44歲失婚傅明憲一心再戰豪門，為箍實細自己十年的莊士集團太子爺莊家彬，打扮愈趨年輕，更陪玩陪蒲冧埋莊家彬身邊的富二代朋友。可惜拍拖七年，傅明憲卻未能奪取男友父母歡心。

為拆散二人，家人試過經濟封鎖莊家彬，最新趕絕招式，逼他在大時大節返屋企報到交人，所以在剛過去的聖誕及除夕夜，傅明憲只能單拖度過。

使唔使咁絕？（設計對白）

大除夕單拖

大除夕，莊父下令莊家彬陪家人，傅明憲只好約朋友倒數，單拖赴會的她一臉落寞。

同朋友狂歡應該好 happy，但男友不在身邊，傅明憲坐友人車離去時黑口黑面。

夜蒲獵男

近期莊家彬受壓要陪家人，傅明憲難耐寂寞周圍蒲，日前在黃百鳴公司活動，她跟一名男士十分好傾，更主動拖住對方。

用盡藉口留人

在剛過去的除夕夜，四十四歲傅明憲悉心打扮，與大班女性朋友夜蒲倒數，平日與她形影不離的男友莊家彬卻全程無影，難怪大時大節，傅明憲還是一臉愁容。
「大除夕， Gigi（傅明憲）約咗班朋友一齊倒數，本來家彬話嚟，但最後都 no show，搞到 Gigi好唔開心。其實家彬父母一直想拆散佢哋，莊家有頭有面，尤其家彬係長子，佢父母梗係想搵個門當戶對嘅新抱，所以用盡招數，例如要家彬大時大節返屋企報到，搵藉口唔俾佢出街，佢父母知 Gigi好着重呢啲日子，專登要佢冇伴又冇癮。」知情人說。

傅明憲和莊家彬不時出 trip預支蜜月，雖然年紀相差十年，仍愛得癡纏。

莊家彬的家族資產達數十億，父親莊紹綏更對他寄予厚望，一直希望他找個門當戶對的女友。

莊家彬（右一）曾帶傅明憲出席菁英會活動，二人關係公開。

喊住箍男友

傅明憲和莊家彬月前外遊，她更放相上 ig晒恩愛。

其實幾年前莊家彬試過被父母經濟封鎖，在壓力下一度向傅明憲提出分手，但見到女友哭哭啼啼，莊家彬才心軟留低。
「當時 Gigi喊住問家彬：『你而家係咪唔要我？』家彬即刻心都軟晒。佢屋企以為閂水喉，個仔就會醒，點知家彬一味拖字訣，到而家都未分手。家彬本身幫家族打理生意，平日代表公司去應酬，身上仙都唔仙吓，咪又係令屋企冇面，最後佢父母屈服，冇再經濟封鎖。佢哋初時以為個仔玩玩吓，點知同 Gigi一拍就拍咗七年，成家人都跌晒眼鏡。」知情人說。
莊家彬父親莊紹綏不滿兒子搭上失婚傅明憲，多年前曾出言詆毀：「呢個世界冇女人咩？我個仔點會同佢！大佬，仲要結咗婚！」
雖然男友對自己不離不棄，但未來老爺落閘，傅明憲要做莊家新抱，難！

與前妻傅明憲各有各玩

海域集團前主席葉劍波於2010年因詐騙罪成被判監，11年出獄後，一直靜待時機東山再起，惜早前向終審法院申請上訴許可遭駁回。不過葉劍波坐監前後，感情生活一樣精采，年前被影到約會「G奶明憲」後，去年又被發現陪長髮紋身女到銅鑼灣名店購物。

傅明憲出身知名左派演員家庭，其父母是傅奇與石慧，94年加入無綫，由於樣子甜美，很快便被力捧。傅明憲曾與藝人梁榮忠拍拖，98年她與葉劍波相識後相戀，翌年結婚並毅然退出娛樂圈。