霆鋒現身撐軒仔 「迅」速閃人

今日傳出謝霆鋒同周迅原來已經秘戀大半年，為愛郎周迅呢排密密來港，仲秘密搬入金鐘栢舍公寓，租住同一幢公寓方便拍拖。

謝霆鋒今日就出席張敬軒加盟英皇記招，新戀情新聞曝光，霆鋒喺記招笑容滿面，果然見慣風雨，佢就唔想搶軒仔風頭，一早就話要趕戲而唔做訪問，又戴住黑超上台，不過霆鋒依然顯得好風騷，當司儀大讚佢係好老闆，又話係喺報章報道得知，霆鋒即笑住講兩次：「報紙不可盡信」，唔知佢咁講得咁有保留，係咪仲追求緊未得手？

整個主禮儀式步入尾聲時，霆鋒顯得好想盡快離開，不時轉身想走，最後當然係冇答有關戀情嘅問題啦，果然好「迅」速喎。

霆鋒無懼緋聞纏身，照出席軒仔加盟公司記招。

呢位師兄唔話得啦！

背脊「得」住，想點？想走囉！

最後真係一句訪問都冇做。

霆鋒閃人 Mani幫答：佢哋係住同一幢樓

今日被傳同周迅撻著嘅謝霆鋒，出席張敬軒加盟英皇嘅記招，最後當然冇回應同周迅嘅戀聞啦，咁就由經理人霍汶希（Mani）回應啦，Mani話：「霆鋒無拍拖，o依家單身，佢離婚後至o依家仲單身。佢哋係識，只係住埋同一層樓。」不過佢次後更正係「同一幢樓」，又話百分百絕對無咁嘅事。

講到張栢芝靜雞雞帶走一對仔去加拿大，Mani話霆鋒一早同栢芝溝通好，佢亦都認同小朋友唔應該活喺追訪下成長，不過佢哋間中會返嚟香港。

Mani身為經理人，當然要體貼霆鋒啦

周迅死口唔認戀霆鋒：假的

今日爆出謝霆鋒同周迅秘戀，女方仲搬埋去霆鋒住嘅同一幢大廈同居，不過今日霆鋒出席記招就唔肯回應，而女方周迅呢？內地有網站就話聯絡到周迅方面嘅工作人員，回覆得兩個字：假的！

報道話周迅宣傳負責人楊小姐話周迅冇拍拖，兩個人好早就識，而報道入面嘅住所其實係謝霆鋒嘅公司地址喎，當日霆鋒聽講周迅去影硬照只係去樓下打招呼，平時冇私交。咦咦咦?今日霆鋒經理人Mani先親口話：「只係住埋同一層樓。」之後再更正係「同一幢樓」，係「住」喎，唔通霆鋒咁慘平時要瞓公司？