺生日同仔女放假,陳慧玲挾老公泰國陪玩,阻對方見小三。

老婆粗身大細,周焯華闊佬懶理,當面扯煙。

乜都爭

爆出 Mandy Lieu搭上周焯華後,不足半年來,正印與小三招來招往,爭樓爭寵爭去旅行爭住大肚,總之乜都爭。

伴遊

9月, Mandy Lieu被拍到做跟得女友,坐頭等陪周焯華飛紐約,其後再被爆二人結伴遊台北,正印陳慧玲亦不甘示弱,生日有老公組團去歐洲豪玩豪食,更在當地包下餐廳放滿玫瑰花,為太太大搞 party。

講金

得寵乜都得! Mandy收億元西半山豪宅,又於吉隆坡娘家獲贈獨立屋;周焯華亦識做氹番大婆,科水讓對方開果汁店、託兒所,再打本 500萬搞美容生意。

爭大肚

正印陳慧玲被爆懷有「華種」四個月,來港豪掃 BB用品,同日 Mandy Lieu亦出招,獨自到養和睇急症,掩嘴作嘔,傳佗女四個月。

賀壽速撇

當日黃昏,大隊分三架車由芭堤雅啟程往曼谷,入住 Siam Kempinski酒店,一家五口同樣指定住總統套房。
翌日(二十八日)上戲肉!一身潮 look打扮的華嫂,晚上七時先同囡囡在酒店聖誕樹前自拍,等埋周焯華同囝囝,一同前往餐廳為老爺慶生。當晚,華嫂急不及待上載生日蛋糕照到社交網站,並留言:「還有什麼比一家人開開心心更重要?」宣示正印的身份。
本週一(二十九日),早睡早起的周焯華未夠十一時,便與友人由 Siam Paragon行返去酒店,並隨即跳上在門外等候的七人車,乘搭下午一時的航班前往新加坡,探望出走香港、佗住四個半月 B女的 Mandy Lieu。
「阿嫂嘅用意,華哥又點會唔知,話晒佢佗住自己骨肉,唯有盡做,交完差,就話有嘢做,提早走人。」一名周焯華身邊人士透露。至於華嫂同一對子女以及老爺,翌日(三十日)下午四時亦乘搭私人飛機返回澳門。
遊泰國期間,陳慧玲日日上載 fb匯報行踪。


29/12
本週一中午,周焯華撇低妻女,離開曼谷,飛新加坡見 Mandy Lieu。

同日下午四時,陳慧玲孖住老爺、囡囡外出,全程悶悶不樂。

30/12
本週二下午,陳慧玲帶住老爺、繼子及囡囡,一家四口乘坐私人飛機返回澳門。

早有芥蒂

周焯華有錢有地位,加上相頭有番咁上下,異性緣一直暢旺,但無論點玩,都一定俾面老婆,定時定候交人。直至 Mandy Lieu出現,兩人愈愛愈高調,小三更先後在香港、大馬收過億物業,自覺正印身份受威脅的陳慧玲,開始頻頻出招。
齊人福唔易享,但最令周焯華氣難下的,是十一月中, Mandy Lieu在私人賭廳內扮人肉坐墊片流出,有傳拍片人與正印分屬老友,自覺生意人形象大受影響的周焯華,同正印開始有嫌隙,加上 Mandy兩度被人整蠱爆門入屋,更加覺得有人從中作梗。
表面上,周焯華對 Mandy Lieu佗 B一事表現得毫不上心,但實際上他已安排大肚婆離港安胎,而另一邊廂,又盡量滿足正印各種要求,務求令雙方和平共處。
人在正印心在小三,隨着兩女的肚皮愈來愈大,夾在中間的周焯華,有排煩!


十一月 Mandy化身周焯華的人肉坐墊,片段流出,男方對此事耿耿於懷。

十二月初, Mandy拎住行李到養和求診,後來證實佗 B女四個月。

愈戰愈強 打本Mango開餐廳 送亞姐千五萬樓 為陳雅倫開拖

周焯華(洗米華)戀事多,華嫂跟小三 Mandy Lieu大戰連場外,近日又傳出陳雅倫○九年同男方拍過拖,周焯華更因為她,與前威尼斯人賭場總裁 Mark Brown開拖。愈戰愈強,周焯華之後跟 Mango王秀琳及一一年亞姐冠軍馮雪冰都一齊過,前者獲打本千萬開餐廳,後者則收千五萬樓。豪到呢!

