劇組爆料謝霆鋒好愛周迅 拍戲空檔甜腔國語傾電話

搣甩前妻張栢芝兩年,32歲,家財幾億,有錢又有面的謝霆鋒原來跟「姐姐」、38歲的內地女星周迅秘戀一年,對於此段受保護的「姊弟戀」,唔識講大話的霆鋒只能淡然回應,「唔講喇,都冇嘢講!」唔承認亦唔否認,模棱兩可留後路!而「戀事」纏身的霆鋒繼續開心為王晶賀歲片《賭場風雲》開工,眼見前妻帶回兩個仔返港,心情更加大靚!劇組人員爆料,「霆鋒埋位前經常用國語陰聲細氣傾電話,收線後成個人都充滿愛的力量!肯定拍緊拖。」雖然「迅鋒戀」曝光,但霆鋒懶理栢芝以仔要脅,有愛無懼!

謝霆鋒是否跟周迅拍拖?由雙方經理人澄清口供唔夾一事便露端倪,霆鋒經理人霍汶希(Mani)確認兩人住一幢樓,是樓上樓下鄰居,但周迅經理人卻愈幫愈忙,「報道寫的住所是謝霆鋒的公司,當天他聽說周迅來拍雜誌,就下樓打招呼。」實際上,謝霆鋒的公司位於銅鑼灣!

朋友早知拍拖

縱使同周迅經已去到「同居」階段,霆鋒仍堅持玩地下情:「相戀一年,大家只係維持『鄰居』身份,就算周迅喺香港,佢哋都好避忌唔會一齊出街,霆鋒甚至冇帶過周迅去見老友,所謂寧俾人知,莫俾人見,費事刺激栢芝,班朋友聽到佢同周迅行得好埋,但都係得個知字!佢唔提,大家都識趣唔問。所以容祖兒同蔡卓妍被問到對『迅鋒戀』睇法時都冇任何驚訝,仲話佢哋好襯,根本一早知啦。其實霆鋒咁好條件,唔拍拖好嘥!答案都畀晒提示大家啦。」密友爆料說。

負責任好老竇

霆鋒同栢芝離婚兩年,雖然一對兒子Lucas和Quintus交由媽咪照顧,但霆鋒每月固定給兩子可觀的生活費,而且有時間就帶兩子家庭樂。今年5月的母親節,謝霆鋒就湊埋兩個囝囝返屋企,同嫲嫲拉姑、爺爺謝賢開P,順道為三歲生日的Quintus慶生,絕對是有責任感的男人同爸爸!所以對於前妻栢芝打算將兩子送往同父異母家姐戴碧芝居住的加拿大素里(Surrey)定居,都唔多贊成。

驚爆同周迅10萬元租住金鐘「栢舍」後,霆鋒忙拍新戲之餘,亦急急搬屋,以16萬元轉租中半山寶雲道3千呎的複式豪宅用行動去「闢謠」,希望製造單身假象!至於周迅就急急搬出「愛巢」,避走北京老家。時間啱啱好,栢芝即以勝利者姿態帶埋兒子從加拿大回港!

陰聲冧死周迅

「咪以為霆鋒真係為栢芝撇周迅,其實佢哋只係避吓風頭,霆鋒愈愛周迅,愈想低調加以保護,開工拍戲期間,霆鋒手機不離身,隨時On Call!唔係傳微信,就直接傾電話,每次都係操北京腔國語,細細聲好溫柔咁講,而且面帶甜蜜笑容,電話中人一定係女仔啦。霆鋒試過收線前好似o氹囝囝咁話:『等一下再打給你!』加埋陰聲細氣,真係冧死人!講完電話,霆鋒好似叉完電咁成個人都生猛晒!大家點會察覺唔到佢有女呀!」劇組人員忍唔住爆料。

栢芝自製緋聞

近年謝霆鋒以商界CEO身份浮面,勁賺6億。反觀張栢芝變票房毒藥無工開,主力帶仔周遊列國,片約大減只好馬死落地行,狂接內地綜藝節目,就連內地奶粉廣告代言都照殺!隨住囝囝暑假將完,栢芝都要面對現實去搵工開,據知,她已四出 撈,除向環球唱片「招手」,有意再出唱片外,連舞台劇都唔放過,最近仲睇中當頭起年輕組合C AllStar,貪他們形象健康博翻身,所以乘機自製同主音釗峰緋聞,又事先張揚話兩者將於來年有一個大Project,明年仲會一齊返內地做Show及做舞台劇!

不過,C AllStar成員就話唔知,陳健安(On仔)說:「自從佢同釗峰傳出緋聞,合作大計就停咗,暫時冇進一步計劃!」至於經理人林珊珊也回應:「至明年嘅工作表入面都冇呢個工作安排喎,係咪真係合作做到舞台劇?同埋做乜劇種,呢樣嘢交番畀栢芝搞啦。」黐親栢芝無運行,珊珊按兵不動,醒目!

劇組爆料 拍戲空檔甜腔國語傾電話 霆鋒好愛周迅

「迅鋒戀」曝光日程

7月29日

傳出謝霆鋒、周迅秘戀一年,同居於香港金鐘栢舍,張栢芝嬲爆攜兩子遠走加拿大。

7月31日

謝霆鋒未等中半山寶雲道複式豪宅裝修好已火速搬家,暗地澄清跟周迅關係,安撫前妻張栢芝,周迅也離開愛巢搬返北京。

8月5日

傳周迅真正想交往對象才是梁朝偉,偉仔為免劉嘉玲起疑心甩周迅,周迅黐謝霆鋒向梁朝偉「報復」。

8月11日

傳張栢芝以勝利姿態帶兩子由加拿大回港,但仍然行蹤成謎。