打交掃場

記者在 facebook發現兩張陳雅倫跟周焯華拍拖照,當年仍未上位,只是賭廳廳主的他,追女一樣冇手軟!一識到陳雅倫,便擺明車馬問她可否做其女朋友。
「 Ellen當時同 Mark Brown拍緊拖,眼裡根本冇其他人,後來 Mark Brown返美國做嘢,聚少離多,洗米華先有機會。嗰時每次嚟香港,佢都會約 Ellen見面;有次 Ellen返內地做嘢,因為班機 delay,仲搞到佢喺卡拉 OK等咗十幾個鐘。
「其實洗米華對 Ellen唔錯,有年 Mark Brown喺威尼斯人 Vergnano意大利餐廳搞生日 party,其中有個賭廳廳主搭住 Ellen抽晒水, Mark Brown發脾氣打人,洗米華走埋去勸交,結果反而同 Mark Brown打起上嚟,成間餐廳由樓梯到電梯口啲嘢都打到爛晒,好大件事。一齊之後,洗米華對 Ellen好細心,佢提過嘅首飾手袋,下次見面就送到手。」知情者說。

愈戰愈強 打本 Mango開餐廳 送亞姐千五萬樓 為陳雅倫開拖
在 facebook搵到陳雅倫跟洗米華的拍拖相,二人在卡拉OK合照。

Mango

亞姐馮雪冰

洗米華當日勸交,因而跟 Mark Brown在 Vergnano意大利餐廳大打出手。

拍拖半年分手

據賭圈人透露,二人當時在澳門經常出雙入對,甚至公事食飯見客都一齊,跟周焯華搵食的兄弟,都知陳雅倫身份。
「洗米華從來冇同 Ellen提過自己有仔女同女朋友(跟正印陳慧玲三年前才正式註冊),佢以為男友係單身。不過大家一齊只係半年時間,因為每次 Ellen去第二度開工,總係有朋友同佢講話洗米華同其他女仔一齊;雖然明知有好多女仔主動埋身,但 Ellen都係忍唔住成日同佢鬧交,佢唔想拖拉,最後主動分手。」知情者說。
求證跟周焯華拍拖往事,陳雅倫以「普通朋友」稱呼對方,表現此地無銀;至於二人的親密合照,她笑住回應:「我同朋友影相都係咁親密咁開心,唔通個個都係我男朋友咩!」她亦強調跟這位「普通朋友」,已沒有聯絡幾年。

陳雅倫跟前威尼斯人總裁 Mark Brown拍拖多年, 09年男方返美國,二人才分開。

13年,跟細他八年的李思捷姊弟戀,不過男方表示陳雅倫只是他多年女神,不是情人。

有指洗米華睇過不少陳雅倫電影,其中一部《求愛敢死隊》他最鍾意。

Mango的日本餐廳早前裝修,改為居酒屋繼續吸客。

唔出名一樣錫

據了解,偏愛娛圈女星的周焯華跟 Mango(王秀琳),及一一年亞姐冠軍馮雪冰都曾經有過一段情。
一二年, Mango發現有米男友唐堂劈腿台模白歆惠後,即撇並火速搭上周焯華,眼見女伴長期被人照顧,他即時開水喉,打本千萬給 Mango在中環開日本餐廳,甚至做埋 sales,介紹朋友到餐廳幫襯。
周焯華對女伴出手闊綽,即使是零知名度的亞姐馮雪冰,他一樣無厚此薄彼。據知情者透露,馮雪冰收了大量 Hermes、 Chanel等名牌外,更愛屋及烏,出外度假,全家有份。
「呢啲都好濕碎!最勁係分手前仲送多兩層樓俾佢,雖然及唔上而家 Mandy Lieu咁億億聲,但兩個單位加埋成千五萬,都好重手!」知情者說。